မြန်မာနိုင်ငံနှင့် ကာတာနိုင်ငံ၊ ယူအေအီး နိုင်ငံတို့ကြား သံတမန် ဆက်ဆံမှု တိုးမြှင့်ကာ စီးပွားရေး ရင်းနှီးမြှုပ်နှံမှု တိုးမြှင့်ကြရန် ဆွေးနွေး

မြန်မာနိုင်ငံအနေဖြင့် ကာတာနိုင်ငံ၊ ယူအေအီးနိုင်ငံတို့နှင့် စီးပွားရေး ရင်းနှီးမြှုပ်နှံမှုများ တိုးမြှင့်လုပ်ကိုင်ရန် ဆော်ဒီအာရေဗျ နိုင်ငံဆိုင်ရာ မြန်မာသံအမတ်ကြီး ဦးတင်ယုသည် ရီရတ်ဒ်မြို့အခြေစိုက် ကာတာနိုင်ငံသံရုံးယာယီတာဝန်ခံနှင့် ယူအေအီး နိုင်ငံသံရုံးယာယီတာဝန်ခံတို့အား သီးခြားစီတွေ့ဆုံ ဆွေးနွေးခဲ့ကြောင်း သိရသည်။

မြန်မာသံ အမတ်ကြီးသည် ကာတာနိုင်ငံ သံရုံးယာယီတာဝန်ခံ Mr. Mohammed bin Khalid Al-Qahfani နှင့် ဩဂုတ်လ (၁၇) ရက် နံနက် (၁၁) နာရီတွင်တွေ့ဆုံ၍ မြန်မာနိုင်ငံ၏ လတ်တလောနိုင်ငံရေးဖြစ်ပေါ် တိုးတက်မှု၊မြန်မာနိုင်ငံနှင့် ကာတာနိုင်ငံကြား သံတမန်ဆက်ဆံမှု တိုးမြှင့်ရေး၊ ASEAN-GCC ဆက်ဆံရေးဆိုင်ရာ၊ စီးပွားရေးနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်ရေးတို့အား ဆွေးနွေးခဲ့ကြကြောင်း သိရသည်။

ထို့ပြင် ယူအေအီးနိုင်ငံသံရုံးယာယီတာဝန်ခံ Ms. Maryam Nasser Almheiri နှင့်လည်း မွန်းတည့် (၁၂) နာရီခွဲတွင် တွေ့ဆုံခဲ့ပြီး မြန်မာနိုင်ငံ၏ လတ်တလောနိုင်ငံရေးဖြစ်ပေါ်တိုးတက်မှု၊ ယူအေအီး နိုင်ငံတွင် ရောက်ရှိအလုပ်လုပ်ကိုင်နေသည့် မြန်မာနိုင်ငံသားအလုပ်သမားများအား ယူအေအီး နိုင်ငံ၏ ဥပဒေနှင့်အညီစောင့်ရှောက်ကာကွယ်မှုပေးနိုင်ရေးကိစ္စရပ်များအား ဆွေးနွေးခဲ့ကြကြောင်း သိရသည်။

မြန်မာနိုင်ငံနှင့် ယူအေအီး နိုင်ငံတို့အကြား သံတမန်ဆက်ဆံရေးတိုးမြှင့်ဆောင်ရွက်လျက်ရှိမှု၊ စီးပွားရေးနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်နိုင်မည့် အခြေအနေများ၊ ASEAN-GCC ဆက်ဆံရေးဆိုင်ရာများကိုလည်း ဆွေးနွေးခဲ့ကြသည်။