မရိုးသားသောနည်းနှင့် တိုင်းရင်းဆေး၏ ဂုဏ်ဒြပ်ကိုထိခိုက်အောင်ပြုလုပ်နေမှုများကို ထိရောက်စွာကာကွယ်ဟန့်တားရမည်

မရိုးသားသောနည်းနှင့် တိုင်းရင်းဆေး၏ ဂုဏ်ဒြပ်ကိုထိခိုက်အောင်ပြုလုပ်နေမှုများကို ထိရောက်စွာကာကွယ်ဟန့်တားရမည်ဟု နိုင်ငံတော် ယာယီသမ္မတ၊ နိုင်ငံ တော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်မှ ဒီဇင်ဘာ ၁၆ ရက်ကကျင်းပသည့် (၂၄)ကြိမ်မြောက် မြန်မာ့တိုင်းရင်းဆေးသမားတော်များညီလာခံနှင့် မြန်မာ့တိုင်းရင်းဆေးပညာနှီးနှောဖလှယ်ပွဲသို့ ဗီဒီယိုမိန့်ခွန်းပေးပို့ပြီးပြောကြားခဲ့ခြင်းဖြစ်သည်။ မြန်မာ့တိုင်းရင်းဆေးပညာသည် ရှေးအစဉ်အဆက်မှစကာ ယနေ့အချိန်အထိ နိုင်ငံသားများ၏ ကျန်းမာရေးစောင့်ရှောက်မှုတွင် အရေးပါသည့်အခန်းကဏ္ဍမှပါဝင်လျက်ရှိ၍ အမျိုးသားယဉ်ကျေးမှုအမွေအနှစ်ဖြစ်သော မြန်မာ့တိုင်းရင်းဆေးပညာနှင့် ဆေးဝါးများကိုထိန်း သိမ်းစောင့်ရှောက်မြှင့်တင်ရန်၊ ပြည်သူတစ်ရပ်လုံးကို တိုင်းရင်းဆေးနှင့် ကျန်းမာရေးပိုမိုစောင့်ရှောက်မှုပေးနိုင်ရန်၊ မြန်မာ့တိုင်းရင်းဆေးများ အဆင့်အတန်းမြင့်စေရန်အတွက် တိုင်းရင်းဆေးတက္ကသိုလ်ကြီးကိုဖွင့်လှစ်ပြီး မျိုးဆက်သစ်တိုင်းရင်းဆေးပညာရှင်များကို နှစ်စဉ်မွေးထုတ်ပေးလျက်ရှိသည်ဟု ပြောသည်။ ” အခုဆိုရင် တိုင်းရင်းဆေးပညာရပ်တွေ ခေတ်နဲ့အညီ ဖွံ့ဖြိုးတိုးတက်စေဖို့နဲ့ အရည်အသွေးပြည့်ဝတဲ့ တိုင်းရင်းဆေးပညာရှင်တွေ ပိုမိုမွေးထုတ်ပေးနိုင်ဖို့အတွက် ၂၀၂၅ ခုနှစ် ပညာသင်နှစ်ကစပြီး တိုင်းရင်းဆေးပညာပါရဂူဘွဲ့ (ပထမအကြိမ်)သင်တန်းကို ဖွင့်လှစ်နိုင်ခဲ့ပြီးဖြစ်ပါတယ်”ဟု နိုင်ငံတော် ယာယီသမ္မတက ပြော သည်။ ထို့ကြောင့် အများပြည်သူများနေ့စဉ်သုံးစွဲနေသည့် တိုင်းရင်းဆေးဝါးများ ဘေးကင်းလုံခြုံစိတ်ချရပြီး အ ရည်အသွေးနှင့် အာနိသင်ပြည့်ဝသောဆေးဝါးများဖြစ်ရန်လို၍ ဓာတ်ခွဲစစ်ဆေးခြင်းလုပ်ငန်းစဉ်အဆင့်ဆင့်သည်အရေးကြီးသဖြင့် ဓာတ်ခွဲခန်းဝန်ထမ်းများ၏ စွမ်းဆောင်ရည်ကိုမြှင့်တင်ပေးရန်လိုကာ မရိုးသားသောနည်းနှင့် တိုင်းရင်းဆေး၏ ဂုဏ်ဒြပ်ကိုထိခိုက်အောင်ပြုလုပ်နေမှုများကိုလည်း ထိရောက်စွာကာကွယ်ဟန့်တားရမည်ဟု နိုင်ငံတော် ယာယီသမ္မတက ပြော သည်။ ” မြန်မာ့တိုင်းရင်းဆေးဝါးထုတ်လုပ်ရေးလုပ်ငန်းတွေကို အိမ်တွင်းစက်မှုလုပ်ငန်းအဆင့်သာမဟုတ်ဘဲ ဒေသအဆင့်နဲ့ နိုင်ငံတကာအဆင့်မီကုန်ထုတ်လုပ်မှုတိုးမြှင့်ရေးနဲ့ အရည်အသွေးမြင့်ထုပ်ပိုးခြင်းတွေဆောင်ရွက်နိုင်မယ်ဆိုရင် နိုင်ငံ့စီးပွားရေးကိုမြှင့်တင်နိုင်ပြီး ပြည် သူလူထုရဲ့ လူမှုစီးပွားဘဝတိုးတက်လာနိုင်မှာဖြစ်ပါတယ်”ဟု နိုင်ငံတော် ယာယီသမ္မတက ပြောသည်။ ထို့ပြင် မြန်မာနိုင်ငံသည် အာဆီယံအဖွဲ့ဝင်နိုင်ငံဖြစ်၍ အဖွဲ့ဝင်နိုင်ငံများကြားတွင် ကဏ္ဍစုံပူးပေါင်းဆောင်ရွက်နေသကဲ့သို့ တိုင်းရင်းဆေးကဏ္ဍများတွင်လည်း အား တက်သရောပူးပေါင်းပါဝင်ဆောင်ရွက်လျက်ရှိပြီး အာဆီယံစီးပွားရေးအသိုက်အဝန်း၏ တိုင်းရင်းဆေးဝါးနှင့် ကျန်းမာရေးဖြည့်စွက်စာများကဏ္ဍတွင် အဖွဲ့ဝင်နိုင်ငံများကြား ပူးပေါင်းဆောင်ရွက်မှုတိုးမြှင့်ဆောင်ရွက်ရန်၊ နည်းပညာလိုအပ်ချက်များ၊ လမ်းညွှန်ချက်များ တစ်သ မတ်တည်းဖြစ်စေရန်နှင့် ကုန်သွယ်မှုလွယ်ကူချောမွေ့စေရန် ပူးပေါင်းဆောင်ရွက်လျက်ရှိသည်ဟု နိုင်ငံတော် ယာယီသမ္မတက ပြောကြားခဲ့သည်။