လေကြောင်း၊ ရေကြောင်း ခရီးစဉ်များဖြင့် ပြည်တွင်းသို့ ဝင်ရောက်မည့် ခရီးသွားများအတွက် ကိုဗစ်-၁၉ ရောဂါဆိုင်ရာ ကန့်သတ်ချက်များကို ကျန်းမာရေးဝန်ကြီးဌာနက ဖြေလျှော့ပေးထားကြောင်း ရန်ကုန်တိုင်းဒေသကြီး၊ ပြည်သူ့ကျန်းမာရေးနှင့် ကုသရေးဦးစီးဌာနမှူး ဒေါက်တာဌေးလွင်က ပြောသည်။
“ အရင်က ပြည်တွင်းကို ကုန်းလမ်းကြောင်း၊ ရေလမ်းကြောင်း တွေကနေ ဝင်လာတဲ့သူတွေဆိုရင် ကာကွယ် ဆေးအနည်းဆုံး နှစ်ကြိမ် ထိုးပြီးတဲ့ ကာကွယ်ဆေးထိုးကဒ်ပြရမယ်။ မပါလာဘူးဆိုရင် (၄၈) နာရီအတွင်း RTP CR နဲ့ ကိုဗစ်ရောဂါရှိမရှိ စစ်ထားတဲ့ စစ်ဆေးချက်ကို ပြပြီးတော့ Negative ဖြစ်ပြီဆိုမှ နိုင်ငံတွင်းကို ဝင်ခွင့်ပြုတယ်။ အဲဒါတွေ မပြနိုင်ရင် ကွာရန်တင်း(သီးခြား) တစ်ပတ်ထားပြီး ပြန်စစ်လို့ Negative ဆိုမှ ဝင်ခွင့်ပြုခဲ့တယ်။ အခုတော့ အဲဒါတွေ အိမ်နီးချင်းနိုင်ငံတွေမှာလည်း မစစ်တော့ဘူး။ ကျွန်တော်တို့ နိုင်ငံမှာလည်း ဖြေလျှော့လိုက်ပြီ။ ဆေးထိုးကဒ်လည်း ပြစရာမလိုတော့သလို စစ်စရာလည်း မလိုတော့ပါဘူး” ဟု ဒေါက်တာဌေးလွင်က ပြောသည်။
နိုင်ငံတကာလေကြောင်း၊ ရေကြောင်းခရီးစဉ်များဖြင့် ပြည်တွင်းသို့ ဝင်ရောက်မည့် ခရီးသွားများအတွက် ပြည်သူ့ကျန်းမာရေးဆိုင်ရာ သတ်မှတ်ချက်များကို ဇူလိုင်လဆန်းပိုင်းက ကျန်းမာရေးဝန်ကြီးဌာနက ထုတ်ပြန် ကြေညာခဲ့ပြီး ဖြစ်သည်။
ယင်းကြေညာချက်တွင် ခရီးသွားများအနေဖြင့် ကျန်းမာရေးကြေညာချက် ( Health Declaration Form) ကို မြန်မာနိုင်ငံသို့ ဆိုက်ရောက်ချိန်တွင် သက်ဆိုင်ရာ ဝင်ထွက်ဂိတ်ရှိ ကျန်းမာရေးအရာရှိများထံသို့ တင်ပြရမည်ဖြစ်ကြောင်းနှင့် ကျန်းမာရေးကြေညာချက်တွင် အချက်အလက်ကမှန်ကန်စွာ ဖြည့်စွက်ထားခြင်းမရှိပါက ဥပဒေအရ အရေးယူဆောင်ရွက်မည်ဖြစ်ကြောင်း သိရသည်။
“ နိုင်ငံတွင်းကို ဝင်လာတဲ့သူတိုင်းက Health Declaration Form ကို ဖြည့်ရမယ်။ ဖျားရင် ဖျားတယ်ဆိုတာ သေသေချာချာဖြည့်ပြီးတော့ အဲဒီအထဲမှာ ကိုဗစ်သံသယဖြစ်နိုင်တဲ့လူနာတွေပါခဲ့ရင် လေဆိပ်မှာပဲ ချက်ချင်း ကိုဗစ်ရှိမရှိ စစ်ပါမယ်။ စစ်လို့ ပိုးတွေ့ခဲ့ရင် ဝေဘာဂီဆေးရုံကြီးနဲ့ ရန်ကုန်အထွေထွေရောဂါကုဆေးရုံကြီးမှာ ဆေးကုသဖို့၊ ကွာရန်တင်းထားဖို့တွေ စီစဉ်ဆောင်ရွက်ထားပါတယ်” ဟု ၎င်းက ဆက်လက်ပြောကြားခဲ့သည်။
ထို့အပြင် နိုင်ငံခြားသား ခရီးသွားများအနေဖြင့် ကိုဗစ် – ၁၉ ဆိုင်ရာ ကျန်းမာရေး အာမခံဝယ်ယူထားကြောင်း အထောက်အထားအား သက်ဆိုင်ရာ ဝင်ထွက်ဂိတ်ရှိ ကျန်းမာရေးအရာရှိများထံသို့ တင်ပြရမည်ဖြစ်ကြောင်း သိရသည်။
နိုင်ငံခြားသား ခရီးသွားများ အနေဖြင့် သက်ဆိုင်ရာနိုင်ငံအစိုးရ/ကျန်းမာရေးအာခမံလုပ်ငန်းများထံမှလည်းကောင်း၊ နိုင်ငံတကာ အသိအမှတ်ပြု ကျန်းမာရေးအာမခံလုပ်ငန်းများထံမှ လည်းကောင်း၊ ကိုဗစ် – ၁၉ ဆိုင်ရာ ကျန်းမာရေး အာမခံအပါအဝင် ကျန်းမာရေးအာမခံ ဝယ်ယူထားကြောင်း အထောက်အထားတင်ပြနိုင်ပါက မြန်မာ့အာမခံလုပ်ငန်းထံမှ ကျန်းမာရေးအာမခံဝယ်ယူခြင်းအား ကင်းလွတ်ခွင့်ပြုမည်ဖြစ်ကြောင်း သိရသည်။
အကယ်၍ ကျန်းမာရေးအာမခံဝယ်ယူထားကြောင်း အထောက်အထား မတင်ပြနိုင်ပါက မြန်မာ့အာမခံလုပ်ငန်းထံမှ ကိုဗစ် – ၁၉ဆိုင်ရာ ကျန်းမာရေးအာမခံ ဝယ်ယူရမည်ဖြစ်ကြောင်း သိရသည်။
ထို့ပြင် ခရီးသွားများအနေဖြင့် မြန်မာနိုင်ငံသို့ ဆိုက်ရောက်ချိန်တွင် သက်ဆိုင်ရာ ဝင်ထွက်ဂိတ် ကျန်းမာရေးအရာရှိများက ဆောင်ရွက်သော ကိုယ်အပူချိန်တိုင်းတာခြင်းနှင့် လိုအပ်သော ကျန်းမာရေးစစ်ဆေးခြင်းတို့ကို ခံယူရမည်ဖြစ်ကြောင်း သိရသည်။
မြန်မာနိုင်ငံတွင် နေထိုင်စဉ်အတွင်း ကိုဗစ် – ၁၉ရောဂါလက္ခဏာများ ပေါ်ပေါက်လာပါက ခရီးသွားများအနေဖြင့် မိမိတို့ရောက်ရှိရာဒေသရှိ ကျန်းမာရေးဌာနသို့ သတင်းပေးပို့ရမည်ဖြစ်ကြောင်း၊ ခရီးသွားများအနေဖြင့် မြန် မာနိုင်ငံမှ ပြန်လည်ထွက်ခွာခြင်းမပြုမီ ၎င်းတို့သွားရောက်မည့် ( သို့မဟုတ်) ခရီးတစ်ထောက်ရပ်နားမည့် နိုင်ငံများ၏ လိုအပ်ချက်အရ ကိုဗစ် – ၁၉ရောဂါ ဓာတ်ခွဲစစ်ဆေးမှု ပြုလုပ်လိုပါက ကျန်းမာရေးဝန်ကြီးဌာနက အသိအမှတ်ပြုထားသော ဓာတ်ခွဲခန်းများတွင် မိမိစရိတ်ဖြင့် ဆောင်ရွက်နိုင်ကြောင်း သိရသည်။
ကိုဗစ်-၁၉ရောဂါရှိကြောင်း တွေ့ရှိလျှင် ၎င်းတို့ကို ကျန်းမာရေးအစီအမံများနှင့်အညီ ချက်ချင်းသီးခြားထားရှိမည်ဖြစ်ပြီး ကျန်းမာရေးဝန်ကြီးဌာနက သတ်မှတ်ထားသည့် ဆေးရုံ (သို့မဟုတ်) ကုသရေးစင်တာ (သို့မဟုတ်) ဟိုတယ်သို့ လွှဲပြောင်းပို့ဆောင်၍ ကျန်းမာရေးဝန်ကြီး ဌာန၏ ကုသရေးလုပ်ငန်းလမ်းညွှန်များအတိုင်း ကုသမှုခံယူရမည်ဖြစ်ကြောင်းနှင့် နိုင်ငံခြားသားခရီးသည်များ၊ မြန်မာနိုင်ငံသားခရီးသည်များအနေဖြင့် အဆိုပါ ကုန်ကျ စရိတ်များကို ကျခံရမည်ဖြစ်ကြောင်း သိရသည်။