ဗင်နီဇွဲလား အတိုက်အခံခေါင်းဆောင် မာရီယာ ကိုရီနာ မာချာဒိုက သူမ ရရှိထားသည့် ၂၀၂၅ ခုနှစ်အတွက် ငြိမ်းချမ်းရေးနိုဘယ်လ်ဆုကို အမေရိကန်သမ္မတ ဒေါ်နယ်ထရမ့်အား လွှဲပြောင်းပေးအပ်နိုင်ခြေရှိကြောင်း ပြောဆိုခဲ့ပြီးနောက်၊ နိုဘယ်လ်ဆုကို အခြားသူထံ လွှဲပြောင်းခြင်း၊ မျှဝေခြင်း သို့မဟုတ် ပြန်လည်ရုပ်သိမ်းခြင်းတို့ ပြုလုပ်၍မရကြောင်း နော်ဝေနိုဘယ်ဆုချီးမြှင့်ရေးကော်မတီက အစီရင်ခံစာထုတ်ပြန်ခဲ့သည်။
နိုဘယ်လ်ဖောင်ဒေးရှင်း၏ ပြဋ္ဌာန်းချက်များအရ နိုဘယ်လ်ဆု ချီးမြှင့်ရန် ဆုံးဖြတ်ချက်သည် အပြီးအပြတ်ဖြစ်ပြီး အယူခံဝင်၍မရသကဲ့သို့ ပြင်ဆင်၍လည်း မရကြောင်း အဆိုပါအစီရင်ခံစာတွင် ဖော်ပြထားသည်။ ထို့အပြင် ဆုရွေးချယ်ရေး ကော်မတီများအနေဖြင့် ဆုရရှိသူများ၏ နောက်ပိုင်းလုပ်ရပ်များ သို့မဟုတ် ပြောကြားချက်များအပေါ် မည်သို့မျှ မှတ်ချက်ပေးလေ့မရှိကြောင်းလည်း မှတ်ချက်ပြုခဲ့သည်။
“နိုဘယ်လ်ဆုကို တစ်ကြိမ် ကြေညာပြီးသွားပြီဆိုရင် ရုပ်သိမ်းလို့မရသလို၊ တခြားသူကို မျှဝေတာ ဒါမှမဟုတ် လွှဲပြောင်းပေးအပ်တာမျိုး လုပ်လို့မရပါဘူး” ဟု နော်ဝေနိုဘယ်လ်ကော်မတီနှင့် နော်ဝေနိုဘယ်လ်အင်စတီကျုတို့က သောကြာနေ့တွင် ပူးတွဲထုတ်ပြန်ခဲ့သည်။ “ဒီဆုံးဖြတ်ချက်ဟာ အပြီးသတ်ဖြစ်ပြီး အစဉ်အမြဲ တည်ရှိနေမှာပါ” ဟုလည်း ဆိုသည်။
ပြီးခဲ့သည့် တနင်္လာနေ့က Fox News ရုပ်သံလိုင်းမှ ရှောင်ဟန်နတီနှင့် တွေ့ဆုံမေးမြန်းခန်းတွင် မာချာဒိုက ပြောကြားရာ၌၊ ပြီးခဲ့သည့်အပတ်က အမေရိကန်၏ ဖမ်းဆီးခြင်းကို ခံခဲ့ရသော ဗင်နီဇွဲလားသမ္မတ နီကိုးလက်စ် မာဒူရိုကို ရာထူးမှ ဖယ်ရှားပေးနိုင်ခဲ့သည့်အတွက် ဗင်နီဇွဲလားပြည်သူများ၏ ကျေးဇူးတင်ရှိမှုတစ်ရပ်အနေဖြင့် ထရမ့်အား ဤဆုကို ပေးအပ်လိုခြင်းဖြစ်ကြောင်း ပြောခဲ့သည်။
“ခင်ဗျားအနေနဲ့ သူ့ကို (ထရမ့်ကို) နိုဘယ်လ်ငြိမ်းချမ်းရေးဆုပေးဖို့ ကမ်းလှမ်းခဲ့တာ ရှိပါသလား။ အဲဒါ တကယ်ပဲ ဖြစ်ခဲ့တာလား” ဟု ဟန်နတီက မေးမြန်းရာတွင်မူ မာချာဒိုက “အင်း… အဲဒါက အခုထိတော့ မဖြစ်သေးပါဘူး” ဟု ပြန်လည်ဖြေကြားခဲ့သည်။
နိုဘယ်လ်ဆုရရှိရန် ကာလရှည်ကြာ ဆန္ဒရှိခဲ့ပြီး ၎င်း၏ သံတမန်ရေးရာ အောင်မြင်မှုများနှင့် ဆက်စပ်ကာ ဆုရရှိသင့်ကြောင်း ရံဖန်ရံခါ ပြောဆိုလေ့ရှိသည့် ထရမ့်ကမူ၊ လာမည့်အပတ် ဝါရှင်တန်ဒီစီတွင် ပြုလုပ်မည့် တွေ့ဆုံပွဲ၌ မာချာဒိုက အဆိုပါဆုကို သူ့အားပေးရန်ကမ်းလှမ်းလာပါက လက်ခံရရှိသည့်အတွက် ဂုဏ်ယူမိမည်ဖြစ်ကြောင်း ပြောကြားခဲ့သည်။