ဟော်မုဇ်ရေလက်ကြားအနီးမှာ အပါချီ(Apache) တိုက်ခိုက်ရေးရဟတ်ယာဥ်တစ်စီး ပျက်ကျခဲ့တယ်ဆိုတဲ့ သတင်းနဲ့ပတ်သက်ပြီး အမေရိကန်သမ္မတ ဒေါ်နယ်ထရန့်က “လေသူရဲတွေ အဆင်ပြေပါတယ်” လို့ ပြောကြားလိုက်ပါတယ်။
တနင်္လာနေ့တုန်းက အဲဒီရေလက်ကြားအနီးမှာ အမေရိကန်ကြည်းတပ်သုံး အပါချီ ရဟတ်ယာဉ်တစ်စီး ပျက်ကျခဲ့ပြီး လေသူရဲနှစ်ဦးကို ကယ်ဆယ်ခဲ့ရတယ်လို့ New York Times သတင်းစာက ဖော်ပြခဲ့ပြီးနောက် သမ္မတထရန့်က အခုလို တုံ့ပြန်ပြောဆိုခဲ့တာပါ။
နယူးယောက်မြို့မှာကျင်းပတဲ့ တနင်္လာနေ့ည NBA ဘတ်စကက်ဘောဗိုလ်လုပွဲကို တက်ရောက်အပြီး သတင်းထောက်တွေနဲ့တွေ့ဆုံချိန်မှာ ထရန့်က “လေသူရဲတွေ အဆင်ပြေကြပါတယ်။ ဘယ်သူမှ ဒဏ်ရာမရပါဘူး”လို့ ပြောခဲ့တာ ဖြစ်ပါတယ်။
ဘာကြောင့် ပျက်ကျရသလဲဆိုတဲ့ အသေးစိတ်အချက်အလက်ကိုတော့ သူက ဆက်မပြောဘဲ စုံစမ်းစစ်ဆေးမှုအစီရင်ခံစာကို “မနက်ဖြန်” မှာ ထုတ်ပြန်လိမ့်မယ်လို့ပဲ ဆိုပါတယ်။ New York Times ရဲ့ ဖော်ပြချက်မှာလည်း ရဟတ်ယာဉ် ဘာကြောင့်ပျက်ကျတယ်ဆိုတာ ရှင်းရှင်းလင်းလင်း မသိရသေးဘူးလို့ ပါရှိပါတယ်။
ပြီးခဲ့တဲ့ တနင်္ဂနွေနေ့နှောင်းပိုင်းက အီရန်နဲ့ အစ္စရေးတို့ လပေါင်းများစွာအတွင်း ပထမဆုံးအကြိမ်အဖြစ် တိုက်ရိုက် အပြန်အလှန် ပစ်ခတ်တိုက်ခိုက်ခဲ့ကြပြီးနောက် ဒေသတွင်း တင်းမာမှုတွေ အရှိန်မြင့်တက်နေချိန်မှာပဲ အခုလို ရဟတ်ယာဉ်တစ်စီး ဆုံးရှုံးခဲ့ရတာပါ။
ဒီအခြေအနေနဲ့ပတ်သက်ပြီး မီဒီယာတစ်ခုဖြစ်တဲ့ CNN က အရှေ့အလယ်ပိုင်းစစ်ဆင်ရေးတွေကို တာဝန်ယူရတဲ့ အမေရိကန် ဗဟိုစစ်ဌာနချုပ်(Central Command) ထံ မှတ်ချက်ပေးဖို့ တောင်းဆိုထားပါတယ်။
အဲဒီ အပါချီရဟတ်ယာဉ်ဟာ ပျက်ကျချိန်မှာ ဘာမစ်ရှင်လုပ်နေလဲဆိုတာ သဲသဲကွဲကွဲမရှိသေးပေမဲ့ အရင်ကတော့ အမေရိကန်က အီရန်ဆိပ်ကမ်းတွေကို ပိတ်ဆို့ထားတဲ့ စစ်ဆင်ရေးရဲ့ တစ်စိတ်တစ်ပိုင်းအဖြစ် အီရန်ရဲ့ ရေယာဉ်အငယ်စားတွေကို တိုက်ခိုက်တဲ့နေရာမှာ ဒီရဟတ်ယာဉ်တွေကို အသုံးပြုခဲ့ဖူးပါတယ်။ ဗဟိုစစ်ဌာနချုပ်ရဲ့ ဝဘ်ဆိုက်အဆိုအရ အပါချီရဟတ်ယာဉ်တွေကို ပစ်မှတ်တိကျတဲ့ တိုက်ခိုက်မှုတွေ၊ လေကြောင်းပစ်ကူပေးမှုတွေနဲ့ လေကြောင်းကင်းထောက်လုပ်ငန်းတွေမှာ အဓိကအသုံးပြုတာ ဖြစ်ပါတယ်။
တကယ်လို့သာ အခုဖြစ်စဉ် အတည်ပြုနိုင်ခဲ့ရင် ဒါဟာ အီရန်နဲ့ ပဋိပက္ခစတင်ကတည်းက ပထမဆုံးအကြိမ် အပါချီရဟတ်ယာဉ် ဆုံးရှုံးရမှု ဖြစ်လာမှာပါ။
မေလက ထုတ်ပြန်ခဲ့တဲ့ လွှတ်တော်သုတေသနဌာနရဲ့ အစီရင်ခံစာအရ ပြီးခဲ့တဲ့ ဖေဖော်ဝါရီလနှောင်းပိုင်း အီရန်နဲ့ စစ်ပွဲစတင်ကတည်းက အမေရိကန်စစ်တပ်ဟာ တိုက်လေယာဉ် အနည်းဆုံး ၅ စီး၊ Stratotanker ဆီဖြည့်လေယာဉ် ၇ စီး၊ ရှာဖွေရေးနဲ့ ကယ်ဆယ်ရေးရဟတ်ယာဉ် ၁ စီးနဲ့ ဒရုန်းယာဉ် အစီးရေ ၂၀ ကျော်အပါအဝင် စစ်ဘက်သုံး လေယာဉ်/ရဟတ်ယာဉ် အမြောက်အမြား ဆုံးရှုံးခဲ့ရပြီး ဖြစ်ပါတယ်။
ဧပြီလဆန်းပိုင်းကလည်း အီရန်နိုင်ငံအတွင်း ပစ်ချခံခဲ့ရတဲ့ F-15E Strike Eagle တိုက်လေယာဉ်ရဲ့ လေသူရဲတစ်ဦးကို ကယ်ဆယ်ဖို့အတွက် အမေရိကန်စစ်တပ်ဟာ စွန့်စွန့်စားစား စစ်ဆင်ရေးတစ်ရပ် ဆင်နွှဲခဲ့ရပါသေးတယ်။ အမေရိကန် စစ်ဘက်နဲ့ ထောက်လှမ်းရေး ဝန်ထမ်းပေါင်း ရာနဲ့ချီ (အထူးစစ်ဆင်ရေးတပ်ဖွဲ့တွေအပါအဝင်) ပါဝင်တဲ့ အဲဒီလျှို့ဝှက်မစ်ရှင်အတွင်း အီရန်မြေပေါ်မှာတင် မိမိတို့ရဲ့ အထူးစစ်ဆင်ရေးသုံး လေယာဉ် ၂ စီးကိုပါ အမေရိကန်စစ်တပ်က ကိုယ်တိုင် ပြန်လည်ဖောက်ခွဲ ဖျက်ဆီးခဲ့ရပါတယ်။
ဒါ့အပြင် မတ်လတုန်းကလည်း အီရတ်နိုင်ငံအနောက်ပိုင်းမှာ KC-135 Stratotanker ဆီဖြည့်လေယာဉ်တစ်စီး ပျက်ကျခဲ့လို့ လေယာဉ်ပေါ်ပါသူ အမှုထမ်း ၆ ဦးစလုံး သေဆုံးခဲ့ရပြီး၊ အဲဒီမတိုင်ခင် ရက်ပိုင်းအလိုမှာပဲ အမေရိကန် F-15 တိုက်လေယာဉ် ၃ စီးဟာ ကူဝိတ်လေကြောင်းရန်ကာကွယ်ရေးတပ်ဖွဲ့ရဲ့ မှားယွင်းပစ်ခတ်မှုကြောင့် ပစ်ချခံခဲ့ရကာ လေသူရဲတွေအားလုံးကတော့ အချိန်မီ လေထီးခုန်လွတ်မြောက်ခဲ့ကြပါတယ်။
ဆော်ဒီအာရေဗျက အမေရိကန်လေတပ်အခြေစိုက်စခန်းကို အီရန်က တိုက်ခိုက်ခဲ့စဉ်ကလည်း လေယာဉ်အတော်များများ ပျက်စီးခဲ့ရသလို၊ အချို့လေယာဉ်တွေကတော့ လေထဲမှာပျံသန်းနေတုန်း အီရန်ရဲ့ ပစ်ခတ်မှုကြောင့် ပျက်စီးမှုတွေ ကြုံခဲ့ရဖူးပါတယ်။