“ဒေသတွင်း ငြိမ်းချမ်းရေးနှင့် တည်ငြိမ်ရေးကို အာမခံနိုင်ရန်အတွက် သက်ဆိုင်သူအားလုံးအနေဖြင့် ပြဿနာများကို ဆွေးနွေးပွဲမှတစ်ဆင့် ငြိမ်းချမ်းစွာဖြေရှင်းကြရန် ကျွန်ုပ်တို့ တိုက်တွန်းပါသည်” ဟု အိန္ဒိယ နိုင်ငံခြားရေးဝန်ကြီးဌာနက ပြောကြားခဲ့သည်။
ဗင်နီဇွဲလားနိုင်ငံ၊ ကာရာကတ်စ်မြို့တွင် ပြုလုပ်သော စစ်ဆင်ရေးတစ်ခုအတွင်း ဗင်နီဇွဲလားသမ္မတ နီကိုးလက်စ် မာဒူရိုနှင့် ၎င်း၏ဇနီးဖြစ်သူတို့ကို အမေရိကန်က ဖမ်းဆီးခဲ့ပြီးနောက် တစ်ရက်အကြာတွင် ဆွေးနွေးညှိနှိုင်းမှုများပြုလုပ်ရန် အိန္ဒိယနိုင်ငံက တောင်းဆိုလိုက်ကာ အဆိုပါဖြစ်ရပ်အပေါ် “အလွန်အမင်း စိုးရိမ်ဖွယ်ရာကိစ္စ” အဖြစ် တုံ့ပြန်ခဲ့သည်။
“ဗင်နီဇွဲလားနိုင်ငံမှာ မကြာသေးမီက ဖြစ်ပေါ်နေတဲ့ အခြေအနေတွေဟာ အလွန်အမင်း စိုးရိမ်ဖွယ်ရာ ကိစ္စရပ်တစ်ခု ဖြစ်ပါတယ်။ ကျွန်ုပ်တို့အနေနဲ့ ဖြစ်ပေါ်ပြောင်းလဲနေတဲ့ အခြေအနေတွေကို အနီးကပ် စောင့်ကြည့်နေပါတယ်” ဟု အိန္ဒိယနိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
ထို့အပြင် “ဗင်နီဇွဲလားပြည်သူများ၏ ဘေးကင်းလုံခြုံရေးနှင့် သာယာဝပြောရေးအတွက် အိန္ဒိယအနေဖြင့် ထောက်ခံကြောင်း ထပ်လောင်းအတည်ပြုပါသည်” ဟု အိန္ဒိယ နိုင်ငံခြားရေးဝန်ကြီးဌာနက ပြောကြားခဲ့ပြီး “ဒေသတွင်း ငြိမ်းချမ်းရေးနှင့် တည်ငြိမ်ရေးကို အာမခံနိုင်ရန်အတွက် သက်ဆိုင်သူအားလုံးအနေဖြင့် ပြဿနာများကို ဆွေးနွေးပွဲမှတစ်ဆင့် ငြိမ်းချမ်းစွာ ဖြေရှင်းကြရန် ကျွန်ုပ်တို့ တိုက်တွန်းပါသည်” ဟုလည်း တောင်းဆိုလိုက်သည်။
အိန္ဒိယနိုင်ငံရှိ လက်ဝဲပါတီအများအပြား၏ ပူးတွဲကြေညာချက်တွင် ဗင်နီဇွဲလားအပေါ် အမေရိကန်၏ “ကျူးကျော်မှုနှင့် မာဒူရိုနှင့် ဇနီးဖြစ်သူတို့အား ပြန်ပေးဆွဲမှု” ကို “ပြင်းထန်စွာ ရှုတ်ချကန့်ကွက်ကြောင်း” ဖော်ပြထားသည်။
“ဒါဟာ ကုလသမဂ္ဂ ပဋိညာဉ်ကို ပြောင်ပြောင်တင်းတင်း ချိုးဖေ-ာက်ပြီး အချုပ်အခြာအာဏာပိုင် နိုင်ငံတစ်နိုင်ငံအပေါ် ကျူးလွန်တဲ့တို-က်ခို-က်မှုဖြစ်တယ်” ဟု အဆိုပါ ထုတ်ပြန်ချက်တွင် ပါရှိသည်။