ဗင်နီဇွဲလား အတိုက်အခံခေါင်းဆောင် မာရီယာ ကိုရီနာ မာချာဒိုသည် အိမ်ဖြူတော်တွင် ပြုလုပ်သည့် တွေ့ဆုံပွဲ၌ သူမ၏ နိုဘယ်လ်ငြိမ်းချမ်းရေးဆု တံဆိပ်ကို သမ္မတ ဒေါ်နယ်ထရမ့်ထံ ပေးအပ်ခြင်းအား ထရမ့်က လက်ခံကြောင်း အိမ်ဖြူတော်က တရားဝင်ကြေညာလိုက်ပြီဖြစ်သည်။
ထရမ့်အနေဖြင့် ထိုတံဆိပ်ကို သိမ်းဆည်းထားရန် ရည်ရွယ်ထားကြောင်း အိမ်ဖြူတော် အရာရှိတစ်ဦးက အတည်ပြု ပြောကြားခဲ့သည်။
ထရမ့်နှင့် ပထမဆုံးအကြိမ် လူကိုယ်တိုင် တွေ့ဆုံပြီးနောက် “ဒီနေ့ဟာ ကျွန်မတို့ ဗင်နီဇွဲလားပြည်သူတွေအတွက် သမိုင်းဝင်နေ့တစ်နေ့လို့ ထင်ပါတယ်” ဟု သူမက ဆိုသည်။
အမေရိကန်တပ်ဖွဲ့များက ဗင်နီဇွဲလားသမ္မတ နီကိုးလပ်စ် မာဒူရို ကို ကာရာကပ်စ်မြို့၌ ဖမ်းဆီးထိန်းသိမ်းပြီးနောက် သီတင်းပတ်များအတွင်း ထရမ့်သည် ၂၀၂၄ ခုနှစ် အငြင်းပွားဖွယ်ရာ ရွေးကောက်ပွဲတွင် အနိုင်ရသည်ဟု ကြေညာထားသော မာချာဒို၏ လှုပ်ရှားမှုကို အသိအမှတ်ပြု ထောက်ခံရန် ငြင်းဆန်ထားသည်။ ထရမ့်သည် မာဒူရို၏ ဒုတိယသမ္မတဟောင်းဖြစ်သူ လက်ရှိယာယီအစိုးရခေါင်းဆောင် ဒဲလ်စီ ရိုဒရီဂွက်ဇ်နှင့်သာ ဆက်သွယ်ဆောင်ရွက်လျက်ရှိသည်။
နောက်ပိုင်းတွင် သူမက အင်္ဂလိပ်ဘာသာဖြင့် သတင်းထောက်များကို ပြောကြားရာ၌ “ကျွန်မ အမေရိကန်သမ္မတကို နိုဘယ်လ်ငြိမ်းချမ်းရေး ဆုတံဆိပ် ပေးအပ်ခဲ့ပါတယ်။ ဒါဟာ ကျွန်မတို့ရဲ့ လွတ်မြောက်မှုအပေါ် သူရဲ့ ထူးခြားတဲ့ ကတိကဝတ်ပြုမှုကို အသိအမှတ်ပြုခြင်း ဖြစ်ပါတယ်” ဟု ဆိုသည်။
မာချာဒိုက သူမ၏ဆုကို ထရမ့်နှင့် မျှဝေမည်ဟု ပြီးခဲ့သည့်အပတ်က ပြောကြားခဲ့သော်လည်း နိုဘယ်လ်ကော်မတီကမူ ထိုဆုသည် လွှဲပြောင်းပေး၍မရကြောင်း ရှင်းလင်းထားသည်။ ကော်မတီက “နိုဘယ်လ်ဆုကို တစ်ကြိမ်ကြေညာပြီးရင် ပြန်လည်ရုပ်သိမ်းတာ၊ ခွဲဝေတာ ဒါမှမဟုတ် တခြားသူထံ လွှဲပြောင်းပေးအပ်တာမျိုး လုပ်လို့မရပါဘူး။ ဒီဆုံးဖြတ်ချက်ဟာ အတည်ဖြစ်ပြီး ထာဝရ တည်မြဲနေမှာပါ” ဟု ကြေညာချက် ထုတ်ပြန်ခဲ့သည်။