ရုရှားနိုင်ငံပိုင်အဏုမြူစွမ်းအင်ကော်ပိုရေးရှင်း ROSATOM နှင့် မြန်မာနိုင်ငံ သိပ္ပံနှင့်နည်းပညာဝန်ကြီး ဌာနတို့ပူးပေါင်း၍ နျူးကလီးယားနှင့်သက်ဆိုင်သည့် သိပ္ပံပွဲတော် ၂၀၂၅ အား နိုဝင်ဘာ ၂၄ ရက်နံနက်ပိုင်းက နေပြည်တော်ရှိ Naypyitaw State Polytechnic University(NSPU)၌ ကျင်းပခဲ့ကြောင်း သိရသည်။
ပွဲတော်သို့ သိပ္ပံနှင့်နည်းပညာဝန်ကြီးဌာန ပြည်ထောင်စုဝန်ကြီးဒေါက်တာမျိုးသိန်းကျော်တက်ရောက်၍ ရုရှားဖက်ဒရေးရှင်းနိုင်ငံကိုယ်စားလှယ်များနှင့်အတူ ကျောင်းသားများ၏ ပန်းချီပြပွဲနှင့် Project Shows ပြု လုပ်နေမှုများကိုကြည့်ရှုလေ့လာအားပေးခဲ့ကြကြောင်း သိရသည်။
အဆိုပါ သိပ္ပံပွဲတော်၌ အခြေခံပညာကျောင်းသား၊ ကျောင်းသူများအတွက် နျူကလီးယားဆိုင်ရာဉာဏ်စမ်းဂိမ်းယှဉ်ပြိုင်မှုများကျင်းပ၍ ဂုဏ်ပြုဆုများချီး မြှင့်ပေးခဲ့ကာ Oliver Stone “Nuclear Now”မှတ်တမ်းရုပ်ရှင်၊ “ATOM Egypt ENG Master” နှင့် “The City Falls Asleep” မှတ်တမ်းရုပ်ရှင်တိုများပြသခြင်း၊ “Nuclear Technology in Everyday Life5” ခေါင်းစဉ်ဖြင့် ဟောပြောဆွေးနွေးခြင်းနှင့် နျူကလီးယားဆိုင်ရာ အသိပညာများမျှဝေခြင်းများပြုလုပ်ခဲ့ကြကြောင်း သိရသည်။
သိပ္ပံပွဲတော်ကျင်းပခြင်းဖြင့် အခြေခံပညာအဆင့်မှသည် တက္ကသိုလ်ကျောင်းသား၊ ကျောင်းသူများနှင့် က ဏ္ဍအသီးသီး၌ တာဝန်ထမ်းဆောင်နေသော လူငယ်ပညာရှင်များအထိ နျူကလီးယားပညာရပ်အပါအဝင် သိပ္ပံဆိုင်ရာအသိအမြင်များ၊ အတွေ့အကြုံဗဟုသုတများတိုးပွားလာစေခြင်း၊ သိပ္ပံပညာကို ပိုမိုစိတ်ဝင်စားစေပြီး သိပ္ပံပညာဆိုင်ရာအသစ်အဆန်းများ လေ့လာစူးစမ်းလိုစိတ်ဖြစ်ပေါ်လာစေခြင်း၊ ပညာရေးကဏ္ဍတွင် လူငယ်များ၏ စိတ်ဓာတ်ခွန်အားကိုမြှင့်တင်ပေးနိုင်ခြင်း၊ နိုင်ငံအတွင်း နျူကလီးယားစွမ်းအင်ဆိုင်ရာ အသိပညာများပြန့်ပွားလာမည်ဖြစ်၍ နိုင်ငံတော်၏ သိပ္ပံနှင့် နျူကလီးယားစွမ်းအင်ကဏ္ဍဖွံ့ဖြိုးတိုးတက်ရေးဆောင်ရွက်ရာတွင် များစွာအထောက်အကူပြုနိုင်သည့်အကျိုးကျေးဇူးများရရှိနိုင်မည်ဖြစ်ကြောင်း သိရသည်။