မန္တလေးတိုင်း၊ မိတ္ထီလာ၌ နေရောင်ခြည်စွမ်းအင်ဖြင့် လျှပ်စစ်ဓာတ်အားထုတ်ယူသုံးစွဲမှုကို အောင်မြင်စွာဆောင်ရွက်နိုင်မည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်က မှာကြားသည်။
၎င်းမှ ယနေ့ ဇန်နဝါရီ ၁၀ ရက်မွန်းလွဲပိုင်းက မိတ္ထီလာခရိုင်အတွင်းရှိ ခရိုင်/မြို့နယ်အဆင့်ဌာနဆိုင်ရာဝန်ထမ်းများ၊ အသေးစား၊ အငယ်စားနှင့် အလတ်စား စီးပွားရေး(MSME)လုပ်ငန်းရှင်များအားမိတ္ထီလာမြို့၌တွေ့ဆုံ၍ ဒေသဖွံ့ဖြိုးတိုးတက်ရေးဆိုင်ရာများနှင့် စီးပွားရေးလုပ်ငန်းဖွံ့ ဖြိုးတိုးတက်ရေးဆိုင်ရာများကို ဆွေးနွေးပြောကြားစဥ် မှာကြားခဲ့ခြင်းဖြစ်သည်။
လျှပ်စစ်ဓာတ်အားလိုအပ်ချက်အတွက် မိမိတို့အနေဖြင့် ပြန်လည်ပြည့်ဖြိုးမြဲစွမ်းအင်မှ ထုတ်ယူသုံးစွဲမှုကို အားပေးဆောင်ရွက်လျက်ရှိကာ မိတ္ထီလာသည် မိုးရွာရက်နည်းသည့်ဒေသဖြစ်ရာ နေရောင်ခြည်စွမ်းအင်ဖြင့် လျှပ်စစ်ဓာတ်အားထုတ်ယူသုံးစွဲမှုကို အောင်မြင်စွာဆောင်ရွက်နိုင်မည်ဟု ပြောသည်။
ထို့ပြင် နိုင်ငံတော်မှဆောင်ရွက်သည့် စီမံကိန်းများရှိသကဲ့သို့ လုပ်ငန်းရှင်များအနေဖြင့်လည်း မိမိတို့လုပ်ငန်းလိုအပ်ချက်များအလိုက် ဆိုလာစီမံကိန်းများကို ဆောင်ရွက်နိုင်ကာ လျှပ်စစ် ဓာတ်အားဖြန့်ဝေပေးနိုင်မှုအနေဖြင့် ဖျက်ဆီးခံရမှုများ၊ အချို့စက်ရုံများ စွမ်းအားပြည့်လည်ပတ်နိုင်မှုမရှိခြင်းများ၊ ဓာတ်ငွေ့လိုအပ်ချက်မပြည့်မီမှုများကြောင့် အခက်အခဲများရှိနေသည်ဟု ပြောသည်။
” ဒါ့အပြင် နိုင်ငံတော်ကအကောင်အထည်ဖော် ဆောင်ရွက်နေတဲ့ ရေအားလျှပ်စစ်စီမံကိန်းတွေကို ကန့်ကွက်မှုတွေရှိနေတာကြောင့် အမြန်ဆုံးအကောင်အထည်ဖော်ဆောင်ရွက်လို့ရတဲ့ ဆိုလာစနစ်ကိုအားပေးဆောင်ရွက်နေခြင်းဖြစ်ပါတယ်။ ဒါ့ကြောင့် နိုင်ငံတော်ကဆောင်ရွက်နေသလို လုပ်ငန်းရှင်တွေအနေနဲ့လည်း တစ်နိုင်တစ်ပိုင်ဝိုင်းဝန်းဆောင်ရွက်ကြဖို့လိုပါတယ်”ဟု နစက ဥက္ကဋ္ဌကမှာကြားသည်။
ထို့ပြင် နစက ဥက္ကဋ္ဌမှ မိတ္ထီလာတွင် မွေးမြူရေးလုပ်ငန်းများကို အောင်မြင်စွာဆောင်ရွက်ပါက အခြား ဆက်စပ်လုပ်ငန်းများလည်း အောင်မြင်စေနိုင်မည်ဖြစ်ကာ ဒေသတွင်းစိုက်ပျိုးရေးသီးနှံတစ်ခုဖြစ်သည့် ကြက်သွန်နီနှင့် ငရုတ်တို့ကို အထွက်နှုန်းကောင်းအောင်ဆောင်ရွက်ပြီး တစ်နှစ်ပတ်လုံးစိုက်ပျိုးထုတ်လုပ်ရောင်းချနိုင်မည်ဆိုပါက ပြည်တွင်း၊ ပြည်ပဈေးကွက်များသို့ တင်ပို့ရောင်းချခြင်းဖြင့် နိုင်ငံ့စီးပွားဖွံ့ဖြိုးတိုးတက်မှုကိုအထောက်အကူများစွာဖြစ်စေနိုင်သည်ဟုလည်း ပြောကြားခဲ့သည်။
ထို့အတူ တမာပိုးသတ်ဆေးနှင့် တမာမြေဩဇာများထုတ်လုပ်နိုင်ပြီး အရိပ်ရလေကာပင်များဖြစ်သည့် တမာပင်စိုက်ပျိုးရန်၊ သာယာလှပမှုနှင့် သဘာဝပတ်ဝန်းကျင်စိမ်းလန်းစိုပြေမှု၊ အေးချမ်းစိုပြေမှုတို့ရှိပါက ဒေသတွင်းသို့ ခရီးသွားအများအပြားလာရောက်ခြင်းဖြင့် ဒေသခံတို့၏ လူမှုစီးပွားဘဝဖွံ့ဖြိုးတိုးတက်မှုကိုများစွာအထောက်အကူဖြစ်စေနိုင်သဖြင့် မိတ္ထီလာခရိုင်အတွင်း Green Zone Area များကို မဖြစ်မနေအကောင်အထည်ဖော်ရန်လည်း မှာကြားခဲ့သည်။