ဘင်္ဂလားပင်လယ်အော် အနောက်မြောက်ပိုင်းတွင် ဖြစ်ပေါ်နေသည့် လေဖိအားနည်းရပ်ဝန်းမှာ ဆက်လက်တည်ရှိနေပြီး လာမည့်ရက်ပိုင်းအတွင်း ပိုမိုအားကောင်းလာနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ဇူလိုင် ၃ ရက် နံနက်ပိုင်းတွင် ထုတ်ပြန်ခဲ့သည်။
လက်ရှိတွင် ကပ္ပလီပင်လယ်ပြင်နှင့် ဘင်္ဂလားပင်လယ်အော်တို့၌ မုတ်သုံလေ အားကောင်းရာမှ အားအလွန်ကောင်းနေပြီး ပင်လယ်ပြင်တစ်လျှောက် တိမ်အသင့်အတင့်မှ တိမ်ထူထပ်နေကြောင်း သိရသည်။
ထို့ပြင် တောင်တရုတ်ပင်လယ်ပြင်တွင် ဖြစ်ပေါ်နေသည့် အပူပိုင်းမုန်တိုင်းငယ်သည် အားပိုကောင်းလာကာ “မိုင်ဆက်ခ် (MAYSAK)” အမည်ရှိ အပူပိုင်းမုန်တိုင်းအဖြစ် ရောက်ရှိလာပြီး မြောက်ဘက်သို့ ဖြည်းညင်းစွာ ရွေ့လျားကာ ဇူလိုင် ၄ ရက်တွင် ဟိုင်နန်ကျွန်းကို ဖြတ်ကျော်နိုင်ကြောင်း ခန့်မှန်းထားသည်။
ယနေ့မွန်းတည့်မှ နောက် ၂၄ နာရီအတွင်း ရန်ကုန်၊ တနင်္သာရီနှင့် ရခိုင်ကမ်းရိုးတန်းတစ်လျှောက် ပင်လယ်ပြင်များတွင် နေရာအနှံ့အပြား မိုးထစ်ချုန်းရွာနိုင်ပြီး နေရာကွက်၍ မိုးသည်းထန်စွာ ရွာသွန်းနိုင်ကြောင်းလည်း ထုတ်ပြန်ထားသည်။
ရေပြင်လေသည် အနောက် (သို့မဟုတ်) အနောက်တောင်ဘက်မှ တစ်နာရီလျှင် ပင်လယ်မိုင် ၁၅ မှ ၂၀ မိုင်နှုန်းဖြင့် တိုက်ခတ်နိုင်ပြီး တစ်ခါတစ်ရံ ၂၅ မှ ၃၀ မိုင်နှုန်းအထိ အားကောင်းလာနိုင်ကြောင်း၊ ပင်လယ်လှိုင်းအမြင့်မှာ ၉ ပေမှ ၁၁ ပေအထိ မြင့်တက်နိုင်သဖြင့် ပင်လယ်ပြင်တွင် လှိုင်းကြီးနိုင်ကြောင်း မိုးဇလက သတိပေးထားသည်။
ထို့ကြောင့် ကမ်းရိုးတန်းတစ်လျှောက် သွားလာမည့် ရေယာဉ်များ၊ ငါးဖမ်းလှေများနှင့် ပင်လယ်ပြင်ခရီးသွားများအနေဖြင့် မိုးလေဝသထုတ်ပြန်ချက်များကို အနီးကပ်စောင့်ကြည့်ကာ လိုအပ်သည့် ဘေးအန္တရာယ်ကြိုတင်ကာကွယ်ရေး အစီအမံများကို ဆောင်ရွက်ထားကြရန် တာဝန်ရှိသူများက တိုက်တွန်းထားသည်။