တရုပ် (တိုင်ပေ)၊ဇူလိုင် ၉
တရုတ်နိုင်ငံဘက်မှ ထိုင်ဝမ်၏မဟာမိတ်များ တဖြည်းဖြည်းလျော့နည်းလာရန်ကြိုးပမ်းနေချိန်၌ ပါရာဂွိုင်းနိုင်ငံ၏ရွေးကောက်ပွဲ အနိုင်ရ သမ္မတ ဆန်တီယာဂိုပီနာသည် ယခုတစ်ပတ်အတွင်း ထိုင်ဝမ်သို့သွားရောက်လည်ပတ်ကာ သမ္မတဆိုင်အင်ဝမ်နှင့်တွေ့ဆုံမည်ဖြစ်ကြောင်းပြောကြားခဲ့သည်။
ပါရာဂွိုင်း နိုင်ငံသည် ထိုင်ဝမ်နှင့်တရားဝင်သံတမန်ဆက်ဆံရေးရှိသည့် နောက်ဆုံးသောတောင်အမေရိကနိုင်ငံတစ်နိုင်ငံဖြစ်ပြီး ထိုင်ဝမ်သည် ဟွန်ဒူးရပ်စ်အပါအဝင် အခြား သော လက်တင်အမေရိကနိုင်ငံများထံမှ ထောက်ခံမှုများကိုမကြာမီအချိန်တွင်းကဆုံးရှုံးခဲ့ရသည်။
ယခုအခါထိုင်ဝမ်သည် အမေရိကအလယ်ပိုင်း၊ကာရေဘီယံနှင့်ပစိဖိတ်ဒေသများရှိ ဆင်းရဲနွမ်းပါးပြီး ဖွံ့ဖြိုးဆဲနိုင်ငံများဖြစ်သည့် နိုင်ငံပေါင်း ၁၃ နိုင်ငံနှင့်သာ တရားဝင်သံတမန်ဆက်ဆံရေးရှိတော့ကြောင်းသိရသည်။ ထိုင်ဝမ်၏မိတ်ဖက်နိုင်ငံများအပေါ် လွှမ်းမိုးနိုင်ပြီး အထူးသဖြင့်လက်တင်အမေရိကနိုင်ငံများသို့ တရုတ်၏ဩဇာချဲ့ထွင်ရန်ကြိုးပမ်းမှုများက ဝါရှင်တန်အတွက်သတိပေးချက်တစ်ခုလည်းဖြစ်လာခဲ့သည်။
ပါရာဂွိုင်း သမ္မတသစ် ပီနာကမူ ထိုင်ဝမ်သမ္မတအား ၎င်း၏အထူးမိတ်ဆွေဟုခေါ်ဝေါ်သုံးစွဲခဲ့ပြီး ယူအေအီးနိုင်ငံမြို့တော်အဘူဒါဘီမှအပြန်တွင် ထိုင်ဝမ်သို့သွားကာသမ္မတဆိုင်အင်ဝမ်နှင့်တွေ့ဆုံမည်ဖြစ်ကြောင်း ၎င်း၏တွစ်တာအကောင့်၌ရေးသားဖော်ပြခဲ့သည်။ထို့ပြင်မစ္စတာပီနာသည် ၎င်း၏မဲဆွယ်ကာလကလည်း ထိုင်ဝမ်နှင့်သံတမန်ဆက်ဆံရေးခိုင်မြဲအောင်ဆောင်ရွက်မည်ဟုလည်းကတိပြုထားသူတစ်ဦးဖြစ်သည်။
မစ္စတာပီနာသည်၎င်း၏အစိုးရသစ်အဖွဲ့ဝင်များနှင့်အတူ ယခုခရီးစဉ်အားသွားရောက်မည်ဖြစ်ပြီး ၎င်းအစိုးရအဖွဲ့မှနိုင်ငံခြားရေးနှင့်ဘဏ္ဍာရေးဝန်ကြီးများလည်းပါဝင်မည်ဖြစ်ကာ ထိုင်ဝမ်နှင့်ပါရာဂွိုင်း တို့၏ ၆၆ နှစ်မြောက်သံတမန်ဆက်ဆံရေးအထိမ်းအမှတ်ကိုလည်း ပြုလုပ်ကျင်းပသွားမည်ဖြစ်ကြောင်းသိရသည်။
Source : Reuters