ဖိလစ်ပိုင်နိုင်ငံတွင် အဓမ္မအလုပ်စေခိုင်းခြင်းခံရသည့် မြန်မာနိုင်ငံသားများအား ကယ်ဆယ်ကာ နေရပ်မြန်မာနိုင်ငံသို့ ပြန်လည်ပို့ဆောင်ပေးလျက်ရှိရာ မြန်မာနိုင်ငံသား (၆) ဦးကို ဇွန်လ (၁၄) ရက်က တတိယအသုတ်အဖြစ် ပြန်လည်ပို့ဆောင်ပေးခဲ့ကြောင်း သိရသည်။
ဖိလစ်ပိုင် နိုင်ငံဆိုင်ရာ မြန်မာသံရုံးအနေဖြင့် ဖိလစ်ပိုင် နိုင်ငံခြားရေးဝန်ကြီးဌာန ၊ ဖိလစ်ပိုင်အမျိုးသားရဲတပ်ဖွဲ့၊ ဖိလစ်ပိုင် လူဝင်မှု ကြီးကြပ်ရေးဌာနတို့နှင့် ပူးပေါင်းကာအဓမ္မအလုပ်စေခိုင်းခြင်းခံရသည့် မြန်မာနိုင်ငံသား (၄၂) ဦးအား ကယ်တင်ကာ မြန်မာနိုင်ငံသို့ ပြန်လည်ပို့ဆောင် ပေးနေခြင်း ဖြစ်သည်။
ယင်းသို့ ပြန်လည် ပို့ဆောင်ပေးလျက်ရှိရာတွင် ပြီးခဲ့သည့် မေလ (၂၇) ရက်က အမျိုးသား (၁၅) ဦးနှင့် အမျိုးသမီး (၅) ဦး စုစုပေါင်း (၂၀) ဦးတို့အား ပထမသုတ်အနေဖြင့် ပြန်လည် ပို့ဆောင်ပေးခဲ့ပြီး ဖြစ်ကြောင်း ဖိလစ်ပိုင်နိုင်ငံဆိုင်ရာ မြန်မာသံရုံးမှ သိရသည်။
ထို့အပြင် ဇွန်လ(၂)ရက်ကလည်း မြန်မာနိုင်ငံသား အမျိုး သား(၉) ဦးနှင့် အမျိုးသမီး (၆) ဦးတို့ကို ဒုတိယအကြိမ်အနေဖြင့် ပြန်လည် ပို့ဆောင်ထားပြီး ဖြစ်ကြောင်းလည်း သိရသည်။
အဆိုပါ မြန်မာနိုင်ငံသားများသည် ဖိလစ်ပိုင်နိုင်ငံ၊ပမ်ပန်ဂါပြည်နယ် (Pampanga)၊ မာဘလာကတ်မြို့ (Mabala cat City) အနီးရှိ အွန်လိုင်းဂိမ်းလုပ်ငန်းများ ဆောင်ရွက်နေသည့် ကုမ္ပဏီကြီးတစ်ခုတွင် အတင်းအကျပ် စေခိုင်းခံနေရသူများထဲတွင် ပါဝင်နေသည့် မြန်မာနိုင်ငံသားများဖြစ်ပြီး ဖိလစ်ပိုင်အစိုးရမှ ကူညီကယ်ဆယ်ပေးခဲ့ရသည့် နိုင်ငံခြားသား စုစုပေါင်း (၁၁၃၇) ဦးရှိကြောင်း သိရသ ည်။
လက်ရှိတွင် ပြန်လည်ပို့ဆောင်ပေးရန် ကျန်ရှိနေသည့် မြ န်မာနိုင်ငံသား တစ်ဦးသည် အွန်လိုင်းဂိမ်းကုမ္ပဏီအား တရားစွဲဆိုထားသည့် အမှု၌ အခြားနိုင်ငံခြားသားအချို့နှင့်အတူ သက်သေအဖြစ် တရားရုံးတွင် ထွက်ဆိုနေရပြီး၊ ၎င်းအား တရားရုံးက အပြီးသတ်ဆုံးဖြတ်ချက် ချမှတ်ပြီးမှသာ မြန်မာနိုင်ငံသို့ ပြန်လည်ပို့ဆောင်ပေးနိုင်မည်ဖြစ်ကြောင်း သိရသည်။
ယမန်နေ့က ပြန်လည်ပို့ဆောင်ပေးခဲ့သည့် မြန်မာနိုင်ငံသားများအား မနီလာမြို့ရှိ မြန်မာသံရုံးမှ သံရုံးယာယီတာဝန်ခံနှင့် မြန်မာသံရုံး၊ စစ်သံရုံးမှ တာဝန်ရှိသူများ၊ ဖိလစ်ပိုင် လူဝင်မှုကြီးကြပ်ရေးဌာနနှင့် ဖိလစ်ပိုင်နိုင်ငံအခြေစိုက် International Organization for Migration (IOM) တို့မှ တာဝန်ရှိသူများက မနီလာမြို့ အပြည်ပြည်ဆိုင်ရာလေဆိပ်သို့ လိုက်ပါကူညီပို့ဆောင်ပေးခဲ့ကြောင်း သိရသည်။
ပုံစာ – ဖိလစ်နိုင်ငံတွင် လူကုန်ကူးခံရကာ အဓမ္မအလုပ်စေခိုင်းခံရသူ မြန်မာနိုင်ငံသားများအား မြန်မာနိုင်ငံသို့ ပြန်လည်ပို့ဆောင်ပေးနေစဉ်(ပုံအဟောင်း)