နျူကလီယားလက်နက်ဖျက်သိမ်းရေး ပံ့ပိုးကူညီမည်ဟု ပေလိုစီကတိပြု၊ နှစ်နိုင်ငံနယ်စပ်သို့ သွားရောက်ရန် စီစဉ်ထား

နျူကလီယားလက်နက်ဖျက်သိမ်းရေး ပံ့ပိုးကူညီမည်ဟု ပေလိုစီကတိပြု၊ နှစ်နိုင်ငံနယ်စပ်သို့ သွားရောက်ရန် စီစဉ်ထား

ဆိုးလ်၊ ဩဂုတ် ၄ ရက်

အမေရိကန်အောက်လွှတ်တော်ဥက္ကဋ္ဌ နန်စီပေလိုစီနှင့် တောင်ကိုရီးယား အမျိုးသားလွှတ်တော် ဥက္ကဌ ကင်မ်ဂျင်ပြို တို့သည် မြောက်ကိုရီယားအပေါ် ပြင်းထန်သော ဟန့်တားမှုများ ဆက်လက်ပြုလုပ်သွားရန် နှင့် နျူကလီးယားလက်နက်ဖျက်သိမ်းရေး ကြိုးပမ်းရာတွင် နိုင်ငံအချင်းအချင်း ပံ့ပိုးကူညီရန် သြဂုတ် ၄ ရက် ကြာသပတေးနေ့တွင် ကတိပြုခဲ့ကြသည်။

ဆိုးလ်၌ ပေလိုစီနှင့် အမျိုးသားလွှတ်တော် ဥက္ကဌ ကင်မ်ဂျင်ပြိုတို့ တွေ့ဆုံပြီးနောက် အဆိုပါပူးတွဲကြေညာချက်ကို ထုတ်ပြန်ခဲ့ပြီး တိုးတက်ပြောင်းလဲလာသော မြောက်ကိုရီးယား၏ နျူကလီးယားနှင့် ဒုံးကျည်ခြိမ်းခြောက်မှုများကို စိုးရိမ်ပူပန်နေကြောင်း ဖော်ပြခဲ့သည်။

မြောက်ကိုရီးယားအပေါ်ပိုမို တားဆီးမှုများပြုလုပ်ခြင်းကို အခြေခံကာ နိုင်ငံတကာ ပူးပေါင်းဆောင်ရွက်မှုနှင့် သံတမန်ရေးရာ တွေ့ဆုံဆွေးနွေးမှုမှတစ်ဆင့် လက်တွေ့ကျသော နျူကလီးယားကင်းစင်ရေးနှင့် ငြိမ်းချမ်းရေးရရှိရန် ကြိုးပမ်းနေသော အစိုးရနှစ်ရပ်၏ အားထုတ်မှုများကို ထောက်ခံရန် ကျွန်ုပ်တို့ သဘောတူညီခဲ့သည်ဟု အဆိုပါ ပူးတွဲကြေညာချက်တွင် ဖော်ပြထားသည်။

ပေလိုစီက ၎င်းနှင့် ကင်မ်သည် ဒေသတွင်း လုံခြုံရေး၊ စီးပွားရေးနှင့် ရာသီဥတု ပြောင်းလဲဖောက်ပြန်ခြင်း ကိစ္စရပ်များတွင် ပူးပေါင်းဆောင်ရွက်မှု မြှင့်တင်ရန် နည်းလမ်းများကိုပါ ဆွေးနွေးခဲ့ကြကြောင်း သတင်းစာရှင်းလင်းပွဲတွင် ပြောကြားခဲ့သည်။

ပေလိုစီသည် ထိုင်ဝမ်ခရီးစဉ် အပြီးတွင်တောင်ကိုရီးယားနိုင်ငံသို့ ဗုဒ္ဓဟူးနေ့ ညပိုင်းတွင် ရောက်ရှိခဲ့သည်။

ထို့နောက် ပေလိုစီသည် ကင်မ်နှင့် အခြားလွှတ်တော်အမတ်များဖြင့် ဆွေးနွေးမှုများမ ပြုလုပ်မီ ဆိုးလ်ရှိ အမေရိကန်သံရုံး အရာရှိများနှင့် ကြာဿပတေးနေ့ နံနက်ပိုင်းတွင် တွေ့ဆုံခဲ့ကြောင်း သိရသည်။

ပေလိုစီသည် ကြာဿပတေး ညနေ့ပိုင်းတွင် ကိုရီးယားနှစ်နိုင်ငံ နယ်စပ်အနီးရှိ ပူးတွဲလုံခြုံရေးနယ်မြေသို့ သွားရောက်ရန်စီစဉ်နေသည်ဟု တောင်ကိုရီးယား အရာရှိတစ်ဦးက ပြောကြားခဲ့သည်။

ပေလိုစီသည် သမ္မတဟောင်း ဒေါ်နယ် ထရမ့်‌ေနာက်ပိုင်းအဆိုပါနေရာသို့ သွားရောက်လည်ပတ်မည့် အမေရိကန်၏ ရာထူးအမြင့်ဆုံး အရာရှိတစ်ဦး ဖြစ်လာမည်ဖြစ်သည်။

Source: CNA