ရန်ကုန်တိုင်း၊ဗိုလ်တထောင်မြို့နယ်၊အမှတ်(၈) ရပ်ကွက်၊ ၄၂ လမ်းရှိ ၈ လွှာတိုက်ခန်းပေါ်မှ ဇူလိုင် ၂၆ ရက်(ယနေ့)နံနက် ၁၀ နာရီကျော်ခန့်က အသက်(၃၀)နှစ်ခန့်ရှိ အမျိုးသားတစ်ဦးပြုတ်ကျခဲ့ကြောင်း လင်းလက်လူမှုကူညီရေးအသင်းနှင့်လူမှုကူညီရေးအသင်းများမှ သိရသည်။
” ၈ လွှာတိုက်ခန်းပေါ်ကနေ အမျိုးသားတစ်ယောက်ပြုတ်ကျတယ်သတင်းရတာနဲ့ သွားပြီးကူညီပေးခဲ့ပါတယ် နောက်ဖေးလမ်းကြားထဲကိုပြုတ်ကျသွားတာပါ သေဆုံးခြင်းမရှိပါဘူး ထိခိုက်ဒဏ်ရာတွေတော့ရသွားတယ် အဲဒီဒဏ်ရာတွေကလည်း မစိုးရိမ်ရပါဘူး ခန့်မှန်းကြည့်ရသလောက်ဆိုရင် နောက်ဖေးဆန်းရှိတ်တွေပေါ်ကိုတစ်ဆင့်စီကျပြီးတော့မှ အောက်ကိုပြုတ်ကျလာတာလို့ထင်တယ်”ဟု ဗိုလ်တထောင်မြို့နယ်အခြေစိုက်လူမှုကူညီရေးအသင်းဝင်တစ်ဦးကပြော သည်။
၈ လွှာတိုက်ခန်းပေါ်မှပြုတ်ကျခဲ့သည့် အမျိုးသားသည် အဆောင်နေသူတစ်ဦးဖြစ်ကာ ပြုတ်ကျသည့်အရှိန်ကြောင့် ဦးခေါင်းကွဲ၊ခြေထောက်ထိခိုက်ဒဏ်ရာများသာ(မစိုးရိမ်ရ)ရရှိခဲ့ကြောင်း သိရသည်။
ထို့ကြောင့် လူမှုကူညီရေးအသင်းဝင်များက ၈ လွှာတိုက်ခန်းပေါ်မှပြုတ်ကျခဲ့သည့်အမျိုးသားအား မြေပြင်ကုသမှုများပြုလုပ်ပေးပြီးနောက် လင်းလက်လူမှုကူညီရေးအသင်းမှ ရန်ကုန်ပြည်သူ့ဆေးရုံကြီးသို့ပို့ဆောင်ပေးခဲ့ကြကြောင်း သိရသည်။
