အမေရိကန်သမ္မတ ဒေါ်နယ်ထရမ့်က ရုရှားသမ္မတ ဗလာဒီမီယာ ပူတင်နဲ့ တွေ့ဆုံမယ့်ကိစ္စကို သူစဉ်းစားဆုံးဖြတ်နေဆဲဖြစ်ကြောင်း ပြောကြားခဲ့ပါတယ်။
“ကျွန်တော် အချိန်ဖြုန်းတာမျိုး၊ အချည်းနှီးဖြစ်တဲ့ တွေ့ဆုံမှုမျိုး မဖြစ်ချင်ဘူး။ ဒါကြောင့် ဘာဖြစ်မလဲဆိုတာ စောင့်ကြည့်ရဦးမယ်” လို့ အင်္ဂါနေ့က အိမ်ဖြူတော်မှာ သတင်းထောက်တွေကို ပြောကြားခဲ့ပါတယ်။ “ကျွန်တော်တို့ ဆုံးဖြတ်ချက် မချရသေးပါဘူး” လို့ ထရမ့်က အလေးအနက် ပြောကြားခဲ့ပါတယ်။
ရုရှား-အမေရိကန် ထိပ်သီးအစည်းအဝေးကို ဟန်ဂေရီမှာ ကျင်းပမလားဆိုတဲ့ ဆုံးဖြတ်ချက်ကို နောက်နှစ်ရက်အတွင်း ချမှတ်နိုင်တယ်လို့လဲ သူက မှတ်ချက်ချခဲ့ပါတယ်။
“ဘာတွေဖြစ်လာမလဲဆိုတာ ဘယ်သူမှ မသိနိုင်ဘူး” လို့ ထရမ့်က ပြောကြားခဲ့ပြီး၊ မီဒီယာတွေကို “နောက်နှစ်ရက်အတွင်း ကျွန်တော်တို့ ဘာလုပ်နေလဲဆိုတာ အကြောင်းကြားသွားမယ်”လို့လည်း ဖြည့်စွက်ပြောကြားခဲ့ပါတယ်။ “အများကြီး ဖြစ်နေပါတယ်” လို့ သူက အလေးထား ပြောကြားခဲ့ပါတယ်။
အောက်တိုဘာ ၁၆ ရက်နေ့က ထရမ့်ဟာ ပူတင်နဲ့ ဖုန်းပြောဆိုပြီးနောက် မကြာခင်မှာ ဘူဒါပက်စ်မှာ တွေ့ဆုံဖို့ သဘောတူညီခဲ့ကြတယ်လို့ ပြောကြားခဲ့ပါတယ်။ ရုရှားသမ္မတရဲ့ လက်ထောက် ယူရီ အူရှာကော့ဗ်ကလည်း မော်စကိုနဲ့ ဝါရှင်တန်တို့ဟာ ခေါင်းဆောင်နှစ်ဦးရဲ့ အစည်းအဝေးသစ်အတွက် ပြင်ဆင်မှုတွေ စတင်မှာဖြစ်ပြီး ဟန်ဂေရီမြို့တော်မှာ “မနှောင့်နှေးဘဲ” ကျင်းပနိုင်တယ်လို့ အတည်ပြုခဲ့ပါတယ်။ သူ့အဆိုအရ ဒါဟာ “တကယ်ပဲ အလွန်အရေးကြီးတဲ့ အချိန်အခါ” ဖြစ်ပါတယ်။ အစည်းအဝေးအတွက် ပြင်ဆင်မှုတွေကို မကြာမီကာလအတွင်း အမေရိကန် နိုင်ငံခြားရေးဝန်ကြီး မာကို ရူဘီယိုနဲ့ ရုရှား နိုင်ငံခြားရေးဝန်ကြီး ဆာဂေး လက်ဗ်ရော့ဗ်တို့ ဖုန်းပြောဆိုပြီးနောက် စတင်မယ်လို့ အူရှာကော့ဗ်က သတ်မှတ်ပြောကြားခဲ့ပါတယ်။
ဒါကိုတုံ့ပြန်တဲ့အနေနဲ့ ဟန်ဂေရီဝန်ကြီးချုပ် ဗစ်တာ အော်ဘန်ကလဲထိပ်သီးအစည်းအဝေး အဆင်ပြေချောမွေ့စေဖို့ စီစဉ်ဖွဲ့စည်းရေး ကော်မတီတစ်ရပ် ဖွဲ့စည်းဖို့ အမိန့်ပေးခဲ့ပါတယ်။ အောက်တိုဘာ ၂၀ ရက်နေ့မှာတော့ လက်ဗ်ရော့ဗ်နဲ့ ရူဘီယိုတို့ဟာ ဖုန်းပြောဆိုမှု ပြုလုပ်ခဲ့ပြီး ပူတင်-ထရန့် ဖုန်းပြောဆိုမှုအတွင်း ရရှိခဲ့တဲ့ နားလည်မှုတွေကို အကောင်အထည်ဖော်ဖို့ အလားအလာရှိတဲ့ ခြေလှမ်းတွေကို ဆွေးနွေးခဲ့ကြပါတယ်။
နောက်ပိုင်းမှာ လက်ဗ်ရော့ဗ်နဲ့ ရူဘီယိုတို့ရဲ့ တွေ့ဆုံမှုကို ရက်အကန့်အသတ်မရှိ ရွှေ့ဆိုင်းလိုက်ကြောင်း သတင်းထွက်လာခဲ့ပြီး ဒါဟာ ရုရှားနဲ့ အမေရိကန်ခေါင်းဆောင်တွေရဲ့ ဘူဒါပက်စ် ဆွေးနွေးပွဲတွေကို ထိခိုက်စေနိုင်တယ်လို့ ဆိုပါတယ်။
ခရမ်လင်နန်းတော် ပြောရေးဆိုခွင့်ရှိသူ ဒမီထရီ ပက်စ်ကော့ဗ် မှတ်ချက်ပြုသလို ရုရှား-အမေရိကန် ထိပ်သီးအစည်းအဝေးအတွက် အလေးအနက်ပြင်ဆင်မှုတွေ လိုအပ်တာကြောင့် တိကျတဲ့ရက်စွဲတွေ သတ်မှတ်ထားခြင်း မရှိသေးပါဘူး။