စစ်ကိုင်းတိုင်း၊မုံရွာမြို့၊အောင်ချမ်းသာရပ်ကွက်ရှိ ကုန်စုံဆိုင်တစ်ဆိုင်တွင် ဇန်နဝါရီ ၂၀ ရက်ညပိုင်းက ဓားပြတိုက်မှုဖြစ်ပွားခဲ့ကြောင်း မေတ္တာစေရာလူမှုကူညီရေးအသင်း-မုံရွာမြို့မှ သိရသည်။
ယင်းနေ့ည ၇ နာရီ ၁၅ မိနစ်ခန့်က အမည်မသိအမျိုးသားများသည် ဆိုင်ကယ် ၄ စီးဖြင့် မုံရွာမြို့၊အောင်ချမ်းသာရပ်ကွက်၊ဗဟိုလမ်းရှိ “ချမ်းမြေ့သုခ”ကုန်စုံဆိုင်သို့ရောက်ရှိလာပြီးနောက် ဆိုင်အတွင်းသို့ဝင်ရောက်ကာခြိမ်းခြောက်ဓားပြတိုက်ခဲ့ကြောင်း သိရသည်။
“သူတို့လင်မယားက ဆိုင်ပိတ်နေတဲ့အချိန် ဓားပြတိုက်တဲ့လူတွေက ဆိုင်ထဲကိုဝင်လာတာ၊ခြိမ်းခြောက်ပြီးပိုက်ဆံတောင်းတဲ့အချိန် ဆိုင်ရှင်အကိုက ပြန်ပြီးခုခံတော့ လင်မယားနှစ်ယောက်လုံးကို ဓားတွေနဲ့ဝိုင်းခုတ်ကြတယ်၊ အဲဒီအချိန်ပတ်ဝန်းကျင်ကိုအော်ပြီး အကူအညီတောင်းတော့ ဘာမှမယူနိုင်ဘဲထွက်ပြေးသွားကြတယ်လို့သိရပါတယ်”ဟု မေတ္တာစေရာလူမှုကူညီရေးအသင်း-မုံရွာမြို့၏ တာဝန်ရှိသူတစ်ဦးကပြောသည်။
ဓားခုတ်ခံရမှုကြောင့် ကုန်စုံဆိုင်ပိုင်ရှင် ကိုစိုးရာဇာ(၃၃)နှစ်၏ ညာဘက်လက်မောင်းပြတ်ရှဒဏ်ရာ ၁ ချက်၊နောက်ကျောပြတ်ရှဒဏ်ရာ ၂ ချက်၊ရင်ဘက်ပြတ်ရှဒဏ်ရာ ၁ ချက်(စိုးရိမ်ရ)နှင့်ဇနီးဖြစ်သူ မခင်ချမ်းမြေ့သိန်း(၃၁)နှစ်မှာ ဘယ်ဘက်ပါးနှင့်ဘယ်ဘက်လက်ချောင်းတို့တွင် ပြတ်ရှဒဏ်ရာ ၁ ချက်စီရရှိခဲ့ကြောင်း သိရသည်။
“အဲဒီအချိန်က မီးပြတ်နေတာ ဆိုင်ထဲကို ၇ ယောက် ၈ ယောက်လောက်ရှိတယ်ဝင်လာပြီး ငွေတောင်းတယ်လို့ပြောတယ်၊ သေနတ်အတုတစ်လက်လည်းပါတယ်လို့ပြောတယ်၊ဆိုင်ရှင်အကိုက တုတ်နဲ့ရိုက်လိုက်တော့ သေနတ်ပြုတ်ကျသွားတဲ့အချိန် ဓါးနဲ့ဝိုင်းခုတ်ကြတာပေါ့”ဟု မေတ္တာစေရာလူမှုကူညီရေးအသင်း-မုံရွာမြို့၏ တာဝန်ရှိသူတစ်ဦးကပြောသည်။
ထို့ကြောင့် မေတ္တာစေရာလူမှုကူညီရေးအသင်း-မုံရွာမြို့မှ ဓားဖြင့်ခုတ်ခံရသူ၂ ဦးအား မြေပြင်အရေးပေါ်ပြုစုကုသမှုများပြုလုပ်ပေးခဲ့ကြပြီးနောက် မုံရွာမြို့ပြည်သူ့ဆေးရုံကြီးသို့ပို့ဆောင်ပေးခဲ့ကြကြောင်း သိရသည်။
ထိုသို့ ပို့ဆောင်ရာ ကုန်စုံဆိုင်ပိုင်ရှင်ကိုစိုးရာဇာသည် ရရှိထားသည့် ဓားဒဏ်ရာများကြောင့် ဆေးရုံရောက်ရှိချိန်၌သေဆုံးသွားခဲ့ပြီး မခင်ချမ်းမြေ့သိန်းမှာ ဆေးကုသမှုခံယူနေရကြောင်း သိရသည်။
“ဆိုင်ရှင်အကိုက သွေးထွက်လွန်သွားတဲ့အတွက် အခင်းဖြစ်တဲ့နေရာမှာ ရှေးဦးပြုစုနည်းနဲ့လုပ်တာတောင်သွေးကထိန်းလို့မရဘူး၊ ဆေးရုံအရောက်မှာသေဆုံးသွားတာပါ၊ ဒီမနက်ကတော့ ဆေးရုံရင်ခွဲရုံကနေ သူ့အိမ်ကိုပြန်သယ်လာခဲ့ပါပြီ၊ သူတို့မှာ ၃ နှစ်အရွယ်လောက်ရှိတဲ့ ကလေးတစ်ယောက်လည်းရှိတယ်”ဟု မေတ္တာစေရာလူမှုကူညီရေးအသင်း-မုံရွာမြို့၏ တာဝန်ရှိသူတစ်ဦးကပြောသည်။
