မုံရွာ-မန္တလေးကားလမ်းတွင် ဒိုင်နာယာဉ် ဘရိတ်ပေါက်ပြီး တစ်ဖက်ယာဉ်ကြောမှ Super Custom ယာဉ်အား ဝင်တိုက်မိရာ အမျိုးသမီးတစ်ဦး ကားအတွင်း ညပ်နေပြီး လူ (၅) ဦး ထိခိုက်ဒဏ်ရာရရှိခဲ့ကြောင်း မြန်မာနိုင်ငံ မီးသတ်တပ်ဖွဲ့မှ သိရသည်။
ဩဂုတ်လ ၁ ရက်နေ့၊ နေ့လည် ၁၂ နာရီ ၄၀မိနစ်အချိန်ခန့်၊ စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ ပြူကံရပ်ကွက်၊ မုံရွာ-မန္တလေးကားလမ်းတွင် အပြာရောင် ဒိုင်နာယာဉ်(၁)စီး ဘရိတ်ပေါက်၍ တစ်ဖက်ယာဉ်ကြောမှ မောင်းနှင်လာသော ခဲရောင် Super Custom ယာဉ်အား ဝင်တိုက်မိခဲ့ရာ Super Custom ယာဉ်ပေါ်ပါ အမျိုးသမီး (၁) ဦး ကားအတွင်း ညပ်နေကြောင်း သိရသည်။
ယာဉ်တိုက်မှုဖြစ်စဉ်ကြောင့် ဒိုင်နာယာဉ်ပေါ်ပါ အမျိုးသား (၃)ဦး၊ အမျိုးသမီး (၄)ဦး စုစုပေါင်း (၇)ဦး အနက် ထိခိုက်ဒဏ်ရာရရှိသူ အမျိုးသား (၂)ဦး၊ အမျိုးသမီး (၃)ဦး စုစုပေါင်း(၅)ဦး ထိခိုက်ဒဏ်ရာ(မစိုးရိမ်ရ)တို့အား ထုံးဘိုအရန်မီးသတ်တပ်ဖွဲ့တို့မှ သူနာတင်ယာဉ်များဖြင့်လည်းကောင်း၊ Super Custom ယာဉ်အတွင်း ညပ်မိနေသူ အမျိုးသမီး (၁) ဦးအား (အသက်ရှင်လျက်) ကယ်ထုတ်နိုင်ခဲ့ပြီး ဇီဝပါလ လူမှုကူညီရေးအသင်းမှ သူနာတင်ယာဉ်ဖြင့်လည်းကောင်း စစ်ကိုင်းမြို့ ကုတင် (၂၀၀) ဆေးရုံကြီးသို့ ကူညီပို့ဆောင်ပေးခဲ့ကြောင်း သိရသည်။
