လာမယ့် ဖေဖော်ဝါရီလ ကစပြီး ခိုလှုံခွင့်တောင်းသူတွေကို ဆေးခန်း၊ ဆေးရုံ သွားတာမျိုးအတွက် တက္ကစီ ဒါမှမဟုတ် မီနီကက်ဘ်တွေကို အသုံးပြုခွင့် ပိတ်ပင်လိုက်ပြီလို့ ဗြိတိန် အစိုးရက ကြေညာလိုက်ပ်တယ်။
ဒီလိုဖြစ်လာတာက ခိုလှုံခွင့်တောင်းသူတချို့ဟာ ဆေးခန်းသွားဖို့ မိုင်အများကြီးကို တက္ကစီတွေနဲ့ သွားနေကြတာ တွေ့ရတယ်။ ဥပမာ၊ လူတစ်ယောက်ဆိုရင် GP ဆရာဝန် (အထွေထွေရောဂါကု) ဆီသွားဖို့ မိုင် ၂၅၀ လောက် ကားစီးခဲ့လို့ အစိုးရရဲ့ ပြည်ထဲရေးရုံးကို ပေါင် ၆၀၀ တောင် ကုန်ကျစေခဲ့ပါတယ်။
ဒါကြောင့် အစိုးရက စက်တင်ဘာလမှာ ဟိုတယ်တွေကနေ ဆေးကုသမှုခံယူဖို့ ခိုလှုံခွင့်တောင်းသူတွေကို ပို့ဆောင်ပေးတဲ့ တက္ကစီအသုံးပြုမှုနဲ့ ကုန်ကျစရိတ်ကို အရေးပေါ် ပြန်လည်သုံးသပ်ဖို့ လုပ်ခဲ့ပါတယ်။
ခိုလှုံခွင့်တောင်းသူတွေရဲ့ သယ်ယူပို့ဆောင်ရေးအတွက် တစ်နှစ်ကို ပျမ်းမျှအားဖြင့် ပေါင် ၁၅.၈ သန်း လောက် သုံးစွဲနေရတယ်လို့ ဗြိတိန်အစိုးရက ဆိုပါတယ်။
ဒါပေမယ့် ဗြိတိန်ပြည်ထဲရေးဝန်ကြီး ရှာဘနာမာမွတ် ကတော့ အခုဆို ဒါတွေ ပြောင်းလဲတော့မယ်လို့ ဆိုပါတယ်။ “ဆေးရုံသွားဖို့အတွက် ခိုလှုံခွင့်တောင်းသူတွေရဲ့ ကန့်သတ်ချက်မရှိ တက္ကစီအသုံးပြုမှုကို ကျွန်မ ရပ်ဆိုင်းလိုက်ပါပြီ။ တကယ့်ကို အထူးကိစ္စများ မှာမှပဲ ခွင့်ပြုပေးမှာပါ။”လို့ သူမကပြောပါတယ်။
“ခိုလှုံခွင့်အတွက်သုံးတဲ့ ဟိုတယ်တိုင်းကို ပိတ်ပစ်နေချိန်မှာ အလဟသကုန်ကျစရိတ်တွေကိုလည်း ဆက်ပြီး ဖယ်ရှားသွားပါမယ်” လို့ ပြောခဲ့ပါတယ်။
ဗြိတိန်ဟာလဲ ခိုလှုံခွင့်တောင်းသူတွေအတွက် တင်းကျပ်တဲ့ စည်းမျဉ်းအသစ်တွေကို အမေရိကန်လိုပဲ ချမှတ်သွားတော့မှာဖြစ်ပြီး ပြည်ထဲရေးရုံးကနေ ခွင့်ပြုချက် လက်မှတ်ထိုးပေးရမှာ ဖြစ်တယ်လို့ သိရပါတယ်။