“မိုခါ”မုန်တိုင်းဒဏ်ခံခဲ့ရသည့် မြန်မာနိုင်ငံမှ ပြည်သူများအတွက် ကိုရီးယားနိုင်ငံ၊ဆိုးလ်မြို့အခြေစိုက် THL Networks Co., Ltd. နှင့် The Asian Union Forum တို့က အလှူငွေ ဝမ် ၂ သန်းအား လှူဒါန်းခဲ့ကြောင်း ကိုရီးယားနိုင်ငံဆိုင်ရာ မြန်မာသံရုံးမှ သိရသည်။
မုန်တိုင်းဒဏ်သင့် ပြည်သူများ၏ ပြန်လည်ထူထောင်ရေးလုပ်ငန်းများဆောင်ရွက်ရာတွင် အထောက်အကူပြုစေရန်ရည်ရွယ်၍ ဆိုးလ်မြို့အခြေစိုက် THL Networks Co., Ltd ဥက္ကဋ္ဌ Mr. Cheong Sang-Jin က အလှူငွေ ကိုရီးယားဝမ် (၁) သန်းနှင့် The Asian Union Forum က အလှူငွေ ဝမ် (၁) သန်း(စုစုပေါင်း ဝမ် ၂ သန်း)အား လှူဒါန်းခဲ့ကြခြင်း ဖြစ်သည်။
အဆိုပါ အလှူငွေများအား ကိုရီးယားနိုင်ငံဆိုင်ရာ မြန်မာသံရုံး၊ ဆိုးလ်မြို့တွင် ယနေ့ မေ (၂၉) ရက်တွင် လာရောက်လှူဒါန်းရာ မြန်မာသံအမတ်ကြီး ဦးသန့်စင်က လက်ခံရယူခဲ့ပြီး ကျေးဇူးတင်လွှာများ ပြန်လည်ပေးအပ်ခဲ့ကြောင်း သိရသည်။
သံအမတ်ကြီး ဦးသန့်စင်မှ မုန်တိုင်းကြောင့် ထိခိုက်ဆုံးရှုံးခဲ့ရမှုများကို ရှင်းလင်းပြောကြားခဲ့ပြီး အလှူငွေများအား မြန်မာနိုင်ငံသို့ ဆက်လက်လွှဲပြောင်းပေးအပ်သွားမည်ဟု ပြောကြားခဲ့သည်။
