ကမ္ဘာပေါ်မှာ လူအများဆုံး လာရောက်လည်ပတ်ကြည့်ရှုကြတဲ့ ပြင်သစ်နိုင်ငံ Louvre ပြတိုက်က အဖိုးမဖြတ်နိုင်တဲ့ လက်ဝတ်ရတနာတွေကို ကျူးကျော်ဝင်ရောက်သူတစ်စုက လေးမိနစ်အတွင်း အောင်မြင်စွာ ခိုးယူသွားပြီးနောက် “အထူးအကြောင်းပြချက်များ” ဖြင့် ပြတိုက်ကို ပိတ်လိုက်ပါတယ်။
တနင်္ဂနွေနေ့မှာ ရဲတပ်ဖွဲ့ဝင်တွေက Louvre ပြတိုက် (Leonardo da Vinci ရဲ့ Mona Lisa ပန်းချီကားရှိတဲ့ နေရာ) ကို တိပ်တွေနဲ့ ကာရံထားပြီး လက်နက်ကိုင် စစ်သားတွေကလဲ ဖန်ပိရမစ်ပုံစံ အဝင်ဝမှာ လှည့်ကင်းလှည့်နေကြသလို၊ ပဲရစ်မြို့ထဲမှာလဲ ခိုးယူသူတွေကို ဖမ်းဆီးဖို့ လိုက်လံရှာဖွေမှုတွေ စတင်နေပါတယ်။
ခိုးယူသူတွေဟာ နံနက် ၉:၃၀ နာရီမှာ ပြတိုက်ဖွင့်ပြီးနောက် ပရိဘောဂတွေ မတင်ဖို့အတွက် အသုံးပြုတဲ့ ဓာတ်လှေကားကို အသုံးပြုပြီး ပြတိုက်ထဲ ဝင်ရောက်ခဲ့ကြတာပါ။
လေးမိနစ်အတွင်းမှာပဲ၊ ခိုးယူသူတွေဟာ နပိုလီယန်ခေတ် က လက်ဝတ်ရတနာ ရှစ်ခုကို ယူဆောင်ပြီး မော်တော်ဆိုင်ကယ်တွေနဲ့ ထွက်ပြေးသွားခဲ့ကြပြီး၊ ထွက်ပြေးရင်း တစ်ခုကတော့ ပြုတ်ကျကျန်ခဲ့ပါတယ်။
ပြင်သစ်သမ္မတ Emmanuel Macron က ဒီဓားပြတိုက်မှုကို “ကျွန်တော်တို့ မြတ်နိုးတဲ့ အမွေအနှစ်ကို တိုက်ခိုက်ခြင်း” လို့ ဆိုရှယ်မီဒီယာမှာ ဝေဖန်ပြောကြားခဲ့ပါတယ်။
“ပြစ်မှုကျူးလွန်သူတွေကို တရားဥပဒေအရ အရေးယူဆောင်ရွက်သွားမှာပါ။ ပဲရစ်ရှေ့နေရုံးရဲ့ ဦးဆောင်မှုအောက်မှာ ဒါကို အောင်မြင်အောင် နေရာတိုင်းမှာ အစွမ်းကုန် ကြိုးပမ်းဆောင်ရွက်နေပါတယ်” လို့ သူက ထပ်လောင်းပြောကြားခဲ့ပါတယ်။
ဘာတွေဖြစ်ပျက်ခဲ့တာလဲ ?
တနင်္ဂနွေနေ့ ဒေသစံတော်ချိန် နံနက် ၉:၃၀ နာရီ (မြန်မာစံတော်ချိန် နေ့လယ် ၂:၀၀ နာရီ) ခန့်မှာ ကမ္ဘာလှည့်ခရီးသည်တွေ Louvre ပြတိုက်ရဲ့ ခန်းမတွေထဲ လှည့်လည်နေချိန်မှာ ခိုးယူသူတွေဟာ Apollo’s Gallery ကို ပစ်မှတ်ထားခဲ့ကြပါတယ်။ Apollo’s Gallery ဟာ ပြင်သစ်ဘုရင် Louis XIV ရဲ့ အမိန့်နဲ့ ဆောက်လုပ်ခဲ့တဲ့ ရွှေရောင်ခြယ်၊ ခမ်းနားတဲ့ ပန်းချီကားတွေရှိတဲ့ ခန်းမဖြစ်ပြီး ပြင်သစ်သရဖူရတနာတွေကိုလဲ ပြသထားတဲ့နေရာပါ။
ပြည်ထဲရေးဝန်ကြီး Laurent Nunez က ခိုးယူသူတွေဟာ ပြတိုက်ပြတင်းပေါက်ကို ရောက်ဖို့ လှေကားဓာတ်လှေကားကို အသုံးပြုခဲ့ကြပြီး၊ ပြခန်းထဲဝင်ရောက်ကာ “အဖိုးမဖြတ်နိုင်သော ရတနာများ” ကို ယူဆောင်ပြီး မော်တော်ဆိုင်ကယ်နဲ့ ထွက်ပြေးခဲ့ကြောင်း ပြောကြားခဲ့ပါတယ်။
Louvre ပြတိုက်က ဧည့်သည်အားလုံးကို ရှင်းလင်းပေးခဲ့ပြီး “ထူးခြားသော” အခြေအနေများကြောင့် တစ်နေ့တာလုံး ပိတ်ထားမယ်လို့ အွန်လိုင်းမှာ အသိပေးချက် ထုတ်ပြန်ခဲ့ပါတယ်။
ဒီအတောအတွင်း ရဲတပ်ဖွဲ့က ပြတိုက်တံခါးတွေကို ပိတ်ဆို့ပြီး ရင်ပြင်တွေကို ရှင်းလင်းခဲ့တဲ့အပြင် Seine မြစ်တစ်လျှောက်က အနီးနားရှိ လမ်းများကိုပါ ပိတ်ခဲ့ပြီး စုံစမ်းစစ်ဆေးမှု စတင်ခဲ့ပါတယ်။
“ရူးသွပ်ဖွယ်ရာပဲ” – “ဟောလိဝုဒ်ရုပ်ရှင်လိုပါပဲ” လို့ အမေရိကန် ခရီးသွားတစ်ဦးကပြောပါတယ်။
ထိခိုက်ဒဏ်ရာရသူ မရှိခဲ့ဘဲ လူလေးဦးလို့ ယူဆရတဲ့ ခိုးယူသူတွေဟာ တနင်္ဂနွေညနေပိုင်းအထိ ထွက်ပြေးလွတ်မြောက်နေဆဲ ဖြစ်ပါတယ်။
ဓားပြတိုက်မှုအတွင်း ဘာတွေ အခိုးခံရသလဲ?
ပြင်သစ်နိုင်ငံယဉ်ကျေးမှုဝန်ကြီးဌာနက တနင်္ဂနွေနှောင်းပိုင်းမှာ အတည်ပြုပြောကြားခဲ့တာကတော့ ခိုးယူသူတွေဟာ လုံခြုံရေးမြင့်မားတဲ့ မှန်ဗီဒိုနှစ်ခုထဲက ပစ္စည်း ရှစ်ခုကို အောင်မြင်စွာ ယူဆောင်သွားခဲ့ပါတယ်။ အဲဒီပစ္စည်းတွေထဲမှာ ပြင်သစ်ဧကရာဇ် နပိုလီယန် ၁ ရဲ့ ဇနီး ဧကရီ Marie-Louise နဲ့ နပိုလီယန် ၃ ရဲ့ ဇနီး ဧကရီ Eugenie တို့ ပိုင်ဆိုင်ခဲ့တဲ့ လက်ဝတ်ရတနာတွေ ပါဝင်ပါတယ်။
အခိုးခံရတဲ့ ပစ္စည်းတွေကတော့-
- Queen Marie-Amelie နဲ့ Queen Hortense ရဲ့ လက်ဝတ်ရတနာ အစုံမှ နဖူးစည်းရတနာ
- အဲဒီနှစ်ဦးရဲ့ နီလာ လက်ဝတ်ရတနာ အစုံမှ လည်ဆွဲ
- နီလာ လက်ဝတ်ရတနာ အစုံမှ နားကပ် တစ်ဖက်
- Marie-Louise ရဲ့ လက်ဝတ်ရတနာ အစုံမှ မြ လည်ဆွဲ
- Marie-Louise ရဲ့ လက်ဝတ်ရတနာ အစုံမှ မြ နားကပ်တစ်စုံ
- “reliquary” brooch (ကြုပ်ပါတဲ့ရင်ထိုး) လို့ သိကြတဲ့ ရင်ထိုး
- ဧကရီ Eugenie ရဲ့ နဖူးစည်းရတနာ
- ဧကရီ Eugenie ရဲ့ နောက်ထပ် ကြီးမားတဲ့ ရင်ထိုး တစ်ခု
- ဧကရီ Eugenie ရဲ့ သရဖူ (စိန် ၁,၃၅၄ လုံးနဲ့ မြ ၅၆ လုံး ပါဝင်ပါတယ်)ကိုတော့ ထွက်ပြေးသွားတဲ့ ခိုးယူသူတွေက ပြတိုက်အပြင်ဘက်မှာ ကျန်ရစ်ခဲ့တဲ့အတွက် ပြန်လည်တွေ့ရှိခဲ့ကြောင်း ဝန်ကြီးဌာနက ပြောကြားခဲ့ပါတယ်။
Apollo’s Gallery မှာ အဖိုးမဖြတ်နိုင်တဲ့ အခြားရတနာတွေလည်း ရှိပါသေးတယ်။ အဲဒါတွေထဲမှာ သမိုင်းဝင် စိန်သုံးလုံးဖြစ်တဲ့ Regent၊ Sancy၊ နဲ့ Hortensia တို့အပြင် “ပြင်သစ်ဘုရင်တွေရဲ့ ခမ်းနားထည်ဝါတဲ့ ကျောက်မာပန်းကန်အစုအဝေး” တွေလည်း ပါဝင်တယ်လို့ ပြတိုက်ရဲ့ ဝက်ဘ်ဆိုဒ်မှာ ဖော်ပြထားပါတယ်။
အနုပညာပစ္စည်းခိုးယူမှုဆိုင်ရာ ကျွမ်းကျင်သူလဲဖြစ်၊ “Stealing Rembrandts: The Untold Stories of Notorious Art Heists” စာအုပ်ကို ပူးတွဲရေးသားသူလဲဖြစ်တဲ့ Anthony Amore က တော့ ဒီလက်ဝတ်ရတနာတွေဟာ “ငွေကြေးအရသာမက၊ ယဉ်ကျေးမှုဆိုင်ရာ အမွေအနှစ်အရပါ” အဖိုးမဖြတ်နိုင်ကြောင်း ပြောကြားခဲ့ပါတယ်။
ခိုးယူသူတွေ ဘယ်လို လုပ်ခဲ့ကြတာလဲ?
ခိုးယူသူတွေဟာ မိနစ်ပိုင်းအတွင်းမှာပဲ လျှပ်စစ်အင်အားသုံး ကိရိယာတွေ၊ မော်တော်ဆိုင်ကယ်တွေနဲ့ လျင်မြန်တိကျစွာ စီမံဆောင်ရွက်မှုတို့ကို ပေါင်းစပ်အသုံးပြုခဲ့ကြတယ်လို့ အာဏာပိုင်တွေက ပြောကြားခဲ့ပါတယ်။