ရန်ကုန်တိုင်း၊ပုဇွန်တောင်မြို့နယ်၊အထက်ပုဇွန်တောင်လမ်းရှိ CB ဘဏ်ခွဲတွင် မတ် ၁ ရက်(ယ နေ့)နံနက်ပိုင်း ၁၀နာရီခွဲခန့်က အမျိုးသား ၂ ဦးက ပစ္စတိုသေနတ်အတု၊ဓားမြှောင်တို့ဖြင့်ခြိမ်းခြောက်၍ ဘဏ်ကောင်တာပေါ်တွင်တင်ထားသည့် ပိုက်ဆံများအားလုယက်ခဲ့ကြသည်။
ထိုသို့ လုယက်ပြီးနောက် ထွက်ပြေးရန်ပြုလုပ်စဥ် လုံခြုံရေးအဖွဲ့ဝင်များက ဝိုင်းဝန်းဖမ်းဆီးခဲ့ကြသဖြင့် လုယက်သူ ၂ ဦးအား ဖမ်းဆီးရမိခဲ့သည်ဟု သိရသည်။
” ၂ ယောက်လုံးကိုဖမ်းမိတယ်။ ရဲတွေပြောတာကြားရသလောက်ဆိုရင် သူတို့ ၂ ယောက်က ပုဇွန်တောင်မှာပဲနေတာလို့ကြားတယ်။ သေနတ်ကအတု ဓားမြှောင်ကတော့အစစ်ပါ။ ရဲတပ်ဖွဲ့ဝင်တွေက ဘဏ်မှာဓားမြတိုက်နေတယ်သတင်းရလို့ ချက်ခြင်းရောက်လာပြီး ဖမ်းလိုက်ကြတာ။ ပိုက်ဆံက သိန်း ၆၅၀ လောက်ရှိတယ်လို့သိရတယ်”ဟု ပုဇွန်တောင်မြို့နယ်နေသူတစ်ဦးကပြောသည်။
ဖြစ်စဥ်တွင် ပြစ်မှုကျူးလွန်သူ ၂ ဦးအား ဥပဒေအရထိရောက်စွာအရေးယူနိုင်ရန် သက်ဆိုင်ရာရဲစခန်းသို့ ပို့ဆောင်ခဲ့ကြကြောင်း သိရသည်။
