ထရမ့်အစိုးရ၏ ဗင်နီဇွဲလားအပေါ် ဖိအားပေးလှုပ်ရှားမှုသည် မူးယစ်ဆေးဝါးတို-က်ဖျ-က်ရေးထက် ဗင်နီဇွဲလားနိုင်ငံ၏ ရေနံကိုရယူလိုသည့် ဆန္ဒနှင့် ပိုမိုသက်ဆိုင်ကြောင်း ကိုလံဘီယာသမ္မတက ပြောကြားသည်။
ကိုလံဘီယာသမ္မတ ဂူစတာဗို ပက်ထရို (Gustavo Petro) သည် CNN နှင့် အထူးသီးသန့် တွေ့ဆုံမေးမြန်းမှုတွင် ဗင်နီဇွဲလား၌ ကမ္ဘာ့အကြီးဆုံး ရေနံသိုက်အဖြစ် သတ်မှတ်ထားသော ရေနံများရှိနေသည်ကို ထောက်ပြပြီး ” (ရေနံ) ဟာ ပြဿနာရဲ့ အဓိကအချက်ပဲ” ဟု ပြောကြားခဲ့ခြင်းဖြစ်သည်။
” ခုလုပ်နေတာတွေဟာ ရေနံနဲ့ပတ်သက်တဲ့ ညှိနှိုင်းမှုတစ်ခုပါပဲ။ ကျွန်တော်ယုံကြည်တာကတော့ ဒါဟာ အမေရိကန်သမ္မတ ဒေါ်နယ်ထရမ့်ရဲ့ အိုင်ဒီယာပဲ ဖြစ်ပါတယ်။ သူက စီးပွားရေးသက်သက်ပါပဲ။ သူက ဗင်နီဇွဲလားကို ဒီမိုကရေစီဖြစ်ရေး၊ ဒါမှမဟုတ် မူးယစ်ဆေးဝါးမှောင်ခိုကူးမှု အဲဒါတွေကို လုံးဝစဉ်းစားနေတာ မဟုတ်ပါဘူး ” ဟု ၎င်းက ဆက်လက်ပြောကြားခဲ့ပြီး ဗင်နီဇွဲလားကို အဓိကမူးယစ်ဆေးဝါးထုတ်လုပ်သူအဖြစ် သတ်မှတ်ထားခြင်း မရှိသလို ကမ္ဘာ့မူးယစ်ဆေးဝါး ကုန်သွယ်မှု၏ အနည်းငယ်သော အစိတ်အပိုင်းသာ ထိုနိုင်ငံမှတစ်ဆင့် ဖြတ်သန်းသွားလာသည်ဟုလည်း သူကထည့်သွင်းပြောကြားခဲ့သည်။
ပက်ထရိုသည် သမ္မတအိမ်ဖြူတော်သို့ ထရမ့်ပြန်ရောက်လာချိန်ကတည်းကစတင်ပြီး ထရမ့်နှင့် သဘောထားကွဲလွဲမှုများ ရှိခဲ့သည်။ ပြီးခဲ့သည့်နှစ်အတွင်း ကိုလံဘီယာခေါင်းဆောင်သည် ထရမ့်အစိုးရ၏ လူဝင်မှုကြီးကြပ်ရေးဆိုင်ရာ မူဝါဒများ၊ အစ္စရေးအပေါ်ပံ့ပိုးမှုနှင့် လက်တင်အမေရိကတစ်ဝိုက်ရှိ စစ်ရေးလှုပ်ရှားမှုများကို ပြင်းပြင်းထန်ထန် ဝေဖန်ခဲ့သည်။
အမေရိကန်သည် အိမ်နီးချင်းများအပေါ် လွှမ်းမိုးချင်သည်ဟု သူက ယမန်နေ့ကစွပ်စွဲခဲ့ပြီး ထရမ့်၏လုပ်ဆောင်ချက်များကို အင်ပါယာထူထောင်ခြင်းနှင့် နှိုင်းယှဉ်ခဲ့သည်။ ” အမေရိကန်ပြည်ထောင်စုကို အင်ပါယာတစ်ခုအဖြစ် မသတ်မှတ်သင့်ပါဘူး၊ တခြားသော နိုင်ငံတွေထဲက တစ်နိုင်ငံအဖြစ်ပဲ သတ်မှတ်သင့်ပါတယ် ” ဟုလည်း သမ္မတ ပက်ထရိုက ပြောကြားခဲ့သည်။