ရန်ကုန် ဩဂုတ် ၃
ဘဏ် အမျိုးအစားအလိုက် နိုင်ငံခြားသားပါဝင်မှုကို ဗဟိုဘဏ်က စာထုတ်ကန့်သတ်လိုက် တယ်လို့သိရပါတယ်။
ပုဂ္ဂလိကဘဏ်တွေမှာနိုင်ငံခြားသားပါဝင်မှုနဲ့ ပတ်သတ်ပြီး ဘဏ်ကြီးတွေဆိုရင် ၂၅ ဦးထက်မပိုရ၊ ဘဏ်လတ်ဆိုရင် ၁၅ ဦးထက် မပိုရ၊ ဘဏ်သေးဆိုရင်တော့ ၈ ဦးထက် မပိုရဘူးဆိုပြီး ပုဂ္ဂလိကဘဏ်နိုင်ငံခြားသားဝန်ထမ်းခန့်အပ်နိုင်တဲ့ အများဆုံးဦးရေကို ကန့်သတ်သတ်မှတ်လိုက်တာပါ။
နောက်ပြီး ဘဏ်တွေအနေနဲ့ နိုင်ငံခြားသားဝန်ထမ်းတွေ ခန့်အပ်ရာမှာ ဗဟိုဘဏ်ထံ ရက်ပေါင်း၃၀ကြိုတင်တင်ပြဖို့လည်း ဗဟိုဘဏ်က ထုတ်ပြန်စာထဲထည့်သွင်းအသိပေးထားတာကိုတွေ့ရပါတယ်။
ဒါ့အပြင် နိုင်ငံသားပိုင်ဘဏ်တွေမှာ နိုင်ငံခြားသားတွေကို ဘဏ်ဥက္ကဌ သိုတည်းမဟုတ် ဒုတိယ ဥက္ကဌတွေအဖြစ် ခန့်အပ်ခြင်းမပြုဖို့လည်း ညွန်ကြားလိုက်ပါသေးတယ်။
ပုဂ္ဂလိကဘဏ်တွေအနေနဲ့ နိုင်ငံခြားသားတွေကို ဘဏ်အမှုဆောင် အရာရှိချုပ်ရာထူးကို ခန့်အပ်ထားတယ်ဆိုရင် ဒုတိယ အမှုဆောင် အရာရှိချုပ်ရာထူးကို မြန်မာနိုင်ငံသားကိုပဲ ခန့်အပ်ဖို့နိုင်ငံခြားသား ဝန်ထမ်းတွေကို ဌာနအကြီးအကဲအဖြစ် ခန့်အပ်မယ်ဆိုရင်လည်း မိမိတို့ဘဏ်ရှိ ဌာနအရေအတွက်ရဲ့ ၅၀ရာခိုင်နှုန်းထိပဲ ခန့်အပ်ရမယ်လို့လည်း ဗဟိုဘဏ် ကညွန်ကြားထားပါသေးတယ်။
နောက်ပြီး နိုင်ငံခြားသားဝန်ထမ်းကို ဌာနအကြီးအကဲ အဖြစ်ခန့်အပ်မယ်ဆိုရင် အစမ်းခန့်ကာလ (၁)နှစ်၊ ဌာနအကြီးအကဲ အောက်ဖြစ်ပါက အစမ်းခန့်ကာလ(၆) ခန့်အပ်ရန် ဗဟိုဘဏ်ဘက်ကခွင့်ပြုမှာဖြစ်ပြီး အတည်ပြုခန့်အပ်ခြင်းကို အစမ်းခန့် ကာလအပါအဝင် အများဆုံး (၃)နှစ် ခွင့်ပြုမယ်လို့လည်း ဗဟိုဘဏ်က ထုတ်ပြန်စာထဲထည့်သွင်းအသိပေးထားတာကိုတွေ့ရပါတယ်။