မြစ်ဆုံရေအားလျှပ်စစ် စီမံကိန်းကို ပြန်လည်သုံးသပ်ဆွေးနွေး အကောင်အထည်ဖော်ဆောင်ရွက်သွားရန်လို

ကချင်ပြည်နယ်တွင် လျှပ်စစ်ဓါတ်အားထုတ်လုပ်နိုင်ရန် မေခ၊မလိခ မြစ်နှစ်ခုမှ ပေါင်းစည်းပေးသည့် ဧရာဝတီမြစ်၏ အရင်းအမြစ်များက သဘာဝတရားကြီးမားစွာဖန်တီးပေးထားသည့် မြစ်ဆုံရေအားလျှပ်စစ် စီမံကိန်းကို ပြန်လည်သုံးသပ်ဆွေးနွေးအကောင်အထည်ဖော်ဆောင်ရွက်သွားရန်လိုအပ်ကြောင်း နိုင်ငံတော်လုံခြုံရေးနှင့်အေးချမ်းသာယာရေးကော်မရှင် ဒုတိယဥက္ကဋ္ဌ၊ ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်းက ပြောသည်။ ယမန်နေ့က ကချင်ပြည်နယ်အစိုးရအဖွဲ့ဝင်များ၊ မြို့မိမြို့ဖများ နှင့်တွေ့ဆုံစဉ် နိုင်ငံတော်လုံခြုံရေးနှင့်အေးချမ်းသာယာရေးကော်မရှင် ဒုတိယဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ် ကာကွယ်ရေးဦးစီးချုပ်(ကြည်း) ဒုတိယဗိုလ်ချုပ်မှူးကြီး စိုးဝင်းက အထက်ပါအတိုင်းပြောကြားခဲ့ခြင်းဖြစ်သည်။ လျှပ်စစ်ဓါတ်အားကို ရေအား၊လေအား၊နေရောင်ခြည်စွမ်းအား၊ကျောက်မီးသွေး နှင့် သဘာဝဓါတ်ငွေ့များမှ ထုတ်လုပ်ကြပြီး မြန်မာနိုင်ငံ၌ တစ်ယူနစ် ထုတ်လုပ်မှုတန်ဖိုးသည့် ရေအားလျှပ်စစ်မှ ပျှမ်းမျှ ၈၂ ကျပ်၊ နေရောင်ခြည်စွမ်းအင်မှ တစ်ယူနစ် ၁၇၁ ကျပ်၊ သဘာဝဓါတ်ငွေ့မှ ၂၃၅ ကျပ်၊ကျောက်မီးသွေးမှ ၂၁၅ ကျပ် ကျသင့်ပြီး ရေအားလျှပ်စစ်က အသက်သာဆုံးဖြစ်ကြောင်းလည်း ဒုတိယဗိုလ်ချုပ်မှူးကြီး စိုးဝင်း ကပြောသည်။ ရေအားလျှပ်စစ်သည် အသက်သာဆုံးဖြစ်ခြင်းကြောင့် မြစ်ဆုံရေအားလျှပ်စစ်စီမံကိန်းကို ပြန်လည်သုံးသပ်ပြီး အကောင်ထည်ဖော်ဆောင်ရွက်သွားရန်လိုအပ်ကြောင်း ပြောကြားခဲ့ခြင်းလည်း ဖြစ်သည်။ အဆိုပါ တွေ့ဆုံမှု၌ မြစ်ဆုံရေအားလျှပ်စစ်စီမံကိန်း နှင့် ပတ်သက်ပြီး စီမံကိန်းမှ ရရှိလာမည်အကျိုးကျေးဇူးများ နှင့် အာမခံချက်များကို ရှင်းလင်းပေးရန် မြို့မိမြိုဖများက တောင်းဆိုခဲ့ပြီး ဒုတိယဝန်ကြီး ဦးအေးကျော် က စီမံကိန်းနှင့် ပတ်သက်သည့်များကို တရုတ်နိုင်ငံမှ သက်ဆိုင်ရာ ကုမ္ပဏီများ နှင့် ဆွေးနွေးခဲ့မှုများကိုလည်း ရှင်းလင်းပြောကြားခဲ့ကြောင်း သိရသည်။ မြစ်ဆုံစီမံကိန်း စတင်ချိန်၌ နိုင်ငံရေးအကြပ်အတည်း နှင့် မမျှော်မှန်းနိုင်သောအကြောင်းတရားများကြောင့် စီမံကိန်းရပ်တန့်ခဲ့ပြီး အဆိုပါစီမံကိန်းတည်ဆောက်ရေးနှင့် ပတ်သက်ပြီး ဒေသခံပြည်သူများ ဘာသာရေးခေါင်းဆောင်များနှင့် အကြေအလည်ဆွေးနွေးရသည့်အချက်မှာ ငလျင်ကြောပေါ်တွင် ရှိနေသည့်အတွက် တမံပြိုကျပါက ဖြစ်ပေါ်လာနိုင်မည် အန္တာရာယ်များအတွက် မေးခွန်းများဖြစ်ကြောင်းလည်း ဒုတိယဗိုလ်ချုပ်မှူးကြီး စိုးဝင်းက ပြောသည်။ တမံတည်ဆောက်မှု ဒီဇိုင်း၌ ငလျင်ဒဏ်ခံနိုင်သည့် ဒီဇိုင်းဖြင့်တည်ဆောက်ရန် ဆွေးနွေးခဲ့ပြီး အဆိုပါ မြစ်ဆုံရေအားလျှပ်စစ်စီမံကိန်းနေရာသည် စစ်ကိုင်းပြတ်‌ရွှေ့ကြော မှ ၂၅ ဒဿမ ၄ ကီလိုမီတာအကွာတွင်ရှိသည့် အတွက် မူလဒီဇိုင်းအရ မဂ္ဂနီကျု့ ၇ ဒဿမ ၁ ခံနိုင်ရန် ရှိစေရန်အတွက် တွက်ချက်ထားသည့် တမံဖြစ်ကြောင်း လည်း ဒုတိယဗိုလ်ချုပ်မှူးကြီး စိုးဝင်းက ပြောသည်။ အဆိုပါ စီမံကိန်းတွင် မေခ၊မလိခ မြစ်တလျှောက် စီမံကိန်း(၆)ခု အနက် မြစ်ဆုံ ၆၀၀၀ MW အပါအဝင် စုစုပေါင်း ၁၉၀၉၉ MW စီမံကိန်းရေးဆွဲပြီး ချီဖွေငယ်မှ စ၍ မြစ်ဆုံကိုစတင်ခဲ့ခြင်းဖြစ်ကြောင်း သိရသည်။ မြစ်ဆုံတမံကြောင့် မြစ်ကြီးနားမြို့ရေဝင်ရေကြီး နစ်မြှပ်မှုမှလည်း ကင်းရှင်းစေမည်ဖြစ်ကြောင်းလည်း ပြောကြားခဲ့သည်။