မြန်မာ – ဘင်္ဂလားဒေ့ရှ် အစိုးရချင်း နားလည်မှုဖြင့် ဆန်များ တင်ပို့လျက်ရှိ ဧရာဝတီတိုင်း ဒေသကြီး ပုသိမ်စက် မှုမြို့တော်ဆိပ်ကမ်းမှ ဆန်တန်ချိန် ၁၀၅၆၅ တန်ကို ပထမသုတ်အနေဖြင့် တင်ပို့နိုင်ခဲ့ကြောင်း သိရသည်။
အဆိုပါ ဆန်တန်ချိန် ၁၀၅၆၅ တန်သည် နှစ်နိုင်ငံ အစိုးရချင်းသဘောတူညီမှုဖြင့် မြန်မာနိုင်ငံမှ ဘင်္ဂလားဒေ့ရှ်သို့ တင်ပို့မည် ဆန်တန်ချိန် (၃) သိန်းတွင် ပါဝင်ကြောင်း သိရသည်။
ယခုနှစ် နိုဝင်ဘာလ (၂) ရက်မှ နိုဝင်ဘာ (၂၂) ရက်အထိပုသိမ် စက်မှုမြို့တော်ဆိပ်ကမ်းမှ ဘင်္ဂလားဒေ့ရှ်နိုင်ငံသို့တိုက်ရိုက်တင်ပို့ နိုင်ခဲ့ခြင်းဖြစ်ကြောင်း နိုင်ငံပိုင်သတင်းစာမှတဆင့် သိရသည်။
နိုဝင်ဘာ (၂) ရက်တွင် ပထမအကြိမ်အနေဖြင့် ပုသိမ်စက်မှုမြို့တော်ဆိပ်ကမ်းမှ ဆန်တန်ချိန် ၂၆၅၀ တန်ကို ဧရာဟင်္သာကုမ္ပဏီမှ သင်္ဘောဖြင့် ဘင်္ဂလားဒေ့ရှ်နိုင်ငံသို တိုက်ရိုက် စတင်တင်ပို့ခဲ့ကြောင်း သိရသည်။
ထို့နောက် နိုဝင်ဘာလ (၇) ရက်တွင် ဆန်တန်ချိန် ၂၆၁၅ တန်၊ နိုဝင်ဘာ ( ၁၃) ရက်နှင့် နိုဝင်ဘာလ (၂၂) ရက်တို့တွင် ဆန်တန်ချိန် ၂၆၅၀ တန်တို့ကို အသီးသီး တင်ပို့နိုင်ခဲ့ကြောင်း နိုင်ငံပိုင် သတင်းစာမှတဆင့် သိရသည်။
ထို့အပြင် လာမည့် ဒီဇင်ဘာလ ဒုတိယပတ်အတွင်း ဘင်္ဂလားဒေ့ရှ်နိုင်ငံသို့ မြန်မာ့ဆန်တင်ပို့မှု ဒုတိယ အသုတ်တင်ပို့နိုင်ရန်နှင့် အရည်အသွေးကောင်းမွန်သည့် ဆန်များတင်ပို့နိုင်ရေး သက်ဆိုင်ရာ ဝန်ကြီးဌာနနှင့် ပို့ကုန်လုပ်ငန်းရှင်များက စီစဉ်ဆောင်ရွက်လျက်ရှိကြောင်းလည်း သိရသည်။
မြန်မာနိုင်ငံအနေဖြင့် ဘင်္ဂလားဒေ့ရှ်နိုင်ငံသို့ တန်းမြင့်ဆန်တန်ချိန် (၂) သိန်းခွဲနှင့် ပေါင်းဆန်တန်ချိန် (၅) သောင်း တင်ပို့ရန် သဘောတူညီမှု ရရှိထားပြီး မြန်မာနိုင်ငံ ဆန်စပါးအသင်းချုပ်က ဦးဆောင်ကာ တင်ပို့ပေးနေခြင်း ဖြ စ်သည်။
စက်တင်ဘာ လအတွင်းက သက်တမ်းတိုးခဲ့သည့် အဆို ပါ သဘောတူညီမှုအရ မြန်မာနိုင်ငံအနေဖြင့် ၂၀၂၂ ခုနှစ်မှ ၂၀၂၇ ခုနှစ်အထိ ဘင်္ဂလားဒေ့ရှ်နိုင်ငံသို့ နှစ်စဉ်အများဆုံး ဆန်ဖြူတန်ချိန် (၂)သိန်း (၅)သောင်းနဲ့ ပေါင်းဆန်တန်ချိန် (၅)သောင်းအထိ တင်ပို့ရောင်းချနိုင်မည်ဖြစ် သ ည်။
ယင်း သဘောတူညီချက်အရ မြန်မာ့ဆန်ဖြူ (၁) တန်ကို ကုန်ကျစရိတ်၊ အာမခံငွေကြေး၊ သယ်ယူပို့ဆောင်စရိတ်အပါအဝင် (၁)တန်ကို အမေရိကန်ဒေါ်လာ (၄၆၅.၅၀) သ တ်မှတ်ထားပြီး လက်ရှိတွင် ဆန်တန်ချိန် (၁) သိန်းနီးပါး တင်ပို့ ထားနိုင်ကြောင်း သိရသည်။
အဆိုပါ ဆန်တင်ပို့မှု လုပ်ငန်းစဉ်ထဲမှ တစ်ခုအပါအဝင်အနေဖြင့် ယခုလဆန်းပိုင်းမှ စတင်ကာ ဧရာဝတီတိုင်းအတွင်းရှိ ပုသိမ်စက်မှုမြို့တော်ဆိပ်ကမ်းမှ တိုက်ရိုက်တင်ပို့မှု စတင်နိုင်ခဲ့ခြင်း ဖြစ်ပြီး ဒုတိအကြိမ် ဆန်တင်ပို့မှုအတွက် ဧရာဝတီတိုင်းအတွင်းရှိ ဆန်စက်များတွင် အရည်အသွေးမီသည့် ကြိတ်ခွဲမှုများ လုပ်ဆောင်နေကြောင်းလည်း သိရသည်။
