မူးယစ်ဆေးဝါးနှင့်ပရီကာဆာဓာတုပစ္စည်းများတားဆီးနှိမ်နင်းရေးအထူးစစ်ဆင်ရေးကို ၆လတာ တစ်နိုင်ငံလုံးအတိုင်းအတာဖြင့်ဆောင်ရွက်လျက်ရှိ

မြန်မာနိုင်ငံ၌ မူးယစ်ဆေးဝါးထုတ်လုပ်သယ်ဆောင်ရောင်းဝယ်မှုအခြေအနေများနှင့်သယ်ဆောင်ရာလမ်းကြောင်းပြောင်းလဲမှုများအပေါ်သုံးသပ်ဆောင်ရွက်ကာ ဖမ်းဆီးလျက်ရှိခြင်းနှင့်ပတ်သက်၍ မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများအန္တရာယ်တားဆီးကာကွယ်ရေးဗဟိုအဖွဲ့ အတွင်းရေးမှူး၊ပြည်ထဲရေးဝန်ကြီးဌာန ဒု-ဝန်ကြီး၊မြန်မာနိုင်ငံရဲတပ်ဖွဲ့ ရဲချုပ် ဗိုလ်ချုပ်ဇင်မင်းထက်က ပြောကြားခဲ့ခြင်းဖြစ်သည်။

မြန်မာနိုင်ငံမှ အလှည့်ကျအိမ်ရှင်အဖြစ်ကျင်းပခဲ့သည့် (၄၄)ကြိမ်မြောက် အာဆီယံမူးယစ်ဆေးဝါးဆိုင်ရာ အဆင့်မြင့်အရာရှိကြီးများ အစည်းအဝေးနှင့်ဆက်စပ်အစည်းအဝေးများ(44th ASEAN Senior Officials Meeting on Drug Matter and Its Related Meeting- ASOD)တွင် အဖွင့်အမှာစကားပြောကြားရာ၌ထည့်သွင်းပြောကြားခဲ့ခြင်းဖြစ်သည်။

မြန်မာနိုင်ငံအနေဖြင့်မူးယစ် အထူးစစ်ဆင်ရေးများကို စနစ်တကျစီမံချက်ချမှတ်ဆောင်ရွက်လျက်ရှိသည်ဟု ပြောသည်။

ထို့ပြင် ၂၀၂၂ ခုနှစ်အတွင်း လာအို၊မြန်မာ၊ထိုင်း ၃ နိုင်ငံပူးပေါင်းဆောင်ရွက်ခဲ့သည့် Operation 1511 / 22 သည်အောင်မြင်မှုများရရှိခဲ့ကာ လက်ရှိတွင်လည်း မူးယစ်ဆေးဝါးနှင့်ပရီကာဆာဓာတု ပစ္စည်းများတားဆီးနှိမ်နင်းရေးဆိုင်ရာအထူးစစ်ဆင်ရေး Operation 39 ကို ၂၀၂၃ ခုနှစ်၊ဖေဖော်ဝါရီ ၁ ရက်မှဇူလိုင် ၃၁ ရက်အထိ မြန်မာတစ်နိုင်ငံလုံးအတိုင်းအတာဖြင့်ဆောင်ရွက်လျက်ရှိသည်ဟုဆိုသည်။

ထို့အတူ အာဆီယံနိုင်ငံများအချင်းချင်း သတင်းအချက်အလက်များ အချိန်နှင့်တစ်ပြေးညီမျှဝေဖလှယ်မှုများနှင့်ပူးပေါင်းဆောင်ရွက်မှုများကို ပိုမိုတိုးမြှင့်သွားရန်လိုအပ်ကာ မူးယစ်ဆေးဝါးအန္တရာယ်သည် လူသားမျိုးနွယ်အားလုံးကို နည်းမျိုးစုံဖြင့်ခြိမ်းခြောက်စိန်ခေါ်လျက်ရှိ၍ အာဆီယံအဖွဲ့ဝင်နိုင်ငံများအချင်းချင်း နိုင်ငံရေးရောယှက်မှုကင်းရှင်းစွာပူးပေါင်းပြီး တူညီသောဘုံရည်မှန်းချက်ဖြင့် နီးကပ်စွာဆောင်ရွက်သွားရမည်ဟုလည်း တိုက်တွန်းပြောကြားခဲ့သည်။

ယနေ့ တိုးတက်လာသည့် ခေတ်စနစ်အခြေအနေနှင့်နည်းပညာဆန်းသစ်မှုများအရ မူးယစ်ဆေးဝါးပြဿနာသည် လွန်စွာရှုပ်ထွေးလာပြီးတရားမဝင် မူးယစ်ဆေးဝါး သယ်ဆောင်ရောင်းဝယ်ခြင်းနှင့် မှောင်ခိုလုပ်ငန်းများသည် အာဆီယံဒေသတွင်းသာမက ကမ္ဘာ့နိုင်ငံတိုင်းရင်ဆိုင်ကြုံတွေ့နေရသည့် အန္တရာယ်အရှိဆုံးပြဿနာတစ်ရပ်ဖြစ် သည်ဟုလည်း ပြောသည်။

ကမ္ဘာ့နိုင်ငံအများစု၏ မျိုးဆက်သစ်လူငယ်များကြား၌ အလွယ်တကူဝယ်ယူရရှိနေသည့် လူလုပ်မူးယစ်ဆေးဝါးသုံးစွဲမှုများ များပြားလာကာ Happy Water ကဲ့သို့ စိတ်ပြောင်းဆေးဝါးအသစ်များ နေ့စဉ်နှင့်အမျှ ပုံစံအမျိုးမျိုးဖြင့်ပေါ်ထွက်လျက်ရှိ၍ အနာဂတ်ကာလမူးယစ်ဆေးဝါးပြဿနာ၏ စိန်ခေါ်မှုအသစ်များနှင့်ဆက်လက်ရင်ဆိုင်နေရမည်ဟုလည်း ပြောကြားခဲ့သည်။

ထို့နောက် (၄၃)ကြိမ်မြောက် ASOD အစည်းအ ဝေးကို အိမ်ရှင်အဖြစ်လက်ခံကျင်းပခဲ့သည့် မလေးရှားနိုင်ငံ ASOD ခေါင်းဆောင်မှ (၄၄)ကြိမ်မြောက် ASOD အစည်းအဝေးအား အိမ်ရှင်အဖြစ် လက်ခံကျင်းပမည့် မြန်မာနိုင်ငံ ASOD ခေါင်းဆောင် ရဲမှူးချုပ်ဝင်းနိုင်ထံ သဘာပတိတာဝန်ကို လွှဲပြောင်းပေးအပ်ခဲ့သည်။