အီရတ်ရေနံတင်ဆောင်လာသော ရေနံစိမ်းတင်သင်္ဘောတစ်စင်းကို အရှေ့အလယ်ပိုင်းပင်လယ်ကွေ့ရှိ ရေတပ်၏ ပိတ်ဆို့တားဆီးထားမှုကို ဖြတ်ကျော်ခွင့်ပြုရန် ဗီယက်နမ်နိုင်ငံပိုင် ရေနံကုမ္ပဏီ၏ ကုန်သွယ်ရေးဌာနခွဲက အမေရိကန်ရေတပ်ကို တောင်းဆိုခဲ့သည်။ အဆိုပါသင်္ဘောသည် ဗီယက်နမ်ရေနံချက်စက်ရုံအတွက် အရေးကြီးသော ထောက်ပံ့ရေးပစ္စည်းများ ပေးပို့ရန်ဖြစ်ကြောင်းလည်း ပက်ထရိုဗီယက်နမ်ရေနံကော်ပိုရေးရှင်း(PVOIL) က အင်္ဂါနေ့က တောင်းဆိုချက်စာတစ်စောင်တွင် ပြောကြားထားသည်။
တရားမဝင်ကုန်ပစ္စည်းများဟု ယူဆသော ကုန်သင်္ဘောများအပါအဝင် အမေရိကန်စစ်တပ်သည် အီရန်အပေါ် သင်္ဘောသွားလာမှုဆိုင်ရာ ပိတ်ဆို့မှုကို တိုးချဲ့ခဲ့သော်လည်း ပင်လယ်ကွေ့မှ အခြားရေနံတင်ပို့မှုများကိုမူ လွတ်လပ်စွာဖြတ်သန်းသွားလာနိုင်ကြောင်း ပြောကြားခဲ့ည်။
မော်လ်တာအလံလွှင့်ထူထားသော ရေနံစိမ်းစည်နှစ်သန်းတင်ဆောင်ထားသည့် Agio Fanourios I ရေနံတင်သင်္ဘောကြီးသည် မေလ ၁၀ ရက်နေ့တွင် ဟော်မုဇ်ရေလက်ကြားမှ ထွက်ခွာခဲ့ကာ အိုမန်ပင်လယ်ကွေ့တွင် ခုတ်မောင်းနေခဲ့ပြီးနောက် မေလ ၁၁ ရက်နေ့တွင် ဂငယ်ကွေ့ပြန်လှည့်သွားခဲ့ကြောင်း သင်္ဘောခြေရာခံဒေတာများက အင်္ဂါနေ့တွင် ဖော်ပြခဲ့သည်။
အီရန်အပေါ် ပိတ်ဆို့ထားမှုကို ဆက်လက်အကောင်အထည်ဖော်ရန် သင်္ဘောကို လမ်းကြောင်းပြန်လှည့်စေခဲ့သည်ဟု ရေနံတင်သင်္ဘောနှင့် ပတ်သက်သည့် ရိုက်တာသတင်းဌာန၏ မေးမြန်းချက်အပေါ် တုန့်ပြန်သည့်အနေဖြင့် အမေရိကန်စစ်တပ် ဗဟိုကွပ်ကဲမှုဌာနက ထုတ်ပြန်ပြောကြားခဲ့သည်။
တောင်းဆိုချက်အရ အမေရိကန်ရေတပ်သည် သင်္ဘောကို ဗီယက်နမ်သို့ ဆက်လက်ထွက်ခွာခွင့်ပြုမည်လားဆိုသည်ကိုမူ ထုတ်ပြန်ချက်တွင် ရှင်းလင်းစွာ မဖော်ပြခဲ့ပေ။
အီရန်အစိုးရတစ်ပိုင်း တပ်စ်နင်း သတင်းဌာန၏ အဆိုအရ သင်္ဘောသည် ဟော်မုဇ်ရေလက်ကြားရှိ ရေနံတင်သင်္ဘောများအတွက် သတ်မှတ်ပေးထားသော ရေလမ်းကြောင်းကို အသုံးပြု၍ တနင်္ဂနွေနေ့တွင် ဖြတ်သန်းသွားခဲ့ကြောင်း ဆိုခဲ့သည်။
Ref အေရှားဝမ်း