ဘဏ်လုပ်ငန်းများ ပုံမှန်ပြန်ဖြစ်ရန် ကြိုးပမ်းနေကြောင်း နစက ဥက္ကဋ္ဌ ပြော
ပြည်တွင်း၌ ဖြစ်ပေါ်နေသည့် အခြေအရပ်ရပ်ကြောင့် တုန့်ဆိုင်းသွားသည့် ဘဏ်လုပ်ငန်းများကို ပုံမှန်အနေ အထားသို့ ပြန်လည် ရောက်ရှိရန် ကြိုးပမ်းနေကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားသည်။
ယမန်နေ့ ဇွန်လ (၁၆) ရက်က ပြုလုပ်သည့် နိုင်ငံတော်စီမံအုပ်ချုပ်ရေး ကောင်စီ အစည်းအဝေးတွင် ဗိုလ်ချုပ်မှူးကြီး မင်းအောင်လှိုင်က ပြောကြားခဲ့ခြင်း ဖြစ်သည်။
“ဇန်နဝါရီလမှစ၍ ဘဏ်လုပ်ငန်းများ ပုံမှန်အခြေအနေနီးပါးပြန်လည် လည်ပတ်နိုင်ပြီဟု ဆိုနိုင်သော်လည်း အချို့သောဘဏ်များ ပြန်လည်ဖွင့်လှစ်ရန်အတွက် ဝန်ထမ်းအခက်အခဲများကြောင့် ဖွင့်လှစ်နိုင်မှုအားနည်းနေသည်ကို တွေ့ရှိရပါတယ်။ ဘဏ် လုပ်ငန်းများပုံမှန်ပြန်လည်လည်ပတ်နိုင်ရေး ကြိုးပမ်းဆောင်ရွက်လျက်ရှိပါတယ်”ဟု ဗိုလ်ချုပ်မှူးကြီး မင်းအောင်လှိုင်က ပြော သည်။
၂၀၂၁ ခုနှစ် ဖေဖေါ်ဝါရီလ (၁) ရက် နောက်ပိုင်း ပြည် တွင်း၌ ဖြစ်ပေါ်နေသည့် နိုင်ငံရေး အပြောင်းအလဲများကြောင့် ပြည်တွင်းရှိ ဘဏ်လုပ်ငန်းများအကြားတွင် ကန့်သတ် ချက်များ ဖြစ်ပေါ်ခဲ့ပြီး ငွေကြေးအကြပ်အတည်းများ ပေါ်ပေါက်ခဲ့ခြင်း ဖြစ်သည်။
ဘဏ်များအကြား ငွေသွင်း ၊ ငွေထုတ်နှုန်းထားများ ကန့် သတ်ချက်များ ရှိခဲ့ပြီး ပြည်တွင်း ဘဏ်သုံးစွဲသူများအ ကြား အခက်အခဲများ အချိန်ကြာမြင့်စွာ ဖြစ်ပေါ်ခဲ့သည့် အတွက် ဝေဖန်မှုများလည်း မြင့်တက်ခဲ့သည်။
အဆိုပါ ကိစ္စများနှင့် ပတ်သက်၍လည်း စီးပွားရေးအရ တိုက်ခိုက်မှုများရှိ၍ ဘဏ်များ မပြိုလဲစေရန် ထိန်းသိမ်း ကြပ်မတ်ခဲ့ရခြင်းများရှိကြောင်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
” မိမိတို့တာဝန်ယူပြီးနောက်ပိုင်း နိုင်ငံရေးအရ ဆူပူမှုများ ဖြစ်ပေါ်ခဲ့ခြင်းကြောင့် ဘဏ်လုပ်ငန်းများ တုန့်ဆိုင်းသွားခဲ့ပါတယ်။ စိုးရိမ်ပူပန်မှုများကြောင့် အပ်ငွေများပြန် လည်ထုတ်ယူခြင်း၊ စီးပွားရေးအရ တိုက်ခိုက်ရန်အတွက်ဘဏ်များရှိ ပိုက်ဆံများ ကိုထုတ်ယူခြင်းနှင့် ငွေကြေးထုတ်ယူခြင်းများကို သတ်မှတ်စည်းကမ်းများအတိုင်း ဆောင်ရွက် ခြင်းမပြုခြင်းများဖြစ်ပေါ်ခဲ့သဖြင့် ဘဏ်များပြိုလဲမှုမရှိစေရေး ကြပ်မတ်ထိန်းသိမ်းဆောင် ရွက်ခဲ့ ရပါတယ်” ဟု နစက ဥက္ကဋ္ဌက ပြောသည်။
ယမန်နေ့က ကျင်းပသည့် နိုင်ငံတော်စီမံ အုပ်ချုပ်ရေး ကောင်စီအစည်းအဝေး (၅/၂၀၂၂)သို့ နိုင်ငံတော်စီမံအုပ်ချုပ်ရေးကောင်စီ ဒုတိယဥက္ကဋ္ဌ ဒုတိယဝန်ကြီးချုပ် ဒုတိယ ဗိုလ်ချုပ်မှူးကြီးစိုးဝင်း၊ ကောင်စီအဖွဲ့ဝင်များဖြစ်ကြသည့် ဗိုလ်ချုပ်ကြီးမြထွန်းဦး၊ ဗိုလ်ချုပ်ကြီး တင်အောင်စန်း၊ ဒုတိယဗိုလ်ချုပ်ကြီးမိုးမြင့်ထွန်း၊ မန်းငြိမ်းမောင်၊ ဦးသိန်းညွန့်၊ ဦးခင်မောင်ဆွေ၊ ဒေါ်အေးနုစိန်၊ Jeng Phang နော်တောင်၊ ဦးမောင်းဟာ၊ ဦးစိုင်းလုံးဆိုင်၊ စောဒန်နီယယ်၊ ဒေါက်တာ ဗညားအောင်မိုး၊ ဦးရွှေကြိမ်းနှင့် ဒုတိယဗိုလ်ချုပ်ကြီးရာပြည့်၊ အတွင်းရေးမှူး ဒုတိယ ဗိုလ်ချုပ်ကြီး အောင်လင်းဒွေး၊ တွဲဖက်အတွင်းရေးမှူး ဒုတိယ ဗိုလ်ချုပ်ကြီး ရဲဝင်းဦးတို့လည်း တက်ရောက်ခဲ့ကြောင်း သိရသည်။