ပါကစ္စတန်အနောက်ပိုင်းတွင် ယနေ့တနင်္ဂနွေနေ့ (ဇန်နဝါရီ ၂၉ ရက်)၌ ဘတ်စ်ကားတစ်စီး တံတားပေါ်ကနေ ပြုတ်ကျခဲ့သလို၊ အနောက်မြောက်ပိုင်းတွင်လည်း ကျောင်းသားငယ်များ တင်ဆောင်လာသည့် လှေတစ်စင်းလည်း တိမ်းမှောက်ခဲ့ပြီး ယင်းဖြစ်ပွားမှု ၂ ခုတွင် စုစုပေါင်း လူ ၅၁ ဦးထက်မနည်း သေဆုံးခဲ့ကြောင်း သိရသည်။
ပါကစ္စတန်နိုင်ငံ အနောက်တောင်ပိုင်း Balochistan ပြည်နယ်ရှိ လျှိုတစ်ခုတွင် ဘတ်စ်ကား တိမ်းမှောက်ပြုတ်ကျမှုကြောင့် လူ ၄၀ ထက်မနည်း သေဆုံးခဲ့ကြောင်း သက်ဆိုင်ရာကအတည်ပြုခဲ့ပြီး၊ အနောက်မြောက်ပိုင်း Khyber Pakhtunkhwa ဒေသ လှေမှောက်မှုတွင်မူ ကျောင်းသားငယ် ၁၀ ဦးထက်မနည်း သေဆုံးခဲ့ကြောင်း တာဝန်ရှိသူများက ပြောကြားခဲ့သည်။ ရေထဲတွင် ကိုးဦးအထိ ပျောက်ဆုံးနေဆဲဖြစ်ကြောင်း ဒေသဆိုင်ရာ ရဲတပ်ဖွဲ့က ပြောကြားခဲ့သည်။
ခရီးသည် ၄၈ ဦး တင်ဆောင်လာသည့် ဘတ်စ်ကားသည် တံတားတိုင်ကို တိုက်မိပြီး တနင်္ဂနွေနေ့ အစောပိုင်းက တိမ်းမှောက်ပြုတ်ကျသွားခဲ့ခြင်းဖြစ်ကာ၊ ယင်းကားမှောက်မှုမှ သေဆုံးသူ အလောင်း ၄၀ ကို ဒဏ်ရာရရှိသူ ၃ ဦးနှင့်အတူ ရှာဖွေရရှိခဲ့ပြီး မကြာမီတွင် တစ်ဦးထပ်မံဒေသဆိုင်ရာ သေဆုံးသွားခဲ့ကြောင်း အကြီးတန်းအုပ်ချုပ်ရေးအရာရှိ Hamza Anjum က ပြောကြားခဲ့သည်။ ကျန်နှစ်ဦးမှာလည်း ပြင်းထန်သောဒဏ်ရာများရရှိထားကာ စိုးရိမ်ရသည့် အခြေအနေတွင် ရှိနေသည်။
“သေဆုံးသွားတဲ့အလောင်းတွေဟာ ဘယ်သူဘယ်ဝါမှန်းမမှတ်မိနိုင်လောက်အောင်ပါပဲ”ဟု Hamza Anjum က ပြောသည်။
