နောင်မွန်မြို့တွင် မိုးသည်းထန်စွာရွာသွန်း၍ လမ်းများပေါ်နှင့်လူနေအိမ်များအတွင်းသို့ ရေဝင်ရောက်မှုများဖြစ်နေ
ကချင်ပြည်နယ်၊နောင်မွန်မြို့တွင် စက်တင်ဘာ ၃ ရက်နံနက်ပိုင်းမှစတင်၍ မိုးသည်းထန်စွာရွာသွန်းမှုကြောင့် လမ်းများပေါ်နှင့်လူနေအိမ်များအတွင်းသို့ ရေဝင်ရောက်မှုများဖြစ်ပေါ်လျက်ရှိကြောင်း လူမှုကူညီရေးအသင်းများမှ သိရသည်။
“ရေဝင်တဲ့ရပ်ကွက်က အနိမ့်ပိုင်းမှာရှိတဲ့ အမှတ် (၂)ရပ်ကွက်ပေါ့ ကျန်တဲ့နေရာတွေကတော့ ရေမတက်သေးဘူး မိုးဆက်တိုက်မရပ်ဘဲရွာနေအုံးမယ်ဆိုရင်တော့ ရေထပ်တက်လာဖို့ရှိတယ်”ဟု လူမှုကူညီရေးအသင်းဝင်တစ်ဦးကပြောသည်။
အနိမ့်ပိုင်းရပ်ကွက်ရှိ နေအိမ်များအတွင်းသို့ ရေဝင်ရောက်မှုများဖြစ်ပေါ်နေသည့်အပြင် ရေစီးဆင်းမှုပြင်းထန်သဖြင့် နမ်ပန်းဒမ်းကြိုးတံတားမှာလည်း ပျက်စီးသွားခဲ့ကြောင်း သိရသည်။
“ကြိုးတံတားပျက်တော့ သွားရလာရတာအဆင်မပြေတော့ဘူးပေါ့ ရေကလည်းအတော်တက်နေတဲ့အခါကြတော့ အဆင်မပြေတာတွေများလာတယ် နောက်ပြီး ရေဝင်တဲ့နေရာတွေကအိမ်တွေမှာနေတဲ့လူတွေကိုလည်း ရေလွတ်တဲ့နေရာရွှေ့ပေးနေရတယ်”ဟု လူမှုကူညီရေးအသင်းဝင်တစ်ဦးကပြော သည်။
ရေဝင်ရောက်လျက်ရှိသည့် နေအိမ်များ၌နေထိုင်သူများအား ရေဘေးလွတ်ကင်းသည့် နေရာများသို့ယာယီရွှေ့ပြောင်းပေးလျက်ရှိပြီး လမ်းများပေါ်တွင်ရေကျော်နေသဖြင့် ဖြတ်သန်းသွားလာသူများအဆင်ပြေစေရန် အမှတ်အသားများပြု လုပ်ပေးခဲ့ရကြောင်း သိရသည်။
“လူထိခိုက်ဒဏ်ရာရတာနဲ့သေဆုံးတာမရှိပါဘူး တာဝန်ရှိတဲ့လူတွေကလည်း ကျွန်တော်တို့နဲ့အတူ ကူညီကယ်ဆယ်ရေးလုပ်နေတာကိုလာပြီး ကူညီပေးကြတယ်”ဟု လူမှုကူညီရေးအသင်းဝင်တစ်ဦးကပြောသည်။
