ဘားအံ၊ စက်တင်ဘာ ၂
ကရင်ပြည်နယ်၊ ဘားအံမြို့တွင် မိုးသည်းထန်စွာ ဆက်တိုက်ရွာသွန်းမှုကြောင့် သံလွင်မြစ်ရေသည် စိုးရိမ်ရေမှတ်ထက် ၁၁၄ စင်တီမီတာအထိ ကျော်လွန်နေပြီး မြေနိမ့်ပိုင်း ရပ်ကွက်များအတွင်း ရေကြီးရေလျှံမှုများ ဖြစ်ပွားလျက်ရှိသည်။
မြစ်ရေဝင်ရောက်မှုကြောင့် မြေနိမ့်ပိုင်းနေ ဒေသခံများကို ဘေးလွတ်ရာသို့ ပြောင်းရွှေ့ပေးခဲ့ရာ ယာယီရေဘေးကယ်ဆယ်ရေးစခန်း ၆ ခုသို့ ရေဘေးရှောင် အိမ်ထောင်စု ၆၃၂ စု၊ လူဦးရေ စုစုပေါင်း ၂,၈၈၉ ဦး ပြောင်းရွှေ့နေထိုင်လျက်ရှိကြောင်း သိရသည်။
ဖြစ်စဉ်နှင့်ပတ်သက်၍ ကရင်ပြည်နယ်အစိုးရအဖွဲ့ လူမှုရေးရာဝန်ကြီး ဦးစောထွန်းအောင်သည် စက်တင်ဘာ ၁ ရက် နေ့လယ်ပိုင်းက ဘားအံမြို့ပေါ်ရှိ မိုးလုံလေလုံ အားကစားခန်းမ၊ အမှတ် (၃) အထက မိုးလုံလေလုံ အားကစားခန်းမ၊ ရွှေယဉ်မျှော် ဘုရား၊ လေသာ ဘုန်းကြီးကျောင်းတိုက်၊ ပြည်နယ်ကမ္မဋ္ဌာန်းကျောင်းတိုက်နှင့် အစ္စလာမ်ဗလီခန်းမ အပါအဝင် ယာယီကယ်ဆယ်ရေးစခန်း ၆ ခုသို့ သွားရောက်ကာ ရေဘေးသင့် ပြည်သူများကို သွားရောက်ကြည့်ရှု၍ လိုအပ်သည်များ အနီးကပ် ဖြည့်ဆည်းဆောင်ရွက်ပေးခဲ့ကြောင်း သိရသည်။