နေပြည်တော်၊ဒက္ခိဏသီရိမြို့နယ်ရှိ မာရဝိဇယ ဗုဒ္ဓဥယျာဉ်တော်အတွင်း မာရဝိဇယဗုဒ္ဓရုပ်ပွား တော်မြတ်ကြီးတည်ထားကိုးကွယ်ရေးလုပ်ငန်းတိုးတက်မှုအခြေအနေအား နစက ဥက္ကဋ္ဌ၊ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က နိုဝင်ဘာ ၃ ရက် နေ့မွန်းလွဲပိုင်းက ကြည့်ရှုစစ်ဆေးခဲ့သည်။
နစက ဥက္ကဋ္ဌသည် ဆရာတော်ကြီးများထံမှ ဩဝါဒများခံယူလျှက် မာရဝိဇယ ဗုဒ္ဓရုပ်ပွား တော်မြတ်ကြီးတည်ဆောက်နေမှု၊ ပိဋကတ်ကျမ်းစာတော်များရေးထိုးပူဇော်နေမှု၊ကျောက်စာရုံများတည်ဆောက်နေမှု မှတ်တမ်းအားကြည့်ရှုပြီး ခင်းကျင်းပြသထားသည့် အဆောက်အဦးပုံစံငယ်များနှင့်ကမ္ဘာပေါ်ရှိ ဘုန်းတော်ကြီးကျောင်းများသို့ဖြန့်ဝေရန် ပါဠိအက္ခရာနှင့် Romanize Language တို့ဖြင့် ရိုက်နှိပ်ထားသော ပိဋကတ်ကျမ်းစာအုပ်နမူနာများကို ကြည့်ရှုခဲ့ကြသည်။
နစက ဥက္ကဋ္ဌမှ ဗုဒ္ဓရုပ်ပွားတော်မြတ်ကြီးတည် ဆောက်ပူဇော်ဆောင်ရွက်ရာတွင် ပွင့်လင်းရာသီရောက်လာပြီဖြစ်၍ ပတ်ဝန်းကျင်စိမ်းလမ်းသာယာမှုဆောင်ရွက်ရေးနှင့်လုပ်ဆောင်ရန်ကိစ္စများကို စနစ်တကျတွက်ချက်ဆောင်ရွက်ရန် အသေး စိတ်မှာကြားခဲ့သည်။
“မာရဝိဇယ” ဗုဒ္ဓရုပ်ပွားတော်မြတ်ကြီးအား မြန်မာနိုင်ငံ၌ ထေရဝါဒဗုဒ္ဓ သာသနာတော်ကြီးခိုင်မာစွာ ထွန်းလင်းတောက်ပလျက်ရှိမှုအား ကမ္ဘာကိုပြသရန်၊တိုင်းပြည်အေးချမ်းသာယာမှုရှိစေရန်၊ရုပ်ပွားတော်မြတ်ကြီးအား ပြည်တွင်းပြည်ပဘုရားဖူးများ လာရောက်ခြင်းဖြင့် ဒေသတိုးတက်စည်ကားမှုဖြစ်စေရန်၊နိုင်ငံတော်ဖွံ့ဖြိုးတိုးတက်မှုအထောက်အကူဖြစ်စေရန်တို့အတွက် ရည်ရွယ်၍ တည်ထားကိုးကွယ်ရန်လုပ်ဆောင်ခဲ့ခြင်းဖြစ်သည်။
ဗုဒ္ဓဥယျာဉ်တော်ကြီးအတွင်း သာသနာရေးဆိုင် ရာအခမ်းအနားကြီးများ ကျင်းပပြုလုပ်နိုင်မည့် သံဃာအပါး ၁၂၀၀ နှင့်လူပရိတ်သတ်များ ဝင်ဆံ့နိုင်သည့် သာသနာ့ဗိမာန်တော်ကြီး၊သုဓမ္မာဇရပ်များနှင့်မုစလိန္ဒာအိုင်တို့အပါအဝင် အခြားသာသနိကအဆောက်အဦများစွာကိုလည်း ထည့်သွင်းတည်ဆောက်လျက်ရှိသည်။
ထို့ပြင် ဆရာတော်ကြီးများ၏ ဩဝါဒမိန့်ကြားချက်များအရ ဆဋ္ဌသင်္ဂါယနာမူ ပိဋကတ်ကျမ်းစာများကို ကမ္ဘာကပါသိရှိနိုင်ရန် စကျင်ကျောက်ချပ်များပေါ်၌ စက်ကိရိယာများ အသုံးပြုပြီး ပါဠိအက္ခရာ၊ Romanize Language တို့ဖြင့် ကျောက်စာတော်များ တည်ထားနိုင်ရန်လည်းဆောင်ရွက်လျက်ရှိသည်။
