ပဲခူးမြို့တွင် ပဲခူးမြစ်ရေမြင့်တက်မှုကြောင့် ရေဘေးယာယီကယ်ဆယ်ရေးစခန်း ၁၃ ခုဖွင့်လှစ်၍ လူဦးရေထောင်ကျော်အား ရွှေ့ပြောင်းနေရာချထားပေးရကြောင်း ဒေသခံလူမှုကူညီရေးအသင်းများမှ သိရသည်။
ပဲခူးမြို့တွင် မိုးသည်းထန်စွာရွာသွန်းပြီး ပဲခူးမြစ်ရေမြင့်တက်လာမှုကြောင့် မြို့တွင်းရှိ အနိမ့်ပိုင်းရပ်ကွက်များအတွင်းနှင့်ကျေးရွာများအတွင်းရှိ နေအိမ်များအတွင်းသို့ ရေဝင်ရောက်ကာ လမ်းများပေါ်တွင်လည်း ရေကျော်လျက်ရှိကြောင်း သိရသည်။
“ရေဘေးရှောင်လူဦးရေအတိအကျကိုတော့ သေချာမသိရသေးဘူး၊ ရေဘေးရှောင်ယာယီကယ်ဆယ်ရေးစခန်းကတော့ ၁၃ ခုဖွင့်ထားရတယ်၊ လက်ရှိ ကျွန်တော်တို့အသင်းက လမ်းရေကျော်တာတွေဖြစ်နေတဲ့ ကျွန်းသာယာရပ်ကွက်၊ ခေါင်းဆေးကျွန်းနေရာ၊ မဇင်း(၁)လမ်းထိပ်နဲ့ ဇိုင်း/မြောက်၊ ဇိုင်း/တောင်ရပ်ကွက်ကြားက မင်းလမ်းမ အဲဒီနေရာတွေမှာဖြတ်သန်းသွားလာနေတဲ့ ကားတွေ ဆိုင်ကယ်တွေ လူတွေ အန္တရာယ်မဖြစ်အောင် ကူညီပေးနေပါတယ်”ဟု လူမှုကူညီရေးအသင်းဝင်တစ်ဦးကပြောသည်။
လက်ရှိအချိန်၌ ရေဘေးရှောင်ယာယီကယ်ဆယ်ရေးစခန်းများတွင် ခိုလှုံနေသူများအား တာဝန်ရှိသူများ၊အလှူရှင်များနှင့်လူမှုကူညီရေးအသင်းဝင်များက အခြေခံစားသောက်ကုန်၊သောက်သုံးရေနှင့်ဆေးဝါးများအား ထောက်ပံ့လှူဒါန်းပေးလျက်ရှိကြောင်း သိရသည်။
ဇိုင်း/တောင်ရပ်ကွက်ရှိ ကျောင်းသစ်ဘုန်းတော်ကြီးကျောင်း၊ ကျွန်းသာယာရပ်ကွက်ရှိ မင်္ဂလာဇေယျုံကျောင်းတိုက်၊ ပုဏ္ဏားစုရပ်ကွက်ရှိ အောင်ဇေယျုံတပြားဘုရားဓမ္မာရုံ၊ ကျောက်ကြီးစုရပ်ကွက်ရှိ အ.ထ.က (ခွဲ)(၁)၊ မြို့သစ်ရပ်ကွက်ရှိ ဆုတောင်းပြည့်ဘုန်းကြီးကျောင်း၊ ဇောင်းတူကျေးရွာရှိ သာယာကုန်း (ခရစ်ယာန်ကျောင်း)၊ လက်ပံကျေးရွာရှိ စာသင်ကျောင်း၊ မုန်တိုင်းကျေးရွာရှိ မုန်တိုင်းဘုန်ကြီးကျောင်း၊ ဝါးပြန်ကုန်းကျေးရွာရှိ ဘုရားကုန်းဘုရားဝန်း၊ ဥဿာ (၇)ရပ်ကွက်ရှိ ပညာမွန်ကျောင်း၊ ဒက္ခိဏသာခါကျောင်း၊ ကလျာဏီရပ်ကွက်ရှိ ကလျာဏီသိမ်နှင့် ဇိုင်း/မြောက် အ.ထ.က (၄)တို့အား ရေဘေးရှောင်ယာယီကယ်ဆယ်ရေးစခန်းများအဖြစ် ဖွင့်လှစ်ပေးထားကြောင်း သိရသည်။
