ပစိဖိတ်သမုဒ္ဒရာမှာ နှစ်လကျော်ကြာ မျောပါနေချိန် မိုးရေနဲ့ ငါးအစိမ်းသာ စားသောက်ပြီး အသက်ဆက်နိုင်ခဲ့တဲ့ ဩစတြေးလျ သင်္ဘောသား တစ်ဦးနဲ့ သူ့ရဲ့ ခွေးလေးကို မကြာသေးမီကမှ ကယ်တင်နိုင်ခဲ့တယ်လို့ သိရပါတယ်။
အသက် ၅၄ နှစ်အရွယ် တင် ရှာဒစ်ခ်နဲ့ ခွေးမလေး ဘဲလာတို့ဟာ ဧပြီလနှောင်းပိုင်းမှာ မက္ကဆီကို ကနေ ပြင်သစ်ပိုလီနီးရှား နိုင်ငံဆီ နှစ်စင်းတွဲ ရွက်လှေလေးနဲ့ စတင် ခရီးထွက်ခဲ့ပါတယ်။ ဒါပေမယ့် သိပ်မကြာခင်မှာပဲ သူ့ရဲ့ ရွက်လှေလေးဟာ မုန်တိုင်းဒဏ်ကြောင့် အကြီးအကျယ် ပျက်စီးသွားခဲ့ပါတယ်။ လှေနဲ့အတူ ဆက်သွယ်ရေးနဲ့ လျှပ်စစ် ပစ္စည်းတွေပါ ပျက်စီးသွားခဲ့တဲ့အတွက် ဘယ်သူ့ဆီမှ ဆက်သွယ်လို့ မရတော့တာပါ။
အဲဒီကတည်းက တင်နဲ့ ဘဲလာတို့ဟာ ကျယ်ပြန့်လွန်းတဲ့ ပစိဖိတ်သမုဒ္ဒရာထဲ ဦးတည်ရာမဲ့ မျောပါနေခဲ့ပါတယ်။ အဲဒီလို မျောပါနေတဲ့ နှစ်လကျော်ကြာ ကာလအတွင်း တင်ဟာ လှေအမိုးအောက်မှာ အရိပ်ခိုလိုက်၊ ချက်စရာ လျှပ်စစ်ပစ္စည်းတွေ မရှိတော့တဲ့အတွက် ငါးဖမ်းပြီးရင် အစိမ်းစားလိုက်၊ မိုးရေသောက်သုံးလိုက်နဲ့ အသက်ဆက်ခဲ့ပါတယ်။
“ပင်လယ်ထဲမှာ အရမ်း ခက်ခဲလွန်းတဲ့ ဒုက္ခသုက္ခတွေကို ဖြတ်ကျော်ခဲ့ပြီးပါပြီ။ အနားယူပြီး အစားကောင်းကောင်းစားရရင် ပြန်ကောင်းသွားမှာပါ” ဟု တင်က ကယ်ဆယ်ခံရပြီးနောက် ပြောလာခဲ့ပါတယ်။
တင်တို့ကို ရှာတွေ့ခဲ့တာကတော့ တူနာငါးဖမ်း သင်္ဘောနဲ့အတူ ပါလာတဲ့ ရဟတ်ယာဉ်ပဲ ဖြစ်ပါတယ်။ ရဟတ်ယာဉ်ဟာ တင်တို့ကို သတိထားမိသွားပြီးတဲ့နောက် လှေတစ်စင်းနဲ့အတူ ပြန်လာခေါ်ခဲ့ပါတယ်။ အဲဒီသင်္ဘောကို ပိုင်တဲ့ ကုမ္ပဏီရဲ့ အဆိုအရ တင်နဲ့ ဘဲလာကို ကုန်းမြေနဲ့ မိုင်ပေါင်း ၁၂၀၀ ဝေးတဲ့နေရာမှာ ရှာတွေ့ခဲ့တာပါ။
တင်က သူ့ကို ကယ်ပေးခဲ့တဲ့ သင်္ဘော ကပ္ပတိန်နဲ့ ငါးဖမ်း သင်္ဘောကုမ္ပဏီကို ကျေးဇူးတင်ကြောင်း ပြောခဲ့ပါတယ်။ ဒီလို အဖြစ်ဆိုးနဲ့ ကြုံတွေ့ခဲ့ရတာတောင် တင်ကတော့ ရွက်လွင့်တာကို လက်မလျှော့ဘဲ သူဟာ သဘာဝကို ချစ်တဲ့သူပီပီ နောင်တစ်ချိန်ကျရင် ပြန်လည် ရွက်လွင့်သွားမှာ ဖြစ်ပါတယ်လို့ ပြောလာခဲ့ပါတယ်။
Source: OddityCentral
