မင်းလက်ပံဖြစ်စဥ်သည် KNU ၏ အွန်လိုင်းလိမ်လည်လောင်းကစားမှုများကျူးလွန်ပြီး ၎င်းတို့နှင့်ပတ်သက်မှုမရှိကြောင်းကိုပြသလိုသောလုပ်ကွက်ဖြစ်ဟု ဗိုလ်ချုပ်ဇော်မင်းထွန်းပြော

မင်းလက်ပံ၌ဖြစ်ပွားခဲ့သော ပြည်ပနိုင်ငံသားများကို KNU မှ ပ-စ်ခတ်ခဲ့မှုနှင့်ပတ်သက်ကာ အမျိုးသားကာကွယ်ရေးနှင့်လုံခြုံရေးကောင်စီ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းမှ ယနေ့ ဒီဇင်ဘာ ၁၄ ရက်နံနက် ၁၀ နာရီက ရန်ကုန်မြို့၌ကျင်းပသည့် နိုင်ငံတော်အစိုးရ၏ အမျိုးသားအဆင့် အွန်လိုင်းလိမ်လည်မှု အမြစ်ပြတ်နှိမ်နင်းရေးလုပ်ငန်းစဉ်များနှင့်ပတ်သက်၍ သတင်းစာရှင်းလင်းပွဲတွင်ပြောကြားခဲ့ခြင်းဖြစ်သည်။ “မင်းလက်ပံကိစ္စက KNU အနေနဲ့ အွန်လိုင်းလိမ်လည်မှုတွေကို သူတို့ကျူးလွန်ပြီးနောက်ပိုင်းမှာ အွန်လိုင်းလိမ်လည်မှုနဲ့ သူတို့မပတ်သက်ပါဘူးဆိုတာကို ပြချင်တဲ့လုပ်ကွက်တစ်ခုပဲဖြစ်ပါတယ်။ နိုင်ငံတော်အစိုးရအနေနဲ့ အွန်လိုင်းလိမ်လည်လောင်းကစားမှုတွေကို အမြစ်ပြတ်အောင်ချေမှုန်းနေတဲ့အပေါ်မှာ အာရုံပြောင်းဖို့အတွက်ဖြစ်ပါတယ်။ သူတို့တွေဟာ တစ်ချို့နေရာတွေမှာ ဟန်ပြသိမ်းပိုက်ပြီး သူတို့ထဲထဲဝင်ဝင်ပါဝင်ပတ်သက်နေတဲ့အကြောင်းကို လူမသိအောင်လုပ်ဖို့ ဆောင်ရွက်တာဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။ ထို့ပြင် ပြည်ပနိုင်ငံသံရုံးတစ်ခုမှ မင်းလက်ပံဖြစ်စဥ်တွင် ၎င်းတို့၏ နိုင်ငံသားများ‌ေ-သဆုံးမှုရှိခဲ့သည်ဆိုသော သတင်းကိုလက်ခံရရှိထားကာ မိမိတို့အနေဖြင့် စုံစမ်းဖော်ထုတ်မှုများပြုလုပ်လျက်ရှိပြီး စုံစမ်းဖော်ထုတ်မှုများပြီးစီးပါက ဆက်လက်ဆောင်ရွက်မှုများပြုလုပ်သွားမည်ဟု ပြောသည်။ ထို့အတူ KNU အနေဖြင့် မြန်မာ-ထိုင်းနယ်စပ်တွင် မိမိတို့ဆောင်ရွက်နေသော အွန်လိုင်းလိမ်လည်လောင်းကစားမှုများအား အမြစ်ပြတ်ချေမှုန်းနေခြင်းကိုနှောင့်ယှက်ရန် တို-က်ပွဲဖြစ်စဥ်များဖော်ဆောင်ပြီး မြန်မာနိုင်ငံနှင့် ထိုင်းနိုင်ငံကြား ဆက်ဆံမှုပျက်ပြားစေရန် ထိုင်းနိုင်ငံအတွင်းသို့ ဗုံးသီးများပ-စ်သွင်းခြင်း၊ ကျည်ပ-စ်သွင်းခြင်းများရှိနေသည်ကိုတွေ့ရသည်ဟု ပြောသည်။ “ထိုင်းနိုင်ငံအနေနဲ့ သူတို့ရဲ့နယ်မြေထဲကို ကျည်တွေကျတယ်ဆိုပြီးပြောတယ်။ မြန်မာနိုင်ငံနဲ့ ထိုင်းနိုင်ငံဟာ အိမ်နီးခြင်းနိုင်ငံတွေဖြစ်တယ်။ နှစ်နိုင်ငံနယ်ခြားဒေသတွေနဲ့ပတ်သက်ပြီး အခြေခံအဆင့်အထိ ကော်မတီတွေဖွဲ့စည်းထားပြီးဖြစ်ပါတယ်” ဟု ဗိုလ်ချုပ်ဇော်မင်းထွန်းက ပြောသည်။ ထို့ကြောင့် KNU ၏ မြန်မာ-ထိုင်းနှစ်နိုင်ငံပြဿနာဖြစ်စေရန် ရည်ရွယ်လုပ်ဆောင်နေမှုများအား သက်ဆိုင်ရာကော်မတီများမှတစ်ဆင့် ညှိနှိုင်းဆောင်ရွက်သွားမည်ဟု ဗိုလ်ချုပ်ဇော်မင်းထွန်းက ပြောကြားခဲ့သည်။