“ဗုံတီးမယ်” တေးသီချင်းဗီဒီယို ဖန်တီးထုတ်လွှင့်သူနှင့် စီစဉ်သူများကို စိစစ်အရေးယူရန် ဆောင်ရွက်လျက်ရှိ

တေးရေး၊ တေးဆို အောင်ပါစေ ၏ “ဗုံတီးမယ်” တေးသီချင်း ဗီဒီယိုနှင့် ပတ်သက်၍ ဖန်တီးထုတ်လွှင့်သူနှင့် စီစဉ်သူများကို အမှုဖွင့် အရေးယူနိုင်ရန်ဆောင်ရွက်လျက်ရှိကြောင်း ပြန်ကြားရေးဝန်ကြီးဌာနက ယနေ့ မတ်လ (၁၉) ရက်တွင် ထုတ်ပြန်ထားသည်။

ထုတ်ပြန်ချက်တွင် ပြန်ကြားရေးဝန်ကြီးဌာနသည် အရေးကြီးကုန်စည်နှင့် ဝန်ဆောင်မှု ဥပဒေပုဒ်မ ၄၊ ပုဒ်မခွဲ (ဂ) ပြဋ္ဌာန်းချက်ပါ အမိန့်ထုတ်ပြန်ခွင့်ကို ကျင့်သုံးပြီး ဆက်သွယ်ရေးကွန်ရက်ကို အသုံးပြုကာ ရုပ်ရှင်ကား ထုတ်လွှင့် ပြသခြင်းလုပ်ငန်းကို အရေးကြီး ဝန်ဆောင်မှုလုပ်ငန်းအဖြစ် သတ်မှတ်သည့် အမိန့်ကို ထုတ်ပြန်ခဲ့ပြီး လုပ်ငန်းလုပ်ကိုင်ခွင့် မှတ်ပုံတင်လက်မှတ်များကို စိစစ် ထုတ်ပေးလျက်ရှိသည်ဟု ဆိုသည်။

သို့ရာတွင် တေးရေး/ တေးဆို “အောင်ပါစေ” သည် ဆက်သွယ်ရေး ကွန်ရက်ကိုအသုံးပြု၍ ရုပ်ရှင်ကား ထုတ်လွှင့်ပြသခြင်းလုပ်ငန်း လုပ်ကိုင်ခွင့် မှတ်ပုံတင်လက်မှတ် ရယူခြင်းမရှိဘဲ ၎င်း၏ လူမှုကွန်ရက်အမျိုးမျိုး၌ တေးသီချင်း ဗီဒီယိုများကို ထုတ်လွှင့် ပြသလျက်ရှိကြောင်းလည်း ပြန်ကြားရေးဝန်ကြီးဌာန၏ ထုတ်ပြန်ချက်၌ ဖော်ပြထားသည်။

ထို့အပြင် “ဗုံတီးမယ်” တေးသီချင်းဗီဒီယိုသည် မြန်မာလူမျိုးတို့၏ အမြတ်တနိုး တန်ဖိုးထားဂုဏ်ယူရသည့် မြန်မာ့တူရိယာဗုံနှင့် ပတ်မများကို ပြက်ရယ်ပြု စော်ကားသဖွယ်ဖြစ်နေသည့် သရုပ်ပျက် ကပြဖျော်ဖြေခြင်းနှင့် ညစ်ညမ်းသည့် အဓိပ္ပာယ် ပေါက်စေနိုင်သည့် အဓိပ္ပာယ်နှစ်ခွ သီချင်းစာသားများကို ဖန်တီးထားသည်ကို စိစစ်တွေ့ရှိရသည်ဟု ဆို သည်။

ထို့ကြောင့် တေးသီချင်း ဗီဒီယိုနှင့် ပတ်သက်၍ ဖန်တီးထုတ်လွှင့်သူ၊ စီစဉ်သူ၊ ပါဝင်သူများကို အမှုဖွင့် အရေးယူနိုင်ရန် စိစစ်လျက်ရှိသည်ဟုလည်း အသိပေးထားသည်။

ပြန်ကြားရေးဝန်ကြီးဌာနအနေဖြင့် ပြီးခဲ့သည့် ၂၀၂၄ ခုနှစ်အတွင်းကလည်း “အချစ်ခံကြည့်”၊ “စောင့်ပက်”၊ “စကားလေးတခွန်းပဲဖြေ ချစ်လား”၊ “ဘီယာဗိုက်” စသည့် တေးသီချင်း သီဆိုသူများနှင့် ပါဝင် သရုပ်ဆောင်သူများကို အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ (၃၃) (က) ဖြင့် အမှုဖွင့် ဖမ်းဆီးအရေးယူမှုများ ဆောင်ရွက်ခဲ့‌သေးသည်။