ကိုရီးယား ကျွန်းဆွယ်တွင် အမေရိကန်၏ စစ်ရေးဖြန့်ကျက်မှု ကြီးထွားလာမှုနှင့် ပတ်သက်၍ နျူကလီးယားနှင့် လက်တုံ့ပြန်မည်ဟု မြောက်ကိုရီးယားကတုန့်ပြန်ပြောဆိုခဲ့ပြီးနောက် ထိုသို့နျူကလီးယားလက်နက်များကို အသုံးပြုခြင်းသည် ကင်ဂျုံအန်းအစိုးရ အဆုံးသတ်သွားခြင်းကို ဆိုလိုကြောင်း တောင်ကိုရီးယားက ယနေ့ သောကြာနေ့ (ဇူလိုင် ၂၁) တွင် ပြန်လည်ပြောကြားခဲ့သည်။
“ဒီလိုဖြစ်လာရင် မြောက်ကိုရီးယားအစိုးရဟာ သူ့ရဲ့အဆုံးသတ်ကို ရင်ဆိုင်ရလိမ့်မယ်” ဟု တောင်ကိုရီးယား ကာကွယ်ရေးဝန်ကြီးဌာနက သောကြာနေ့တွင် ထုတ်ပြန်ခဲ့ခြင်းဖြစ်သည်။
တောင်ကိုရီးယားနှင့် အမေရိကန်တို့သည် စစ်ရေးပူးပေါင်းဆောင်ရွက်မှုကို မြှင့်တင်နေသောကြောင့် မြောက်ကိုရီးယားနှစ်နိုင်ငံကြား ဆက်ဆံရေးသည် အနိမ့်ဆုံးအဆင့်သို့ ရောက်ရှိနေသည်။
၁၉၈၁ ခုနှစ်နောက်ပိုင်း ပထမဆုံးအကြိမ်အဖြစ် ဘူဆန်သို့ ယခုသီတင်းပတ်အတွင်း ဆိုက်ကပ်လာသော အမေရိကန် နျူကလီးယား စွမ်းရည်ရှိ ရေငုပ်သင်္ဘောသည် မြောက်ကိုရီးယားအတွက် ၎င်း၏နျူကလီးယားလက်နက် အသုံးပြုရန် တရားဝင်သတ်မှတ်ချက်ပြည့်မီနိုင်ကြောင်း ကြာသပတေးနေ့တွင် မြောက်ကိုရီးယား ကာကွယ်ရေးဝန်ကြီးက သတိပေးခဲ့သည်။
အမေရိကန် ရေငုပ်သင်္ဘော၏ တောင်ကိုရီးယားခရီးစဉ် သည် မြောက်ကိုရီးယား၏ နျူကလီးယား ခြိမ်းခြောက်မှုများကို တရားဝင် တုံ့ပြန်မှုတစ်ရပ်လည်းဖြစ်သည်ဟုလည်း တောင်ကိုရီးယား ကာကွယ်ရေးဝန်ကြီးကဆိုသည်။