မိုခါဒဏ်သင့်ဒေသများသို့ကူညီမူများကို ကုန်သည်စက်မှုအသင်းချုပ်မှ တစ်ဆင့် လှူဒါန်းခဲ့သော အလှူရှင်များအား ဂုဏ်ပြုလွှာပေးအပ်

မြန်မာနိုင်ငံတွင် ၂၀၂၃ ခုနှစ်၊ မေလ ၁၄ ရက်နေ့တွင် မိုခါဆိုင်ကလုန်းမုန်တိုင်း ဝင်ရောက် တိုက်ခတ်ခဲ့ပြီးနောက် ထိခိုက်ပျက်စီးခဲ့သည့် မိုခါမုန်တိုင်းဒဏ်သင့် ဒေသများသို့ အချိန်မီလှူဒါန်းနိုင်ရေးအတွက် UMFCCI အသင်းချုပ်အနေဖြင့် Task Force ဖွဲ့စည်း၍ဆောင်ရွက်ခဲ့ရာ အမိုးသွပ်ပြားများ၊ သွပ်ရိုက်သံများ၊ ဆန်၊ ဆီ၊ ငါးသေတ္တာစည်သွပ်ဗူးများ၊ ခေါက်ဆွဲခြောက်များ၊ ဆေးဝါးများ၊ သောက်ရေသန့်များ၊ လူသုံးကုန်ပစ္စည်းများနှင့် အလှူငွေများကို ပြည်တွင်း၊ ပြည်ပအလှူရှင်များမှ စေတနာသဒ္ဓါတရားထက်သန်စွာဖြင့်အသင်းချုပ်မှတစ်ဆင့် ထိရောက်စွာလှူဒါန်းနိုင်ခဲ့သည်။

အလှူပစ္စည်းများ ကုန်သည် စက်မှုအသင်းချုပ်မှတစ်ဆင့် လှူဒါန်းခဲ့သော အသင်းချုပ် ဗဟိုအလုပ် အမှုဆောင်များ၊ အလုပ်အမှုဆောင်များ၊ ညီနောင်အသင်းအဖွဲ့များ၊ စီးပွားရေးလုပ်ငန်းရှင်များနှင့် ပြည်တွင်းပြည်ပမှ အလှူရှင်များကို ကျေးဇူးတင်ဂုဏ်ပြုသည့်အနေဖြင့် ဂုဏ်ပြုလွှာများ ပေးအပ်ချီးမြှင့်ခြင်း အခမ်းအနား ကို ၂၀၂၃ ခုနှစ်၊ ဩဂုတ်လ ၁၁ ရက်နေ့ ညနေပိုင်းတွင် ရန်ကုန်မြို့ရှိ Pan Pacific Hotel ၌ ကျင်းပခဲ့သည်။

အခမ်းအနားတွင် အသင်းချုပ်ဥက္ကဋ္ဌ ဦးအေးဝင်းက မိမိတို့ ကုန်သည်စက်မှုအသင်းချုပ်မှတစ်ဆင့် မုန်တိုင်းဒဏ်သင့်ဒေသများမှ ပြည်သူများအတွက် အသင်းချုပ်မှ မတည် လှူဒါန်းငွေ ကျပ်သိန်း (၂,၀၀၀) အပါအဝင် ငွေသားကျပ်သိန်း (၆,၀၀၀) ကျော်နှင့်ပစ္စည်းတန်ဖိုး ကျပ်သိန်း (၃,၂၀၀) ကျော် လက်ခံရရှိခဲ့ပြီး မုန်တိုင်းဒဏ်သင့်ဒေသမှာရှိတဲ့ ပြည်သူများထံ အချိန်မီ ပေးပို့နိုင်ခဲ့ကြောင်းပြောသည်။

“အားလုံး၏ကူညီပံ့ပိုးမှုများဖြင့် မုန်တိုင်းဒဏ်သင့်ပြည်သူများ ရင်ဆိုင်ကြုံတွေ့ရသည့်အခက်အခဲများကို တတ်စွမ်းသရွေ့ လုပ်ပေးနိုင်ခဲ့ပါတယ်။ ဒီလိုလှူဒါန်းထားတဲ့ပစ္စည်းများကို လက်ခံရရှိခဲ့တဲ့ ပြည်သူများအနေနဲ့လည်း လက်တွေ့အသုံးဝင်ပြီး လိုအပ်တဲ့အချိန်မှာ ရရှိတဲ့အတွက်လည်း ကျေးဇူးတင်ဝမ်းသာကြမယ်လို့ ယုံကြည်ပါတယ်” ဟု၄င်းကပြောကြားခဲ့သည်။

ဆက်လက်၍ မိုခါမုန်တိုင်းကြောင့် ဖြစ်ပေါ်လာသောထိခိုက်မှုများအား ကူညီပံ့ပိုးပေးရေးအတွက် UMFCCI Task Force ဥက္ကဋ္ဌဖြစ်သူ အသင်းချုပ် ဒုတိယဥက္ကဋ္ဌ ဒေါက်တာဝင်းစည်သူက Task Force ၏ လှုပ်ရှားဆောင်ရွက်ခဲ့မူများနှင့် အလှူငွေစာရင်းရှင်းတမ်းများကို ရှင်းလင်းပြောကြားခဲ့ပြီးနောက် အလှူရှင်များကိုယ်စား မြန်မာနိုင်ငံအထည်ချုပ်လုပ်ငန်းရှင်များအသင်း ဥက္ကဋ္ဌ ဦးမြင့်စိုးက မုဒိတာ စကားပြောကြားခဲ့ပါသည်။

ယင်းနောက် အလှူရှင်များအား အသင်းချုပ်ဥက္ကဋ္ဌ ဦးအေးဝင်းက ဂုဏ်ပြုလွှာများ ပေးအပ်ချီးမြှင့်ခဲ့ပါသည်။

အသင်းချုပ်သည် မိုးလေဝသနှင့် ဇလဗေဒညွှန်ကြားမှုဦးစီးဌာနက သတင်း ထုတ်ပြန်ချက်များအပေါ်မူတည်၍ လိုအပ်သည့် ကြိုတင်ပြင်ဆင်မှုများ ဆောင်ရွက်နိုင်ရေးနှင့် သဘာဝ ဘေးအန္တရာယ် ကျရောက်မှုဖြစ်ပေါ်ပါက သက်ဆိုင်ရာ ညီနောင်အသင်းများ၊ စီးပွားရေး လုပ်ငန်းရှင်များ၊ လုပ်ငန်းကဏ္ဍအသီးသီးတွင် လုပ်ကိုင်ဆောင်ရွက်နေကြသူများ၊ တောင်သူ လယ်သမားများ အချိန်မီကြိုတင်ပြင်ဆင်ထားနိုင်ရေး၊ မုန်တိုင်းအန္တရာယ်ကြောင့် အခြေခံ စားသောက်ကုန်နှင့် ဆေးဝါးများဈေးနှုန်းမြင့်တက်ခြင်း၊ ဈေးကစားခြင်းနှင့် ဈေးကွက်အတွင်း ပစ္စည်းပြတ်လပ်မှုများ မဖြစ်ပေါ်စေရေးတို့အတွက် အချိန်နှင့်တပြေးညီ သတင်းထုတ်ပြန်ချက်များ ထုတ်ပြန်ပေးခြင်း၊ မုန်တိုင်းအန္တရာယ် ကြိုတင်ကာကွယ်ရေးနှင့်ပျက်စီးဆုံးရှုံးမှုများ လျော့နည်းနိုင်သမျှ လျော့နည်းစေရေး အတွက် ညီနောင်အသင်းများ၊ စက်မှုဇုန်များမှ တာဝန်ရှိသူများနှင့် တွေ့ဆုံ၍ ပူးပေါင်းဆောင်ရွက်ခဲ့ကြောင်းသိရသည်။

ဓါတ်ပုံ-UMFCCI