ဒေသတွင်းနိုင်ငံများ ဖွံ့ဖြိုးတိုးတက်ရန် မီဒီယာကဏ္ဍမှ အသိပညာများ၊ သတင်းအချက်အလက်များပေးပို့နိုင်မှုသည် လွန်စွာအရေးကြီးလှ၍ မဲခေါင်-လန်ချန်းနိုင်ငံများ၏ မီဒီယာများကြား အပြန်အလှန်ဆက်သွယ်ချိတ်ဆက်ရေး၊ သင်ယူလေ့လာရေး၊ လက်တွေ့ပူးပေါင်းဆောင်ရွက်ရေးများ ပိုမိုအားကောင်းလာစေရန် “မီဒီယာ ပေါင်းစည်းမှု” ကိစ္စများကို ပိုမိုတိုးမြှင့်ပူးပေါင်းဆောင်ရွက်လျက်ရှိကြောင်းကို ပြန်ကြားရေးဝန်ကြီး ဦးမောင်မောင်အုန်းက ပြောကြားခဲ့သည်။
မဲခေါင် – လန်ချန်း နိုင်ငံများကြား ကဏ္ဍစုံပေါင်းစည်းဆောင်ရွက်ရာတွင် သတင်းနှင့် မီဒီယာအခန်းက ဏ္ဍကိုလည်း နည်းပညာများ ဖွံ့ဖြိုးတိုးတက်စေရန်၊ နိုင်ငံတကာစံနှုန်း၊ ကျင့်ဝတ်များနှင့်အညီ ခေတ်မီ မီဒီယာနည်းပညာများကို သင်ယူလေ့လာနိုင်ခွင့်၊ အသုံးချနိုင်ခွင့်၊ ဖလှယ်နိုင်ခွင့်ရရှိစေရန် အတူပူးပေါင်းဆောင်ရွက်သွားကြရမည်ဟုလည်း ထည့်သွင်း ပြောကြားသွားသည်။
မြန်မာအစိုးရ အနေဖြင့် မီဒီယာကဏ္ဏကို အစဉ်တစိုက်မြှင့်တင်ဆောင်ရွက်လျက်ရှိကြောင်း ပြန်ကြားရေးဝန်ကြီးဦးမောင်မောင်အုန်းက ပြောကြားသည်။
သြဂုတ် (၁၆) ရက်ညပိုင်းက ကူမင်းမြို့ရှိ ယူနန်မီဒီယာဂရုစတူဒီယိုခန်းမ (၁)တွင် တရုတ်နိုင်ငံ၊ အမျိုးသားရေဒီယိုနှင့် ရုပ်မြင်သံကြားဌာန (NRTA)၊ ကမ္ဘောဒီးယား ပြန်ကြားရေးဝန်ကြီးဌာနနှင့် တရုတ်နိုင်ငံ၊ ယူနန်ပြည်နယ်၊ပြည်သူ့အစိုးရတို့ ပူးပေါင်းပြုလုပ်သည့် 4th Lancang-Mekong Audiovisual Week ဖွင့်ပွဲတွင် အမှာစကားပြောကြားစဉ် ထည့်သွင်းပြောကြားခဲ့ခြင်း ဖြစ်သည်။
ထို့ပြင် ပြည်ထောင်စုဝန်ကြီးသည် ယူနန်မြို့ရှိ Yunnan Famous Tea Museum သို့ သွားရောက်လေ့လာခဲ့ပြီး တရုတ်နိုင်ငံ အမျိုးသားရေဒီယိုနှင့်ရုပ်မြင်သံကြားစီမံခန့်ခွဲရေး အဖွဲ့အစည်း (NRTA) ဒု-အကြီးအကဲ Mr. Yang Guo Rei နှင့် ယူနန်ပြည်နယ် ရေဒီယိုနှင့် ရုပ်မြင်သံကြား စီမံခန့်ခွဲရေးအဖွဲ့အစည်း၊ ယူနန်မီဒီယာအုပ်စု (YMG)တို့မှ ခေါင်းဆောင်များနှင့်တွေ့ဆုံကာ မီဒီယာကဏ္ဍပူးပေါင်းဆောင်ရွက်မှုမြှင့်တင်ရေးနှင့်ဖွံ့ဖြိုးတိုးတက်ရေးတို့ ဆွေးနွေးခဲ့သည်။
သြဂုတ် (၁၇) ရက်တွင် ပြည်ထောင်စုဝန်ကြီးဦးမောင်မောင်အုန်းသည် ကူမင်းမြို့၌ ကျင်းပလျက်ရှိသည့် (၇)ကြိမ်မြောက် တရုတ် – တောင်အာရှ ကုန်စည်ပြပွဲနှင့်(၂၇)ကြိမ်မြောက် တရုတ်ကူမင်းသွင်းကုန်ပို့ကုန် ကုန်စည်ပြပွဲသို့ သွားရောက်၍ မြန်မာနိုင်ငံပြခန်း၌ စားသောက်ကုန်နှင့် လူသုံးကုန်ပစ္စည်းများ စနစ်တကျ ထုပ်ပိုး၍ ခင်းကျင်းပြသထားရှိမှုနှင့် ယူနန်ပြည်နယ်တွင် ဈေးကွက်ဝေစုရရှိနေမှုကို ကြည့်ရှုအားပေးခဲ့သည်။
ထို့နောက် ပြည်ထောင်စု ဝန်ကြီးသည် ကူမင်းမြို့ရှိ ယူနန်နေ့စဉ် (Yunan Daily) သတင်းစာတိုက်သို့ သွားရောက်၍ ဆယ်စုနှစ်အလိုက် သုံးသပ်ချက်ပြုလုပ်၍ အဆင့်ဆင့် တိုးတက်ပြောင်းလဲ လုပ်ဆောင်နေမှုတို့ကို ကြည့်ရှုလေ့လာခဲ့သည်။
ထို့ပြင် Online Media ကိုလည်း Print Media နှင့် အပြိုင်ဆောင်ရွက်နေမှု၊ သတင်းစာ (၉) မျိုးနှင့် မဂ္ဂဇင်း (၉) မျိုး ထုတ်ဝေဖြန့်ချိနေမှုတို့ကို လေ့လာကြည့်ရှုပြီး သတင်းဖလှယ်အသုံးပြုမှုအပါအဝင် ပူးပေါင်းဆောင်ရွက်လိုမှုများအား လုပ်ငန်းစဉ်အတိုင်း စနစ်တကျလျင်မြန်စွာ အကောင်အထည် ဖော်ဆောင်ရွက်ရန် ဆွေးနွေးပြောကြားခဲ့ကြောင်းလည်း သိရသည်။
