ဗီယက်နမ်နိုင်ငံ အလယ်ပိုင်းတစ်ခွင်တွင် ကာလရှည်ကြာစွာ နှင့် ဆိုးရွားစွာ ရေကြီးရေလျှံသဖြင့် လူ ၉၀ ဦး သေဆုံးခဲ့ပြီး ၁၂ ဦး ပျောက်ဆုံးလျက်ရှိကြောင်း အစိုးရက ပြောကြားခဲ့သည်။
အိမ်ခြေ ၁,၁၅၄ လုံးကျော် ပျက်စီးခဲ့ပြီး နေအိမ် ၁၈၆,၀၀၀ ခန့် ရေလွှမ်းမိုးခံခဲ့ရသည်ဟု စိုက်ပျိုးရေးနှင့် သဘာဝပတ်ဝန်းကျင်ဝန်ကြီးဌာနက တနင်္ဂနွေနေ့တွင် ပြောကြားခဲ့သည်။ ရေကြီး၍ စပါးနှင့် ကောက်ပဲသီးနှံစိုက်ခင်း ဟက်တာ ၈၀,၀၀၀ ခန့် ပျက်စီးခဲ့ကြောင်းလည်း ဝန်ကြီးဌာနက ပြောကြားခဲ့သည်။
လမ်းနှင့် တံတားများ ပျက်စီးခဲ့သဖြင့် အိမ်ထောင်စုရာနှင့်ချီ၍ အဆက်အသွယ်ပြတ်တောက်သွားခဲ့သည့် Dak Lak နှင့် Khanh Hoa ပြည်နယ်များရှိ ဒေသများတွင် ယခုတိုင် ရေကြီးရေလျှံဆဲဖြစ်သော်လည်း တစ်ချို့နေရာများတွင်မူ ရေပြန်ကျနေပြီဖြစ်သည်။ အာဏာပိုင်များသည် အပျက်အစီးများကို ရှင်းလင်းရင်း ပြုပြင်ရေးလုပ်ငန်းများဆောင်ရွက်ကာ အဆက်အသွယ်များပြန်လည်ရရှိရေး ကြိုးပမ်းဆောင်ရွက်နေသည်။
နိုဝင်ဘာလ ၂၅ ရက် နေ့မှစတင်ကာ မိုးသည်းထန်စွာရွာသွန်းမှုများ တဖြည်းဖြည်း လျော့ကျသွားမည်ဟု အစိုးရ မိုးလေဝသ နှင့်ဇလဗေဒဌာနက မျှော်လင့်ထားသည်။
ဂျီ-၂၀ အစည်းအဝေးအတွက် ဂျိုဟန်နက်စ်ဘာ့ဂ်သို့ ရောက်ရှိနေသော ဝန်ကြီးချုပ် ဖမ်မင်းချင်သည် ရေကြီးမှုအခြေအနေကို ပြန်လည်သုံးသပ်ရန်၊ အလယ်ပိုင်းပြည်နယ်များတွင် လက်ရှိဆောင်ရွက်မှုနှင့် ပြန်လည်ထူထောင်ရေးအခြေအနေများကို ညှိနှိုင်းဆောင်ရွက်ရန်အတွက် တစ်နိုင်ငံလုံးရှိ ဝန်ကြီးဌာနများ၊ ဒေသန္တာရအာဏာပိုင်များနှင့် အရေးပေါ်အွန်လိုင်းအစည်းအဝေး ပြုလုပ်ခဲ့ကြောင်း အစိုးရဝက်ဘ်ဆိုက်တွင် ဖော်ပြထားသည်။
အစိုးရ၏ ကနဦးခန့်မှန်းချက်အရ စုစုပေါင်း ပျက်စီးဆုံးရှုံးမှုတန်ဖိုးသည် အနည်းဆုံး ဒေါင် ၉ ထရီလျံ(ဒေါ်လာသန်း ၃၄၀) ခန့်ရှိမည်ဟု ဆိုထားသည်။ ဗီယက်နမ်နိုင်ငံသည် ယခုနှစ်အတွင်း မုန်တိုင်း ၁၄ လုံးအထိ တိုက်ခတ်ခံခဲ့ရသည်။
Ref: ဘန်ကောက်ပို့စ်