အမေရိကန်က ဖမ်းဆီးထားသော ဗင်နီဇွဲလားသမ္မတ နီကိုးလက်စ် မာဒူရိုနှင့် ၎င်း၏ဇနီးတို့ကို “မဆိုင်းမတွဘဲ ချက်ချင်းပြန်လွှတ်ပေးရန်” မလေးရှားဝန်ကြီးချုပ် အန်ဝါ အီဘရာဟင်က တနင်္ဂနွေနေ့တွင် တောင်းဆိုလိုက်သည်။
“ဗင်နီဇွဲလားနိုင်ငံရဲ့ ဖြစ်ပေါ်တိုးတက်မှုတွေကို ကျွန်တော် အလွန်စိုးရိမ်တကြီး စောင့်ကြည့်နေပါတယ်။ ဗင်နီဇွဲလားခေါင်းဆောင်နဲ့ သူ့ရဲ့ဇနီးကို အမေရိကန်စစ်တပ်က ပုံမှန်မဟုတ်တဲ့ နယ်ပယ်နဲ့ ပုံစံမျိုးနဲ့ စစ်ဆင်ရေးလုပ်ပြီး ဖမ်းဆီးခေါ်ဆောင်သွားခဲ့တာ ဖြစ်ပါတယ်” ဟု အန်ဝါက X လူမှုကွန်ရက် (ယခင် Twitter) တွင် ပြောကြားခဲ့သည်။
ထိုသို့သော ပြုလုပ်မှုသည် “အပြည်ပြည်ဆိုင်ရာ ဥပဒေကို ပြောင်ပြောင်တင်းတင်း ချိုးဖေ-ာက်ခြင်းဖြစ်ပြီး အချုပ်အခြာအာဏာပိုင် နိုင်ငံတစ်ခုအပေါ် တရားမဝင် အင်အားသုံး အနိုင်ကျင့်ခြင်း ဖြစ်သည်” ဟု အန်ဝါက အလေးပေး ပြောကြားခဲ့ပြီး “သမ္မတ မာဒူရိုနဲ့ olYရဲ့ဇနီးတို့ကို မဆိုင်းမတွဘဲ ချက်ချင်း ပြန်လွှတ်ပေးရမယ်” ဟု ဆိုသည်။
လက်ရှိအာဏာရ အစိုးရခေါင်းဆောင်တစ်ဦးကို ပြင်ပမှ ဝင်ရောက်စွက်ဖက်ပြီး “အတင်းအဓမ္မ ဖယ်ရှားခြင်း” သည် နိုင်ငံများအကြား အင်အားသုံးစွဲမှုအပေါ် ထိန်းကျောင်းထားသည့် အခြေခံစည်းမျဉ်းများကို ပျ-က်ပြားစေပြီး နိုင်ငံတကာ အစီအစဉ်များကို ထောက်ကူထားသည့် ဥပဒေဘောင်ကို အားနည်းစေကြောင်း သူကမှတ်ချက်ပြုခဲ့သည်။
“မိမိတို့ရဲ့ နိုင်ငံရေးအနာဂတ်ကို ကိုယ်တိုင်ဆုံးဖြတ်ဖို့က ဗင်နီဇွဲလား ပြည်သူတွေရဲ့ ကိစ္စပဲ ဖြစ်ပါတယ်” ဟု မလေးရှားဝန်ကြီးချုပ်က ဆိုသည်။
“မလေးရှားနိုင်ငံအနေနဲ့ အပြည်ပြည်ဆိုင်ရာ ဥပဒေနဲ့ အချုပ်အခြာအာဏာကို လေးစားလိုက်နာခြင်းဟာ နိုင်ငံများအကြား ငြိမ်းချမ်းစွာ ဆက်ဆံရေးအတွက် အဓိကကျတယ်လို့ ယူဆပါတယ်။ အပြုသဘောဆောင်တဲ့ ထိတွေ့ဆက်ဆံမှု၊ တွေ့ဆုံဆွေးနွေးမှုနဲ့ တင်းမာမှုလျှော့ချခြင်းတွေဟာ အရပ်သားတွေကို အကာအကွယ်ပေးပြီး ဗင်နီဇွဲလားပြည်သူတွေရဲ့ တရားဝင် မျှော်မှန်းချက်တွေကို ထိခိုက်နစ်နာမှုမရှိဘဲ ဖော်ဆောင်နိုင်မယ့် အခိုင်မာဆုံး လမ်းစဉ်ဖြစ်ပါတယ်” ဟုလည်း သူက ဆက်လက်ပြောကြားခဲ့သည်။