ပြည်ပနိုင်ငံများသို့ အလုပ်သမားစေလွှတ်သည့် တရားဝင်လုပ်ကိုင်ခွင့်ရ အေဂျင်စီအချို့သည်၎င်းတို့အလုပ်သမားများအတွက် အပြည့်အ၀ တာဝန်ယူမှု၊ တာဝန်ခံမှု တစ်စုံတစ်ရာမရှိကြောင်း အလုပ်သမားများ၏ ပြောပြချက်အရ သိရသည်။
” ကျွန်တော်တို့က ထိုင်းနိုင်ငံကို တရားဝင်အေဂျင်စီနဲ့ ချိတ်ပြီးသွားတာ။ သူတို့က ဒီမှာပြောတော့ အလုပ်ကတစ်မျိုး၊ ဟိုရောက်တော့ အလုပ်ကတစ်မျိုး ဖြစ်နေတယ်။ ဘယ်လိုမှ အဆင်မပြေဘူး။ ပို့ပေးတဲ့အေဂျင်စီကို ဖုန်းဆက်ပြောတော့လည်း ကျွန်တော်တို့ကို မချေမငံ ပြန်ပြောတယ်။ ဘာဆိုဘာမှ တာဝန်ယူမှုမရှိဘူး။ ကျွန်တော်တို့ပြန်မယ် စာအုပ်ကိုပေးဆိုတော့ အဲဒီကသူဌေးက လုံးဝပြန်မပေးဘူး။ သူဌေးကလည်း မကောင်းဘူး။ ပြန်မလာခင် အေဂျင်စီကို ဆက်သွယ်တော့လည်း ကျွန်တော်တို့ကို အလုပ်ရှင်ဘက်ကလိုက်ပြီး ပြောဆိုတယ်။ စာအုပ်ပြန်မရတော့ ခိုးပြီးပြန်လာရတယ်။ ဒီကိုရောက်ပြီး တစ်ပတ်လောက်နဲ့ ဘယ်လိုမှအဆင်မပြေလို့ ပြန်လာရတာ။ သိန်း ၃၀ လောက်ကုန်သွားတယ်”ဟု အေဂျင်စီမှတစ်ဆင့် ထိုင်းနိုင်ငံသို့ သွားရောက်အလုပ်လုပ်ကိုင်ခဲ့သူ ကိုနိုင်လင်းဦးက ပြောကြားသည်။
ပြီးခဲ့သည့်ရက်ပိုင်းက အလုပ်သမားများထံမှ ဝန်ဆောင်ခငွေကြိုတင်ရယူပြီး ပြည်ပတွင် အလုပ်လုပ်ရန် မစီစဉ်ပေးနိုင်မှုနှင့် ပြဿနာဖြစ်နေသည့် ပြည်ပအလုပ်အကိုင်အေဂျင်စီနှစ်ခုကို အလုပ်သမားဝန်ကြီးဌာနက လုပ်ငန်းလုပ်ကိုင်ခွင့်လိုင်စင် ရာသက်ပန်ပိတ်သိမ်းထားကြောင်း သိရသည်။
လက်ရှိအချိန်အထိ အကျိုးဆောင်လိုင်စင်ရာသက်ပန်ပိတ်သိမ်းခံရသည့် အေဂျင်စီ ၂၅ ခုရှိကြောင်းနှင့် ပြည်ပသို့ အလုပ်သမားစေလွှတ်ခွင့်အကျိုးဆောင်လိုင်စင် ရယူထားသည့် အေဂျင်စီ ၄၅၅ ခုအထိရှိကြောင်း အလုပ်သမားဝန်ကြီးဌာနမှ ထုတ်ပြန်ထားသည့် အချက်အလက်အရ သိရသည်။
“အေဂျင်စီတချို့က အလုပ်သမားတွေကို ဖြစ်သလိုစေလွှတ်တာတွေ ရှိလာတယ်။ ပိုက်ဆံတွေယူပြီး မပို့ပေးသလို ပိုက်ဆံယူပြီးတော့လည်း ဟိုဘက်ရောက်တော့ ကြုံသလိုအလုပ်ကို ချိတ်ပေးကြတယ်။ ဝန်ကြီးဌာနအနေနဲ့ သေချာလေး စိစစ်ပေးစေချင်တယ်။ ပြီးတော့ သွားရောက်လုပ်ကိုင်မယ့် အလုပ်သမားတွေအနေနဲ့လည်း အေဂျင်စီကို သေချာလေးစုံစမ်းပြီးမှ လုပ်စေချင်တယ်”ဟု အလုပ်သမားအရေး ဆောင်ရွက်နေသူတစ်ဦးကပြောကြားသည်။
ပြည်တွင်း၌ အလုပ်အကိုင်ရှားပါးမှုကြောင့် ထိုင်းနှင့် မလေးရှားနိုင်ငံတွင် သွားရောက်လုပ်ကိုင်သူများမှာ တရားဝင်သွားရောက်မှုရှိသလို တရားမဝင်နည်းလမ်းများဖြင့် အများဆုံးသွားရောက်လုပ်ကိုင်ကြခြင်း ဖြစ်သည်။
Photo -အလုပ်သမားသံအရာရှိရုံး
