နယ်စပ်ဂိတ်များဖွင့်လှစ်၍ တရားဝင်ကုန်သွယ်မှုမြှင့်တင်ခြင်းက နိုင်ငံဖွံ့ဖြိုးတိုးတက်ရေးအတွက် များစွာအကျိုးဖြစ်ထွန်းမည်ဟု နိုင်ငံတော်သမ္မတ ပြော
အိန္ဒိယ–မြန်မာ–ထိုင်း သုံးနိုင်ငံအဝေးပြေးလမ်းမကြီးစီမံကိန်းနှင့် ကုလားတန်မြစ်ကြောင်း ဘက်စုံသုံးဖြတ်သန်းသယ်ယူပို့ဆောင်ရေးစီမံကိန်းဆိုင်ရာ ညှိနှိုင်းအစည်းအဝေးကို ဇူလိုင် ၉ ရက်က ကျင်းပရာ နိုင်ငံတော်သမ္မတ ဦးမင်းအောင်လှိုင်က နယ်စပ်ဂိတ်များ ဖွင့်လှစ်၍ တရားဝင်ကုန်သွယ်မှုများ ဆောင်ရွက်ခြင်းသည် နိုင်ငံဖွံ့ဖြိုးတိုးတက်ရေးအတွက် များစွာအကျိုးဖြစ်ထွန်းစေမည်ဖြစ်ကြောင်း ပြောကြားခဲ့သည်။
နိုင်ငံတော်သမ္မတက နယ်စပ်ဂိတ်များဖွင့်လှစ်ကာ တရားဝင်ကုန်သွယ်မှုများ ဆောင်ရွက်နိုင်ရေးသည် နိုင်ငံ့စီးပွားရေးဖွံ့ဖြိုးတိုးတက်မှုအတွက် အရေးပါကြောင်း၊ သက်ဆိုင်ရာ စီမံကိန်းလမ်းကြောင်းများ၏ လုံခြုံရေးဆိုင်ရာ လိုအပ်ချက်များကို ဆောင်ရွက်ပြီးသည်နှင့် တည်ဆောက်ရေးလုပ်ငန်းများကို တစ်ပြိုင်နက် အကောင်အထည်ဖော် ဆောင်ရွက်သင့်ကြောင်း ပြောကြားသည်။
ထို့ပြင် နိုင်ငံ့စီးပွားရေးဖွံ့ဖြိုးတိုးတက်စေရေးအတွက် အကောင်အထည်ဖော်နေသည့် စီမံကိန်းကြီးများကို နိုင်ငံရေး၊ အုပ်ချုပ်ရေး၊ ကာကွယ်ရေးနှင့် စီးပွားရေးစသည့် ရှုထောင့်မျိုးစုံမှ သုံးသပ်ဆောင်ရွက်ရမည်ဖြစ်ပြီး စီမံကိန်းများ၏ အကျိုးသက်ရောက်မှုနှင့် စိန်ခေါ်မှုများကိုလည်း ကောင်းစွာနားလည်သဘောပေါက်ထားရန် လိုအပ်ကြောင်း ပြောကြားခဲ့သည်။
ထို့အတူ နိုင်ငံဖွံ့ဖြိုးတိုးတက်ရေးအတွက် အကောင်အထည်ဖော်ထားသည့် မဟာဗျူဟာမြောက် လမ်းမကြီးစီမံကိန်းများကို တရားမဝင်ကုန်သွယ်မှုအတွက် အသုံးမချနိုင်စေရန် လိုအပ်သည့် ထိန်းသိမ်းကြပ်မတ်မှုများ ဆောင်ရွက်ထားရမည်ဖြစ်ကြောင်းလည်း နိုင်ငံတော်သမ္မတက အလေးထားပြောကြားခဲ့သည်။
နယ်စပ်ဂိတ်များ စီမံခန့်ခွဲရေးနှင့်ပတ်သက်၍ သက်ဆိုင်ရာ နှစ်နိုင်ငံအစိုးရများကသာ အဓိကတာဝန်ယူ ကြပ်မတ်ကွပ်ကဲရမည်ဖြစ်ပြီး မည်သည့်အဖွဲ့အစည်း သို့မဟုတ် မည်သည့်အခြားနိုင်ငံကမျှ ဝင်ရောက်စွက်ဖက်ခွင့်မရှိကြောင်းလည်း ပြောကြားခဲ့သည်။
အိမ်နီးချင်းနိုင်ငံများနှင့် ချိတ်ဆက်ဆောင်ရွက်နေသည့် စီမံကိန်းများတွင် ပါဝင်သည့် မဟာဗျူဟာမြောက် အဝေးပြေးလမ်းမကြီးများ ဖောက်လုပ်ရေးလုပ်ငန်းများကို မိမိတို့အစိုးရတာဝန်ယူထားသည့် ကာလအတွင်း ရာနှုန်းပြည့်ပြီးစီးနိုင်ရေး အောင်မြင်စွာ အကောင်အထည်ဖော်ဆောင်ရွက်သွားရန်လည်း နိုင်ငံတော်သမ္မတက တိုက်တွန်းမှာကြားခဲ့ကြောင်း သိရသည်။