မုတ်သုံလေ ဆက်လက်အားကောင်းနေသည့်အတွက် ရေကြီးရေလျံမှုများဖြစ်ပေါ်နေသည့် မွန်ပြည်နယ် အပါအဝင် ဒေသ (၈)ခုတွင် နေရာကွက်၍ မိုးကြီးမည်ဖြစ်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ ထုတ်ပြန်ကြေညာထားသည်။
ယနေ့ ဇူလိုင်လ (၂၀)ရက် နံနက်(၇)နာရီအချိန် ထုတ်ပြန်ချက်အရ ကပ္ပလီ ပင်လယ်ပြင်နှင့် ဘင်္ဂလား ပင်လယ်အော်တို့တွင် မုတ်သုံလေ အားကောင်းနေဆဲဖြစ်ပြီး ယနေ့ညနေအထိခန့်မှန်းချက်အရ နေပြည်တော်၊ မကွေးတိုင်းဒေသကြီးနှင့် ကယားပြည်နယ်တို့တွင် နေရာကျဲကျဲ၊ စစ်ကိုင်းတိုင်းဒေသကြီး အောက်ပိုင်း၊ မန္တလေးတိုင်းဒေသကြီးနှင့် ချင်းပြည်နယ်တို့တွင် နေရာစိပ်စိပ်နှင့် ကျန်တိုင်းဒေသကြီးနှင့် ပြည်နယ်များတွင် နေရာအနှံ့အပြား မိုးထစ်ချုန်းရွာနိုင်ကြောင်း သိရသည်။
ထို့အပြင် မွန်ပြည်နယ်နှင့် ကရင်ပြည်နယ်တို့တွင် ဒေသအလိုက်နှင့် စစ်ကိုင်းတိုင်း ဒေသကြီး အထက်ပိုင်း၊ မန္တလေးတိုင်း ဒေသကြီး၊ ဧရာဝတီတိုင်း ဒေသကြီး၊ တနင်္သာရီတိုင်း ဒေသကြီး၊ ကချင်ပြည်နယ်နှင့် ရခိုင်ပြည်နယ်တို့တွင် နေရာကွက်၍ မိုးကြီးနိုင်ကြောင်း မိုး/ဇလက ထုတ်ပြန်ကြေညာထားသည်။
မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ကာ လှိုင်းကြီးနိုင်ပြီး မိုးသက်လေပြင်းကျစဉ် ရေပြင်/မြေပြင်လေသည် တစ်နာရီ မိုင်(၄၀)အထိ တိုက်ခတ်နိုင်ကြောင်းနှင့် လှိုင်းအမြင့်မှာ မြန်မာ့ကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တို့တွင် (၉) ပေမှ (၁၂)ပေခန့် ရှိနိုင်ကြောင်း သိရသည်။
ဇူလိုင်လ(၁၉)ရက်နေ့ မွန်းလွဲ(၂:၀၀)နာရီအချိန် ထုတ်ပြန်ချက်အရ ဖြစ်ပေါ်ခဲ့သည့် မှတ်သားဖွယ်ရာ မိုးရေချိန်များမှာ မော်လမြိုင်မြို့တွင် (၂၂.၇၅)လက်မ၊ မုဒုံမြို့တွင် (၁၄.၀၉)လက်မ၊ ကျိုက်မရောမြို့တွင် (၁၀.၈၃)လက်မ၊ ပေါင်မြို့တွင် (၇.၂၀)လက်မ၊ ကျိုက်ဒုံမြို့တွင် (၆.၆၄) လက်မ၊ ကော့ကရိတ်မြို့တွင် (၅.၈၇)လက်မ၊ ချောင်းဆုံမြို့တွင် (၄.၉၆)လက်မ၊ ရေးမြို့တွင် (၄.၄၁)လက်မ၊ မြိတ်မြို့တွင် (၄.၂၁)လက်မ၊ ကန်ကြီးထောင့်မြို့တွင် (၄.၂ ၀) လက်မနှင့် ကြာအင်းဆိပ်ကြီးမြို့နှင့် ကျိုက္ခမီမြို့တို့တွင် (၃.၉၄) လက်မအထိ ရှိခဲ့ကြောင်း သိရသည်။
