တိုက်ပွဲဖြစ်ပွားမှုများနှင့်တောနော်ရေတံခွန်အနီးရှိ ချောင်းကူးတံတား မိုင်းဖောက်ခွဲခံရ၍ ပျက်စီးသွားမှုတို့ကြောင့် ဖြတ်သန်းသွားလာခွင့် ယာယီပိတ်ထားသည့် မြဝတီ-ကော့ကရိတ်သွား အာရှလမ်းမကြီးအား ဇန်နဝါရီ ၄ ရက်(ယနေ့-လွတ်လပ် ရေးနေ့)နေ့လည်ပိုင်းမှစတင်၍ ပြန်လည်ဖြတ် သန်းသွားခွင့်ပြုခဲ့ကြောင်း သိရသည်။
“ဟုတ်တယ်ဗျ ဒီနေ့နေ့လည်လောက်ကဖြတ်သန်းခွင့်ပြုလိုက်တယ် အခုကားတွေအကုန်လုံး သွား လာနေကြပြီ ကျွန်တော်တို့အတွက်လည်း အဆင် ပြေသွားတာပေါ့ နယ်ဝေးပို့ရမယ့်လူနာတွေရှိရင် ပြန်ပြီးကူညီပို့ပေးလို့ရပြီ”ဟု မြဝတီမြို့အခြေလစိုက် လူမှုကူညီရေးအသင်းဝင်တစ်ဦးကပြော သည်။
မြဝတီ-ကော့ကရိတ်သွား အာရှလမ်းမကြီးအား ယနေ့နေ့လည် ၃ နာရီခွဲခန့်မှစတင်၍ ပြန်လည်ဖြတ်သန်းခွင့်ပြုခဲ့ခြင်းဖြစ်ကြောင်း မြဝတီမြို့ခံများထံမှ သိရသည်။
“လမ်းပြန်ပွင့်သွားပြီဆိုတော့ ကုန်စည်စီးဆင်းမှုပြန်ကောင်းလာတော့မှာပါ လမ်းပိတ်ထားတုန်းကဆိုရင် ရန်ကုန်ကိုကုန်ပို့ဖို့ကိုဘယ်လိုမှမရဘူး ကုန်ပို့ခစျေးတွေကလည်း အဆမတန်တက်သွားတယ် အာရှလမ်းကပိတ်ထားတုန်းကဆိုရင် ဆိုင်ကယ်တောင်ဖြတ်သွားလို့မရဘူး”ဟု မြဝတီမြို့ခံတစ်ဦးကပြောသည်။
မြဝတီ-ကော့ကရိတ်သွား အာရှလမ်းမကြီးပေါ်တွင် ၂၀၂၂ ခုနှစ်၊ ဒီဇင်ဘာ ၂၀ ရက်ခန့်မှစတင်ကာ နစက ၏လုံခြုံရေးအဖွဲ့ဝင်များနှင့် KNU , PDF ပူးပေါင်းအဖွဲ့များကြား၌ ထိတွေ့တိုက်ပွဲများဖြစ်ပွားခဲ့ပြီးနောက် လုံခြုံရေးအခြေအနေအရ အာရှလမ်းမကြီးအား ဖြတ်သန်းသွားလာခွင့်ပိတ်ခဲ့ခြင်းဖြစ်သည်။
ထိုသို့ ဖြတ်သန်းခွင့်ပိတ်ခဲ့သဖြင့် မြဝတီမြို့သို့သွားမည့်ကားများနှင့်ကော့ကရိတ်မြို့ဘက်သို့ ပြန်ဆင်းလာမည့်ကားများမှာ ရောက်ရှိသည့်နေရာ၌ ရပ်တန့်ထားခဲ့ရပြီး မဖြစ်မနေသွားလာရမည့်သူများမှာ ထော့ကော်ကိုးလမ်းမှတဆင့်သာဖြတ်သန်းသွားလာခဲ့ရကြောင်း သိရသည်။
“ထော့ကော်ကိုးလမ်းက မြေသားလမ်းလည်းဖြစ်သလို လမ်းကလည်းကြမ်းတယ် မဖြစ်မနေသွားလာရမယ့်လူတွေလောက်ပဲသွားကြတယ် အာရှလမ်းကို ပြီးခဲ့တဲ့ ၄ ရက်လောက်ကခနလေးပြန်ဖွင့်လိုက်တယ် ဘယ်လိုဖြစ်လို့လည်းတော့မသိဘူး ခနလေးနဲ့နေ့ချင်းပြန်ပိတ်လိုက်တယ် အခုမှပြန်ဖွင့်ပေးတာ”ဟု မြဝတီမြို့ခံတစ်ဦးကပြောသည်။
အာရှလမ်းမကြီးအား ဖြတ်သန်းသွားလာခွင့်ပိတ်ထားချိန်၌ ကုန်တင်ကားများ၊အဝေးပြေးခရီး သည်တင်ကားများနှင့်အိမ်စီးကားများ ရာချီရပ်တန့်ထားခဲ့ရပြီး သစ်သီးဝလံများတင်ဆောင်ထားသည့် ကုန်တင်ကားများမှာ တင်ဆောင်လာသည့် ကုန်ပစ္စည်းများအား ရသည့်စျေးဖြင့်ပြန်လည်ရောင်းချမှုများရှိခဲ့သည်ဟု သိရသည်။
Photo-ဆက်ပိုင်အောင်
