ဗဟိုဘဏ်အနေဖြင့် နိုင်ငံခြားငွေလဲနှုန်း ရည်ညွှန်းဈေးကို ပြောင်းလဲသတ်မှတ်ရန် အစီအစဉ်မရှိသေး
ပြည်ပသို့ ပို့ကုန်တင်ပို့သူများအနေဖြင့် မိမိတို့၏ ပို့ကုန်ရငွေထဲမှ ၅၀ ရာခိုင်နှုန်းကိုသာ ဗဟိုဘဏ်သတ်မှတ်နှုန်းအတိုင်း ပြန်လဲလှယ်ကြရန် ပြောင်းလဲသတ်မှတ်လိုက်ခြင်းသည် ပို့ကုန်လုပ်ငန်းရှင်များအတွက် အကျိုးအမြတ်ပိုမိုရရှိလာနိုင်ကြောင်း သုံးသပ်မှုများ ရှိနေသည်။
မြန်မာနိုင်ငံ ဗဟိုဘဏ်က ယခင်ညွှန်ကြားထားသည့် ၆၅ ရာခိုင်နှုန်းလဲလှယ်ရမည့် ညွှန်ကြားချက်အား ဇူလိုင် (၁၃) ရက် ရက်စွဲဖြင့် ၅၀ ရာခိုင်နှုန်းသို့ ပြောင်းလဲ သတ်မှတ်ခဲ့ခြင်း ဖြစ်သည်။
အဆိုပါ ညွှန်ကြားချက်အရ ပို့ကုန်သမားများ၏ ပို့ကုန်ရငွေမှ ၅၀ ရာခိုင်နှုန်းကို တစ်ရက်အတွင်း ဗဟိုဘဏ် ရည်ညွှန်းဈေး တစ်ဒေါ်လာ ၂၁၀၀ ကျပ်နှုန်းဖြင့် ပြန်လည်လဲလှည်ရမည်ဖြစ်ပြီး ကျန် ၅၀ ရာခိုင်နှုန်းကို မိမိကိုယ်တိုင်သုံးစွဲနိုင်သလို online trading တွင်လည်း လွတ်လပ်စွာ ရောင်းဝယ်နိုင်ခွင့် ရှိမည် ဖြစ်သည်။
လက်ရှိတွင် Exporter နှင့် Importer များ အနေဖြင့် ဗဟိုဘဏ်မှ စီစဉ်ပေးသည့် Online Trading စနစ်ဖြင့် နိုင်ငံခြားငွေကို ဘဏ်များမှတဆင့် ဈေးကွက်ပေါက်ဈေးဖြင့် ဝယ်ယူဆောင်ရွက်နေကြသဖြင့် နိုင်ငံခြား ငွေကြေးဈေးကွက်မှာ တည်ငြိမ်မှုရှိလာပြီဖြစ်သောကြောင့် ပို့ကုန်လုပ်ငန်းရှင်များအနေဖြင့် အကျိုးအမြတ်များ ပိုမိုရရှိလာနိုင်မည်ဖြစ်ကြောင်း သုံးသပ်မှုများလည်း ရှိနေသည်။
လက်ရှိ ပို့ကုန်ကဏ္ဍ၌ တင်ပို့နေသည့် ကုန်ပစ္စည်းများတွင် ဝယ်ယူရသည့်အရင်းပေါ်မူတည်ပြီး အရင်းသာ သာမျှသာရရှိသည့် ကုန်စည်များအနေဖြင့်လည်း ယခင်ကထက် အမြတ်အစွန်း ပိုမိုရရှိလာနိုင်ချေရှိ နိုင်ငံခြားငွေကြေးဈေးနှုန်းလည်း ကျဆင်းလာနိုင်ချေရှိကြောင်း စီးပွားရေး လုပ်ငန်းရှင်အချို့က သုံးသပ်ကြသည်။
“၅၀ /၅၀ သတ်မှတ်လိုက်တော့ အရင်ထက်စာရင် အသက်ရှူချောင်သွားတာပေါ့” ဟု ပြည်တွင်းရှိ ပို့ကုန်/သွင်းကုန်လုပ်ငန်းလုပ်ကိုင်သည့် စီးပွားရေး လုပ်ငန်းရှင်တစ်ဦးက သုံးသပ်သည်။
ထို့အပြင် ဗဟိုဘဏ်က ဇူလိုင်လ (၁၃) ရက် နေ့စွဲဖြင့် ပြောင်းလဲသတ်မှတ်လိုက်သည့် သတ်မှတ်ချက်နှင့်ပတ်သက်၍ ပို့ကုန်များပိုမိုတင်ပို့ရန် တွန်းအားတစ်ရပ်ဖြစ်သည့်အတွက် ဝမ်းမြောက်ဝမ်းသာကြိုဆိုကြောင်း မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် UMFCCI ကလည်း ပြောကြားထားသည်။
ဗဟိုဘဏ်အနေဖြင့်လည်း နိုင်ငံခြားငွေလဲနှုန်းရည်ညွှန်းဈေးကို ပြောင်းလဲသတ်မှတ်ရန် အစီအစဉ်မရှိသေးကြောင်းနှင့် ဈေးကစားရန် ကြံစည်သူများကို တည်ဆဲဥပဒေများဖြင့် ထိရောက်စွာ အရေးယူသွားမည်ဖြစ်ကြောင်း ဗဟိုဘဏ်တာဝန်ရှိသူတစ်ဦးက ပြောကြားထားသည်။