မွန်ပြည်နယ်၊ မော်လမြိုင်မြို့၊ စျေးကြိုရပ်ကွက်၊ ဥယျာဥ်လမ်းတွင် ဇူလိုင်လ ၁၉ ရက်(ယနေ့) နံနက် ၅ နာရီ ၄၅ မိနစ်ခန့်မှစတင်ကာ နေအိမ်များအတွင်းသို့ ရေဝင်ရောက်မှုများဖြစ်ပေါ်လျက်ရှိကြောင်း ဒေသခံလူမှုကူညီရေးအသင်းများထံမှ သိရသည်။
မော်လမြိုင်မြို့အတွင်း ဇူလိုင်လ ၁၇ ရက်မှစတင်ကာ မိုးသည်းထန်စွာရွာသွန်းမှုကြောင့် နေအိမ်များအတွင်းသို့ ရေများဝင်ရောက်လျက်ရှိသဖြင့် ရေဝင်ရောက်မှုများပြားသည့် စျေးကြိုရပ်ကွက်၊ ဥယျာဥ်လမ်းအတွင်း နေထိုင်သူများအား မော်လမြိုင်မြို့မီးသတ်ဦးစီးမှူးရုံးမှ တပ်ဖွဲ့ဝင်များ၊ လုံခြုံရေးအဖွဲ့ဝင်များ၊ တာဝန်ရှိသူများနှင့် လူမှုကူညီရေးအသင်းဝင်များက ရေဘေးလွတ်ရာသို့ ရွှေ့ပြောင်းပေးလျက်ရှိကြောင်း သိရသည်။
” မိုးက ဆက်တိုက်ရွာနေတာ။ အတော်သည်းသည်းကို ရွာတာ။ အခုထိလည်း ရွာနေတုန်းပဲ။ အခု စျေးကြိုရပ်ကွက်က အိမ်တွေတင် ရေမြုပ်တာမဟုတ်ဘူး။ တချို့ အနိမ့်ပိုင်းရပ်ကွက်က အိမ်တွေထဲလည်း ရေဝင်နေပြီလို့ ကြားတယ်။ ဒီကရွှေ့ပြောင်းတာတွေပြီးရင် အဲဒီဘက်တွေ ထပ်သွားကူရမယ်” ဟု ဒေသခံလူမှုကူညီရေးအသင်းဝင်တစ်ဦးက ပြောကြားသည်။
လက်ရှိအချိန်၌ မော်လမြိုင်မြို့ရှိ မြိုင်သာယာ၊ ဖက်ခင်း၊ ဇေယျာမြိုင်၊ ရွှေပြည်အေး၊ ဇေယျာ(၁)၊ (၂)၊ ဒိုက်ဝန်းကွင်း၊ တောင်ဝိုင်းရပ်၊ ကျွဲခြံကုန်း၊ ဒေါင်းမင်းရပ်၊ သီရီမြိုင်နှင့် မုပွန်ရပ်ကွက်တို့တွင်လည်း နေအိမ်များအတွင်းသို့ ရေဝင်ရောက်လျက်ရှိကြောင်း သိရသည်။
