ကြိုတင်မဲပေးမည်သူများအတွက်လည်း ပုံစံ(၁၅)ပေးပို့ရမည် ရက်တိုးမြှင့်သတ်မှတ်ကြောင်း UEC အသိပေး
မဲစာရင်းများ ပြည့်စုံမှန်ကန်စေရေးနှင့် မဲဆန္ဒရှင်များက လိုအပ်သည့် တောင်းဆိုလွှာ၊ကန့်ကွက်လွှာ၊ပြင်ဆင်လွှာများ တင်ပြရာတွင် အချိန်ပိုမိုရရှိစေရန်အတွက် မဲစာရင်းကို အောက်တိုဘာ(၁၄)ရက်ကနေ အောက်တိုဘာ(၂၀)ရက်အထိ (၇)ရက်ကြာ ထပ်မံတိုးမြှင့်ကပ်ထားကြေညာသွားမည် ဖြစ်ကြောင်း ပြည်ထောင်စုရွေးကောက်ပွဲကော်မရှင် က ယနေ့ အောက်တိုဘာ(၉)ရက်နေ့တွင် အသိပေးထုတ်ပြန်ထားသည်။
ထိုကြောင့် မိမိအမည် မဲစာရင်းတွင်မပါဝင်ပါက ပုံစံ(၃)ဖြင့် မဲစာရင်းတွင် အမည်ထည့်သွင်းပေးရန် တောင်းဆိုခြင်း မပါဝင်သင့်သူများပါဝင်နေပါက ကန့်ကွက်ခြင်းနှင့် မဲစာရင်းပါအချက်အလက်များ မှားယွင်နေပါက ပြင်ဆင်လွှာတင်သွင်းခြင်းများကို အောက်တိုဘာ(၂၀)ရက်အထိ ဆက်လက်ဆောင်ရွက်နိုင်မည်ဖြစ်ကြောင်း ပြည်ထောင်စုရွေးကောက်ပွဲကော်မရှင် က အသိပေးထားသည်။
ထိုပြင် သက်ဆိုင်ရာ မြို့နယ်ပြင်ပရောက်ရှိနေသည့် ပြည်တွင်း၊ပြည်ပ မဲဆန္ဒရှင်များ အနေဖြင့် လည်း ကြိုတင်ဆန္ဒမဲပေးခြင်းနှင့် ပတ်သက်ပြီး ရက်တိုးမြှင့်သတ်မှတ်ကြောင်းလည်း ရွေးကောက်ပွဲကော်မရှင်က ယနေ့ အောက်တိုဘာ(၉)ရက်နေ့တွင် အသိပေးထားသည်။
ကြိုတင်မဲပေးမည် သက်ဆိုင်ရာ ကျောင်း၊သင်တန်း၊အချုပ်ခန်း နှင့် ဆေးရုံ အကြီးမှုးများသည် မဲဆန္ဒရှင်များ ဖြည့်သွင်းပြီးသည့် ပုံစံ(၁၅)များကို မြို့နယ်အလိုက်ပြုစုထားသည့် မှတ်ပုံတင်စာရင်း ပုံစံ(၁၅-က) နှင့်အတူ သက်ဆိုင်ရာမြို့နယ် ကော်မရှင် အဖွဲ့ခွဲ့များသို့ အောက်တိုဘာ(၁၂)ရက်နေ့အစား အောက်တိုဘာ(၁၇)ရက်နေ့အရောက်ပေးပို့ ရန် သတ်မှတ်ကြောင်း ကော်မရှင်က အသိပေးချက်တွင် ဖော်ပြထားသည်။
ထိုအတူ ယာယီနေရပ်စွန့်ခွာနေရသူများအနေဖြင့်လည်း ပုံစံ(၁၅)များကို သက်ဆိုင်ရာ မြို့နယ်ကော်မရှင် အဖွဲ့ခွဲ ထံ အောက်တိုဘာ(၁၇)ရက်နေ့အရောက်ပြန်လည်ပေးပို့ ရန် တိုးမြှင့်သတ်မှတ်ထားကြောင်း သိရသည်။
နိုင်ငံပြင်ပရောက်ရှိနေသူများအနက် ဆန္ဒမဲပေးပိုင်ခွင့်ရှိသူများ ကြိုတင်ဆန္ဒမဲလက်မှတ်ဖြင့် မဲပေးနိုင်ရန် ဖြည့်သွင်းပြီးသည့် ပုံစံ(၁၅)များကိုလည်း အောက်တိုဘာ(၁၇)ရက်နေ့အရောက်ပေးပို့ရန် တိုးမြှင့်သတ်မှတ်ပေးထားကြောင့် ပြည်ထောင်စုရွေးကောက်ပွဲကော်မရှင် က အသိပေးထုတ်ပြန်ထားသည်။