နေပြည်တော်၊ဒက္ခိဏသီရိမြို့နယ် ၌တည်ထားလျက်ရှိသည့် ကမ္ဘာပေါ်ရှိထိုင်တော်မူ ကျောက်ဆစ်ဗုဒ္ဓရုပ်ပွားတော်များအနက် ဥာဏ်တော်အမြင့်ဆုံးဖြစ်လာမည့် မာရဝိဇယဗုဒ္ဓရုပ် ပွားတော်မြတ်ကြီး တည်ဆောက်ပြီးစီးမှုကို နစက ဥက္ကဋ္ဌက ဇူလိုင် ၁၆ ရက်နံနက်ပိုင်းတွင်ယာယီသမ္မတဦးမြင့်ဆွေ၊သမ္မတ (ငြိမ်း)ဦးသိန်းစိန်နှင့်တပ်မတော်အငြိမ်းစားအရာရှိကြီးများအား ရှင်းလင်းပြသခဲ့သည်။
နစက ဥက္ကဋ္ဌမှ မာရဝိဇယဗုဒ္ဓရုပ်ပွားတော်မြတ်ကြီးအား တည်ထားကိုးကွယ်ရသည့် ရည်ရွယ် ချက်(၄)ရပ်၊ကျောက်တုံးတော်ကြီးတူးဖော်ခြင်း၊အဆင့်ဆင့်သယ်ယူခြင်း၊ကျောက်တုံးတော်ကြီးအား ရတနာပုံခေတ်ဟန် ဘူမိဖဿမုဒြာ ဆင်းတုတော်ကြီးအဖြစ် တည်ထားကိုးကွယ်ရန်ဆောင်ရွက်ခဲ့မှုတို့ကိုရှင်းလင်းပြသခဲ့သည်။
ထို့ပြင် မာရဝိဇယ ဗုဒ္ဓဥယျာဥ်တော်တည်ဆောက်နေမှု၊တည်ဆောက်ရေးလုပ်ငန်းများအား နိုင်ငံတော် သံဃာ့ မဟာနာယက ဆရာတော်ကြီးများထံမှ သြဝါဒခံယူဆောင်ရွက်ခဲ့မှု၊ဆဋ္ဌသင်္ဂါယနာမူ ပိဋကတ်ကျမ်းစာများကို စကျင်ကျောက်ချပ်များပေါ်၌ ခေတ်မီစက်ကိရိယာများအသုံးပြု၍ ပါဠိအက္ခရာ၊ Romanize Language တို့ဖြင့် ကျောက်စာတော်များ တည်ထားနေမှုနှင့်ဆောင်ရွက်လျက်ရှိသည့် အခြေအနေများအား ရှင်းလင်းပြသခဲ့သည်။
ထို့အတူ ဗုဒ္ဓါဘိသေကအနေကဇာတင်အခမ်း အနားကျင်းပရန် ပြင်ဆင်နေမှုများနှင့်ဘုရားကြီးတည်ဆောက်ပြီးစီးပါက တွေ့ရှိရမည့်အခြေအနေများကိုလည်း ရှင်းလင်းပြသခဲ့သည်။
ထို့ပြင် ကြားဖြတ်အစီအစဥ်အရ အခမ်းအနားတက်ရောက်လာကြသူများက မာရဝိဇယဗုဒ္ဓရုပ်ပွားတော်မြတ်ကြီးနှင့်မာရဝိဇယဗုဒ္ဓဥယျာဥ် တည်ဆောက်ခြင်းအတွက် အလှူငွေများပေးအပ်လှူဒါန်းရာ နစက ဥက္ကဋ္ဌကလက်ခံရယူခဲ့သည်။
ထို့နောက် နစက ဥက္ကဋ္ဌနှင့်ဇနီး၊တက်ရောက်လာကြသူများက လုမ္ဗိနီအင်ကြင်းပင်များကို စုပေါင်းစိုက်ပျိုးပြီးနောက် မာရဝိဇယဗုဒ္ဓရုပ်ပွားတော်မြတ်ကြီးနှင့်မာရဝိဇယဗုဒ္ဓဥယျာဥ်တော်အတွင်း လှည့်လည်ကြည့်ရှုဖူးမြှော်ခဲ့ကြကြောင်း သိရသည်။
