ဤထိပ်သီးဆွေးနွေးပွဲကြီးသည် အိန္ဒိယ မီဒီယာနှင့်ဖျော်ဖြေရေးလုပ်ငန်းကို ကမ္ဘာတစ်ဝန်းက အာရုံစိုက်လာပြီး ရုပ်/သံ၊ ရုပ်ရှင် နှင့် အသံလွှင့် လုပ်ငန်းများကို အိန္ဒိယ နိုင်ငံ နှင့် ပူးပေါင်းထုတ်လုပ်ရေး၌ ရင်းနှီးမြှုပ်နှံကြရန်ဖိတ်ခေါ်သည့်အခမ်းအနားကြီးလည်းဖြစ်သည်။ အိန္ဒိယ နိုင်ငံ၏ မီဒီယာနှင့်ဖျော်ဖြေရေးလုပ်ငန်းကိုသိသိသာသာတိုးတက်လာစေရန်ရည်မှန်းထားပြီး၂၀၂၉ ခုနှစ်တွင် ဈေးကွက်ပမာဏကို အမေရိကန်ဒေါ်လာ ၅၀ ဘီလျံ ရှိစေရန် မျှော်မှန်းထားသည်။
WAVES 2025 တွင်အနာဂတ်မျှော်မှန်းချက် (၇) ရပ်အနက်မှ တစ်ရပ်မှာ အိန္ဒိယကိုအဓိကကမ္ဘာ့ရင်းနှီးမြှုပ်နှံမှုဈေးကွက်ဖြစ်စေရေးပင်ဖြစ်သည်။ ကမ္ဘာ့မီဒီယာဈေးကွက်၌ အိန္ဒိယ၏ ဝေစုကိုမြှင်တင်ရေးသည်လည်း နောက်ထပ်မျှော်မှန်းချက်တစ်ရပ်ဖြစ်သည်။ နောက်ထပ်စိတ်ဝင်စားဖွယ်မျှော်မှန်းချက်တစ်ရပ်မှာအရေးပါသောအစုစပ်လုပ်ငန်းများထူထောင်ကာကမ္ဘာတစ်ဝန်း
မှလုပ်ငန်းရှင်များနှင့်ပူးပေါင်း၍ဈေးကွက်လက်လှမ်းမီမှုကိုကျယ်ပြန့်စေရန်၊ ပူးပေါင်းထုတ်လုပ်ရန်နှင့်အပြန်အလှန်အင်အားဖြည့်တင်းပေးကြရန်ဖြစ်သည်။
WAVES 2025 ကို အပိုင်း (၉) ပိုင်းဖြင့်ကျင်းပရာ နိုင်ငံတော်ဝန်ကြီးချုပ်မိုဒီနှင့် ကမ္ဘာ့ထိပ်တန်းအမှုဆောင်အရာရှိချုပ်များ၏စားပွဲဝိုင်းဆွေးနွေးပွဲသည် လွန်စွာမှ အရေးပါသကဲ့သို့ ကမ္ဘာတစ်ဝန်းမှ ပြည်ထောင်စုဝန်ကြီးများနှင့်မီဒီယာနှင့်ဖျော်ဖြေရေးလုပ်ငန်းမှထိပ်တန်းမူဝါဒချမှတ်သူများ၏ ဂလိုဘယ်မီဒီယာဒိုင်ယာလော့ဂ်သည်လည်း စိတ်ဝင်စားဖွယ် ကောင်းလှသည်။ ပြပွဲ၊ပြိုင်ပွဲများလည်း ပါဝင်ပြီး တပြိုင်တည်း နေရာခွဲ၍ကျင်းပခြင်းဖြစ်ရာ သက်ဆိုင်ရာ၊ စိတ်ဝင်စားရာ နေရာဌာန များသို့ ပါဝင်တက်ရောက် ဆွေးနွေး ကြည့်ရှုနိုင်ကြသည်။ ဖျော်ဖြေရေး အစီအစဉ်များသည်လည်း အံမခန်းပင်။
အခမ်းအနား၌ဝန်ကြီးချုပ်နရင်ဒြာမိုဒီက အိန္ဒိယရုပ်ရှင်သည်နိုင်ငံကိုကမ္ဘာနှင့်ချိတ်ဆက်မိစေကြောင်း၊ ဤအခမ်းအနားကြီး၌ပါရမီရှင်များပူးပေါင်း၍ စိတ်ကူးစိတ်သန်းအသစ်များကို ဖန်တီးကြလိမ့်မည်ဟုယုံကြည်ပါကြောင်း၊ WAVES ဆိုသောစကားလုံးသည် အတိုကောက် စကားလုံး သက်သက်မျှသာ မဟုတ်ဘဲအနက်ရင်းဖြစ်သော လှိုင်းကိုလည်းရည်ညွှန်ပါကြောင်း၊ ဖန်တီးသူနှင့်တီထွင်သူ တစ်သိန့်ခန့် WAVES တွင် ပါဝင်ကြောင်းတိုကို သူ၏အဖွင့်မိန်ခွန်း၌ထည့်သွင်းပြောကြားခဲ့သည်။ လှိုင်းဟူသည် စွမ်းအင်ကြီးမားသဖြင့် WAVES 2025 သည် အိန္ဒြိယ ကို မီဒီယာနှင့်ဖျော်ဖြေရေးလုပ်ငန်း၏ ဗဟိုအချက်အခြာဌာနဖြစ်ပေါ်လာမည်ဟု ယုံကြည်ပါကြောင်းနှင့် ဖြစ်လာစေရန်လည်းဆန္ဒပြုအပ်ပါကြောင်း။